Mark 14 - Panga ea Kya 1895

¹ Isango ja ’kunduwa na ja pěmbě e ha ’bě na ilanda i hakudwěndi hwi ’bale tombango; prist ja meolo na Balěndi ba ka vahaka ugono muabu u ka nângâně Mâ, na bâ‐ba weya Mâ.

² Ndi ba vâki, na, Hanga o buhwa boa isango, banga etoko ya kwa o bato ba jadi.

³ O Mâ‐a diyakid‘ o Bethane, o ndabo ya Saimân, e diyaki na ’gâlani, o Mâ‐a diyakidi a jaka, ka mwajo a viya omě na ’gala ya alabastěr ya mavulě ma kango ma spiknard ma tâ mětě, ka mâ‐a dubuwa ’gala, ka mâ‐a hovidě mâ molo muaju.

⁴ Bâkâ ba diyakind‘ omě ba numbakindi bâ mětě na bâ mětě, na, mavulě tě ma kango ekama ma mbanakiya lě nandi?

⁵ Ikabojana ma ma diyate ma hambakudwě wa na kama ja fura ilalo na jâ‐ja věwě mekuge. Ba ka hěnjěkě mâ.

⁶ Ka Jisus a vâ, na, Dikaki mâ ni mbwe; e lě nd‘ eanyu e hakě mâ njuke? a hi ’Mba ehavu eyamu.

⁷ Ikabojana mekuge me n‘ inyěni egombe yěhěpi, oningě o vahingěni o ka hati meâ ni bwam‘; nd‘ o ’běni n‘ Umba egombe yěhěpi.

⁸ A handi nyang‘ ’aju e ka yâlě; a viyendi pâni ka hiya mavulě o nyol‘ ’amě opěla itongwě.

⁹ Pâkwěpâkwě Mbi vâki n‘ inyěni, na, Iboko viěhěpi via sango t‘ eyam‘ ekaně vi ka hamanudwě o he těkaně yěhěpi, elombo tě eaju e di hango ekae, e ka langwěndi iyongidě jaju.

¹⁰ Ka Judas Iskariot, umbâkâ ua jomu na bebale, a vala o prist ja meolo i jadi ka kândâ Mâ o bâ‐ba jadi.

¹¹ Ba yěněki mbya o bâ‐ba yokaki nonaně, ka bâ‐ba yohaně mâ na ba ka vi mâ dâlě. Ka mâ‐a vaha pěl‘ ’aju e ka kândâně Mâ hwě.

¹² Buhwa boa pěmbě e ha ’be na ilanda boa bohoboho, o bâ‐ba weyakiyedi ikunduwa, ka beyokwedi beaju bea vâ na Ju, na, O vahaka lě na ho kěke ka kenjě iboko ovaně nd‘ Âvě o ka jě isango ja Ikunduwa ove?

¹³ Ka Mâ‐a loma beyokwedi beaju bebale, ka Mâ‐a vâ na bâ, na, Kěkěni o mboka, o ka latandini na moto ovoně bapěngo imâgi ja miba; vitaki mâ ni.

¹⁴ Iboko viaju vi ka ngiyě o ka vâkâni na hangwě ndabo, na, Uyokwidi a ma vwi, na, Ikenga ja bangi i l‘ ove o ’Mba‐mbi ka jě isango ja bokundwaka na beyokwedi beamě?

¹⁵ A ka leviděndi ’nyěni ilika iněně oba, bonguěngo kenwěngo: kenjakeni ovoně o pěl‘ ’ahu.

¹⁶ Ka beyokwedi beaju bea vala ka bâ‐ba pâ o mboka, ka bâ‐ba kâbidě ka Mâ‐a vâki na bâ; ka bâ‐ba kenjě isango.

¹⁷ O yâ e diyaki kolo ka Mâ‐a viya na jomu na bebale.

¹⁸ O bâ‐ba diyakidi diya, ba jaka, ka Jisus a vâ, na, Pâkwěpâkwě, Mbi vâki n‘ inyěni, na, Umbâkâ ua njamb‘ ’anyu a jakě n‘ Umba a ka kândi ’Mba.

¹⁹ Ka bâba yalě ngěbě, na vâ na Ju umbâkâ umbâkâ, na, A nd‘ umba? upâkwě mâ na, A i ’mba?

²⁰ Ka Mâ‐a timbwana na vâ na bâ, na, A ndi ua njamba ya jomu na bebale, a dubakě n‘ Umba o ’pělě bwalo.

²¹ Mwana moto a ’landi, ka yâ e di lěndwěngo o pěl‘ ’aju, ndi maguga na moto tě ua Mwana moto a ka kândânwě, bwamu ndi na te moto těně a Jakwě.

²² O bâ‐ba yalakidě ija, ka Jisus a nângâ pěmbě, ka Mâ‐a vambiya ibâtâ, ka Mâ‐a pěhě yâ, ka Mâ‐a vě bâ yâ, na, Nângâkâni, jakani, nyalo ’amě nd‘ ekaně.

²³ O Mâ‐a běkidi akeva věngo, ka Mâ‐a nângâ sěngě, ka Mâ‐a vě bâ yâ: ka bâ běhěpi ba mâtânidě.

²⁴ Ka Mâ‐a vâ na bâ, na, Makiya mamě nd‘ ekama ma panga ya kya ma hoviyedi o pělě ’a baitě.

²⁵ Mbambayě mětě, Mba mâte pě bebuma bea ukâdi epâkwě njo, kabo o buhwa boamě bo ka mâtě beâ bea kya o ipangiya j‘ Anyambě.

²⁶ O bâ‐ba běkidi viembo tumbuděngo, ka bâ‐ba puma nala o ’kodi mua Âlive.

²⁷ Ka Jisus a vâ na bâ, na, Inyěni běhěpi o ka kâbândini o nyang‘ ’amě na bulu těkabo, ’kabojana e lěndwěngo, na, Mbi ka bweyandi utati na medâmbě mea pajangana.

²⁸ Nd‘ o ’Mba‐mbi ka pumbuwě, Mbi ka ’land o Galili o bohoboho.

²⁹ Ka Pitě a vâ na Ju, na, Tombekete běhěpi ba kâbâte, ndi mba yâlě.

³⁰ Ka Jisus a vâ na Ju, na, Mbambaě, Mbi vâki na nâvě, na, O buhwa těkabo, mětě bulu těkabo, na kuba na kâkâlâkâ nj‘ ibale, o ka hâhiyi ’Mba nj‘ ilalo.

³¹ Ka mâ‐a kala pě nangudi, na, Oningě mba wa na nâvě, mba hâhiy‘ Âvě na vilolombo. Yâ nyanga tě te ya běhěpi e vâkidi.

³² Ka bâ‐ba pâ o mwanga u ma tubakwě na Gěthsěmane, ka Mâ‐a vâ na beyokwedi beaju, na, Diyakani okava ulingo muamě u kalakiyě.

³³ Ka Mâ‐a nângâ Pitě na Jems na Jân, ka Mâ‐a yalě imama nangudi, na nyolo vâhâ mětě.

³⁴ Ka Mâ‐a vâ na bâ, na Ilina jamě i yěněkěndi ngěbě eněně piěle na iwedo; vengakiděni, pepwakani.

³⁵ Ka Mâ‐a piya kwěi, ka Mâ‐a kwa o he, ka Mâ‐a kaliya nana iwěla i tombake Mâ, oningě na e te e hamakě.

³⁶ Ka Mâ‐a vâ, na, Abba, Paia, belombo beěhěpi be ka hamate Âvě o jadi; věngěkidě ’Mba sěngě tě ya kâpi ekaně; ndi hanga nyang‘ ’amě e vahakě, ndi ka ’vě o pangakě.

³⁷ Ka Mâ‐a viya, ka Mâ‐a kâbidě bâ‐ba yaka viyâ, ka Mâ‐a vâ na Pitě, na, Saimân, o yaka tepě?

³⁸ Wa yâlě o pepuwa iwěla jâkâ? Pepwakani, o ka kalakiyani, o banga wa ngiyani iyějudwě. Ilina mětě i kokěngo, ndi nyolo e ibě na ngudi.

³⁹ Ka Mâ‐a vala pě, ka Mâ‐a kaliya, A ka kalaka jâ ndaga tě te.

⁴⁰ O Mâ‐a timbakidi, ka Mâ‐a kâbidě pě bâ ba yaka viyâ (’kabojana mihâ mabu ma diyaki bodilo) na bâ‐bu yowakě tepě eabu e ka yavwaně Mâ.

⁴¹ Ka Mâ‐a ’la pě njo ilalo, ka Mâ‐a vâ na bâ, na, Yakani nandi, yâjâkâni; ya bě ndi twětwě, iwěla i pândi; umbwakiyateni, Mwana moto a kândudwěndi o benâ bea bato babe.

⁴² Umwakani, ho kekeni; umbwakiyani, a kândâkě ’Mba a bě ndi piělě.

⁴³ O Mâ‐a diyakidi a kalaka, elěngiaha tepě ka Judas a viya, ua njamba ya jomu na babale, ebumbu eněně e diyaki na ju na mekwala na metumbe, ba viya o prist ja meolo na balěndi na batodu.

⁴⁴ A kândâkiyi Mâ a věki bâ ndembo, na, Uamě a ka pyâpyě, Mâ ndi Mâně; bweyaki Mâ ni, o ka valanaki Mâ ni na bokeli.

⁴⁵ O mâ‐a pâkidi, ka mâ‐a paniya o vala bokěkě o Mâ‐a jadi, ka mâ‐a vâ, na, Paia‐o! Paia‐o! ka mâ‐a pyâpyě Mâ.

⁴⁶ Ka bâba nangidě makadu o Mâ‐a jadi, ka bâ‐ba bweya Mâ.

⁴⁷ Umbâkâ ua njamb‘ ’abu a diyakidi bakamango, ka mâ‐a hoduwa ukwala, ka mâ‐a koka uhayi mua prist eněně, ka mâ‐a leniya ditâ jaju.

⁴⁸ Ka Jisus a vâ na bâ, na, O ma viyandini o ’Mba‐mbi jadi, ona mwibi, na mekwala na beposa ka nângâ ’Mba?

⁴⁹ Mbi diyakindi buhwa boěhěpi n‘ inyěni o ndabo ya Anyambě Mbi yokwakidě, wu bweyaki ’Mba ni; ndi Malěndwě ma ka timandi.

⁵⁰ Ka bâ běhěpi ba dika Mâ, ka bâ‐ba kweya.

⁵¹ Ka iwanja n‘ ihuhu ja vitaně Mâ, unamba mu‘ ivěla pugang‘ o nyolo;

⁵² ka mawanja ma bweya mâ; ka mâ‐a dika unamba mu‘ ivěla, ka mâ‐a kweya na bâ uhamba.

⁵³ Ka bâ‐ba valana Jisus o prist eněně e jadi; prist eněně na batodu na balěndi ba yolanakiděndi o mâ‐a jadi.

⁵⁴ Ka Pitě a vitaně Mâ yaviděngo, kwanga nala ikenga ja prist eněně; ka mâ‐a diya na benami, a lâlâkâ veya.

⁵⁵ Ka prist eněně na ba ehoka běhěpi ba buta ndaga ja bovelaka opěla Jisus ijabu i ka weyaně Mâ; ndi bu duwaka.

⁵⁶ Ikabojana bato baitě ba pakwakindi bea bojowa o pěl‘ ’aju, ndi mepako meabu meu hohonganakě.

⁵⁷ Ka bato bâkâ ba těmě ka veliya o pěl‘ ’aju,

⁵⁸ na, Ho yokaki Mâ‐a vâkâ, na, Těmpěl tě e longakudwě na benâ ekaně, Mbi ka buludi yâ, ndi na hwi ’lalo vâkâna Mbi longi pě ’pâkwě e longwě na benâ.

⁵⁹ Ndi tombe kakana mepako meabu meu hohonganakě.

⁶⁰ Ka prist eněně ya těmě o hanganě, ka mâ‐a uwa Jisus, na, Wa timbwanaka elombo? E lě nde ya ekaba e pakwakě opěl‘ Âvě?

⁶¹ Ka Mâ‐a diya dâ, A yavwanaka ’lombo. Ka prist eněně ya uwa pě Mâ, na ju, na, Âvě ndi Kraist mwana w‘ Ibâtâ?

⁶² Ka Jisus a vâ, na, Umb‘ i Mâ; tepě, o ka yěněndini Mwana moto diyango o ’nâ eyomi ya ngudi, A vaka na bevindi bea oba.

⁶³ Jâ ndi ja prist eněně ja nya ngâi jaju, na, Ho lě pěni na nja mal‘ ě ma tali?

⁶⁴ O yokindini ikila jaju j‘ Anyambě; o yěněkě li na? Ka bâ běhěpi ba hubě Mâ na A lukango n‘ iwedo.

⁶⁵ Ka bâkâ ba yalě Mâ ituwa ja malě, na diba boho boaju, na bâ‐ba ka bweyaka Mâ bebode, na o vâ na Mâ, na, Sâkâkâ; bahayi tepě ba ka bweyaka Mâ mabanjo.

⁶⁶ O Pitě a diyakidi o ikenga o he, k‘ umbâkâ ua lotângâ la prist eněně a viya;

⁶⁷ ka mâ‐a yěně Pitě a lâlâkâ veya, ka mâ‐a tamuwa mâ, na, Âvě tepě o diyaki na Jisus ya Nazarěth.

⁶⁸ Ka mâ‐a hâhâ, na, Mba ’wě, n‘ umbamba bweyakidě tepě ka ’vě o vâkě. Ka mâ‐a vala o ’lěmbě; ka kuba ya kâkâlâ.

⁶⁹ Ka itângâ ja yěně pě mâ, ka jâ‐ja yalě o vâ na ba diyaki těmetěme, na, Ekaně nd‘ uabu.

⁷⁰ Ka mâ‐a hâhâ pě. Kwěi, ka ba diyaki těmetěme ba vâ pě na Pitě, na, Mbambayě, âvě nd‘ uabu; ’kabojana o ndi ua Galili, na mbâhi ’âvě tepě e kwanakandi.

⁷¹ Ka mâ‐a yalě o kila na o kana, na, Mba ’wě moto t‘ uanyu a vâkě ně.

⁷² Ka kuba ja kâkâlâ njo y‘ ibale. Ka Pitě a yongidě ndaga ya Jisus e vâki na ju na, Kuba na kâkâkâlâ njo y‘ ibale, o ka hâhiyi ’Mba njo y‘ ilalo. O mâ‐a běkidi nonaně pikiliyango, ka mâ‐a e ya.