Mark 13 - Panga ea Kya 1895

¹ O Mâ‐a diyakidi a pumaka těmpěl, ka eyokwedi ’aju yâkâ ya vâ na Ju, na, Uyokwidi yěněkěte itingidi tě ja malale na ja ilongidi ekadi!

² Jisus a yavwanakindi, ka Mâ‐a vâ na mâ, na, O yěněkěte ndabo t‘ iněně ekadi? wa dikan‘ okava ilale kahaniděngo n‘ ipâkwě i ka měndě i sajwe.

³ O Mâ‐a diyakidi diya o ukodi mua Âlive, hohonganěngo na těmpěl, Pitě na Jems na Jân na Andru ba uwaki Mâ ilimbo.

⁴ Langwakiya hwě egombe ya belombo těkabe e ka diyě? na e ka diya lě nja ndembo ě belombo těkabe beěhěpi be ka timě?

⁵ Ka Jisus a yavwana A ka yalakě o vâ na bâ, na, Bandamakiděni o banga moto a temidě inyěni.

⁶ Ikabojana baitě ba ka viyi na dina jamě, na, Umba ndi Mâ, na bâ‐ba ka temakidě baitě.

⁷ Ndi o inyěni o ka yokěni beduka na sango ja beduka, o papulanakeni, ’kabojana belombo bea jângâ tědině be ka hamandi, ndi ihuku i ha pâyete.

⁸ Yeně ’tomba e ka yani na epâkwě, din‘ ipangiya na ipâkwě; he e ka ninganěndi o loboko lâkâ, mesalâku na njuke be ka diyandi; ekabe ndi bea jali ja ngěbě.

⁹ Ndi kelevakani inyi mětě; ’kabojana ba ka kândândi ’nyěni o behoka; o ndabo ja Anyambě o ka bomwěndini; o ka vanwěndini o meoho mea bapangiyi na mepolo o nyang‘ ’amě, ilanguwa o pěl‘ ’abu.

¹⁰ Sango eyam‘ e ka tand‘ o hamana o betomba beěhěpi.

¹¹ Nd‘ o bâ‐ba ka valakidě ’nyěni, na bâ‐ba kândâ tepě inyěni, o take o nakani eanyu e ka kalě, o pikilakiyeni tepě egombe e t‘ o pâ: ijanyu i ka věwě o iwěla tědině jâ ndi ’janyu i ka kalě, ndi Ilina Iyamu.

¹² Nandi vâkâna ba nyangwě pâkâ ba ka kândânâkândi o iwedo, na ua hangwě na mwana; na bana ba ka ’mwaniděndi, na bâ‐ba běkělěniyi ba jaki bâ, na bâ‐ba weyidě bâ.

¹³ O ka binwěndini na bato běhěpi o nyanga ya dina jamě: nd‘ a ka lilimidě nal‘ ihuku, mâ t‘ a ka yongě.

¹⁴ Nd‘ o ’nyěni o ka yěněni elombo e binakwě y‘ ujilo (ya Danyěl usâki e kalakidi) de o yâ e ha lukakidi o těmě (a langakě a bweyakidě) nandi ba jad‘ o Judia ba ka kweyaka o mekodi.

¹⁵ A ka diyě o ndabo oba a hubake pě o ndabo tombe o ngiya ovoně ka nângâ elombo o ndabo ’aju.

¹⁶ A ka diyě o mwanga a timbake o bea mbuhwa ka nângâ ngâi ’aju.

¹⁷ Ndi majili na ba ka diyě na memi, na ba ka diyě ba nyangakě o hwi tědině!

¹⁸ Ndi kalakiyani na ikweya janyu i diyake o ’gombe y‘ ivěvu.

¹⁹ Ikabojana o hwi tědině o ka diyi na etuniya e ha diyete oviya jali j‘ ivela j‘ Anyambě i velakidi na pâ kya těkaně, na yâ ya diye pě.

²⁰ Tepě kabo Upangiyi a vuvidě hwi tědině, vâkâna o ’bě na moto a ka yongwě; nd‘ o nyanga ya ba pânwěngo, ibaju ba di pânângo, a vuvidi hwi.

²¹ Nandi oningě moto ka moto a vâ n‘ inyěni, na, Yěněkěte, Kraist nd‘ ekaně; tombe, na, Yěněkěte, A nd‘ ovoně; o kamakidi mâ ni.

²² Ikabojana Kraist ja ’vela na basâki ba bojowa i ka pândi, na j‘ i ka levidi ndembo na megoma be ka ’mbaki o kweyidě tombe na ba pânwěngo, e jaka na e ndi e hamaka.

²³ Ndi kelevakani; yěněkěte, Mbi tind‘ o languwa ’nyěni belombo beěhěpi.

²⁴ Oningě betuniya bea hwi tědině tombango, joba i ka vindandi, ngândě ya věye unanga muaju.

²⁵ Nyětěti ja oba i ka kwandi, na ngudi i jad‘ oba i ka ninganaka.

²⁶ Nandi vâkâna ba yěnindi Mwana moto a vaka o bevindi na ngudi eněně n‘ ivenda.

²⁷ Nandi vâkâna a lomindi enjěl jaju, na bâ‐ba ka yolakě ibaju ba pânwěngo oviya mahuku ma he manai, oviya pělě ya he ya bo na kwanga pělě ya bo ya oba.

²⁸ Nandi yokwakani ukanakâdi mua ’le ya itâla; Oningě mekilibanjo meaju me ngite mebâbu, na me ka pumakě bekai, o yowuděteni na bokâ boa běndi piěle.

²⁹ Yâ nyanga tě, te ’anyu o inyěni o ka yěněni belombo těkabe be hamaka, yowakěni na ya bě ndi piěle, o mebiyâ.

³⁰ Mbambayě, Mbi langwakiyandi ’nyěni, Igona těkadi ja tombe, belombo těkabe beěhěpi be t‘ o hama.

³¹ He na oba be ka tombandi, ndi ndaga jamě ja tombe.

³² Ndi buhwa těboně, n‘ iwěla tědině beâ ’wane na moto, tombe na enjěl i jad‘ o Hěvěn, tombe na Mwana, ndi kabo Hangwě.

³³ Kelevakani, pepwakani, kalakiyani tepě; ’kabojana wa ’wěni o egombe e ka pâyě.

³⁴ Ikabojana Mwana moto a ndi ona moto a vala o ’tomba ya yaviděngo, a dikakidi ndabo ’aju, ka mâ‐a vě bahayi baju ipangiya, moto uěhěpi eaju ’havu; ka mâ‐a vâ na utati mua ubiyâ na a pepwake.

³⁵ Nandi pepwakani; ’kabojana wa ’wěni egombe ya upangiyi mua ndabo e ka pâyě, ipě na ba kolo, ipě na ba bulutema, ipě na ba yakako, ipě n‘ ubwa:

³⁶ banga a pâ matota, na mâ‐a kâbidě ’nyěni o yakani.

³⁷ Nyang‘ ’amě e vâkě n‘ inyěni, yâ te ’amě e vâkě na běhěpi, na, Pepwakani.