Mark 12 - Panga ea Kya 1895

¹ Ka Mâ‐a yalě na bâ na mekanakâdi. Momo n‘ uhuhu a liyaki mwanga, ka mâ‐a lungidě muâ ugomba, ka mâ‐a puduwa ibabo vi hovakě ivě, ka mâ‐a longa elongo, ka mâ‐a vě muâ baliyi, ka mâ‐a vala o ehe ya yaviděngo.

² O hongodi ka mâ‐a loma uhayi o baliyi ba jadi nana a pahakiye bebuma bea mwanga oviya baliyi ba jadi.

³ Ka bâ‐ba bweya mâ, ka bâ‐ba boma mâ, ka bâ‐ba timbě mâ naně.

⁴ Ka mâ‐a loma pě bâ uhayi upâkwě; ka bâ‐ba bweya mâ malale, ka bâ‐ba luma mâ o molo, ka bâ‐ba timbě mâ yokiděngo ihâni.

⁵ Ka mâ‐a loma pě upâkwě, ka bâ‐ba weya mâ na bapâkwě baitě; ba bomaka bâkâ, ba weyaka bâkâ.

⁶ A diyakite mwan‘ umbâkâ uaju a tândâkidi, ka mâ‐a loma mâ na mbuhwě mbuhwě tepě o bâ‐ba jadi, na, Ba ka dili mwan‘ ’amě.

⁷ Ndi baliyi těbaně ba kalakindi bâ mětě na bâ mětě, na, Ekaně nd‘ ujigi; vakani, ho weyaki mâ ni, ovaně nd‘ ekuha e ka diyě ya bě ’ahu.

⁸ Ka bâ‐ba bweya mâ, ka bâ‐ba weya mâ, ka bâ‐ba uhwa mâ o pěpěkě ya mwanga.

⁹ Ndi, upangiyi mua mwanga a ka ha lě na? A ka viyi ka jilidě baliyi, na mâ‐a vě mwanga o bapâkwě.

¹⁰ O ha langeteni Ilěndwě těkadi, Ilale ja balongi i kiyakidi ja bě ndi molo mu‘ itududu:

¹¹ Ekae diyakindi ehadi ya Upangiyi; e mamanakwě tepě o mihâ mahu?

¹² Ba butakind‘ o bweya Mâ, ndi ba bangakindi ebimba; ’kabojana ba yěněkindi na, a kalakindi ukanakâdi těkamu o pěl‘ abu; ka bâ‐ba dika Mâ, ka bâ‐ba vala.

¹³ Ka bâ‐ba loma Farisi na Hěrodian n‘ ihuhu o Mâ‐a jadi nana ba hilakě ndaga jaju.

¹⁴ O bâ‐ba vakidi, ka bâba vâ na Ju, na, Uyokwidi, ho te yowěngo na O ndi pâkwěpâkwě, O bě tepě na moto n‘ isâlâ; na nâvě wa yěněkě tepě meoho mea bato pivi, nd‘ O yokwakidě njeya ya Anyambě na pâkwěpâkwě. E ndi hohonganěngo na ho věkě Sisar pago, ipě e ibě?

¹⁵ Ho věke ipě ho věkě? Ka Mâ‐a yowě inoka jabu, ka Mâ‐a vâ na bâ, na, E lě nde ’anyu e yějěkiyě ’Mba? Vanaki ’Mba ni fura, Mbi yěne yâ.

¹⁶ Ka bâ‐ba vana yâ. Ka Mâ‐a vâ na bâ, na, Ekamu uvela na dina be lě bea nja? Ka bâ‐ba vâ na Ju, na, Bea Sisar.

¹⁷ Jisus a yavwanakindi ka Mâ‐a vâ na bâ, na, Věkěni Sisar belombo be jadi beaju, o Anyambě be jadi ibeaju tepě. Ka bâ‐ba mama na Ju.

¹⁸ Ka Sajusi ja viya o Mâ‐a jadi i vâkâ na o ibě na ipumbuwa; ka bâba uwa Mâ,

¹⁹ na, Uyokwidi, Mosěs a lěnděkiyi hwě, na, Oningě mwa nyangwě na moto a wa, na mâ‐a dika mwajo a dike bana, na mwana nyangwě a bakě mwad‘ ’aju, na mâ‐a ka těkidě mwana nyangwě ibângâ.

²⁰ Ba diyakindi nyangwě pâkâ hěmbwědi; ka ua bohoboho a ba mwajo, ka mâ‐a wa â dike ibângâ.

²¹ Ka ua balalo a ba mâ, ka mâ‐a wa, au dikaka tepě ibângâ; ua balalo nyanga tě.

²² Ka ua hěmbwědi a ba mâ, ba dike ibângâ; na mbuhwa ya běhěpi ka mwajo a wa tepě.

²³ Ndi o ipumbuwa, o bâ‐ba ka pumbuwa, a ka diya lě mwad‘ ’a nja o bâ‐ba jadi? ’kabojana bâ běhěpi hěmbwědi te ba baki mâ.

²⁴ Ndi Jisus a timbwa naki, ka Mâ‐a vâ na bâ, na, O lemakěndini, ’kabojana wa ’wěni Malěndwě tombe na ngudi ya Anyambě?

²⁵ Ikabojana o bâ‐ba ka pumbuwě oviya iwedo, ba baye, na bâba banudwě; ndi ba ka diyandi ona enjěl i jad‘ o Hěvěn.

²⁶ O pělě ’a bawewe, nana ba ka pumbuwandi, o ’běni langango o ’janganangobo ya Mosěs nyanga ya Anyambě e kalaki na ju o ele, na, Umba ndi Anyambě ya Ebraham, na Anyambě ya Aisak, na Anyambě ya Jekâb?

²⁷ A ’bě Anyambě ya bawewe, ndi ya ba di mihâ. O dimbakiyandini n ‘iněně.

²⁸ Ka ulěndi umbâkâ mâ‐a viya, ka mâ‐a yoka bâ‐ba kalaka, ka mâ‐a yěně na, A ma yavwani bâ bwamu, ka mâ‐a uwa Mâ, na, Elekanako ya bohoboho mět‘ e lě nde?

²⁹ Ka Jisus a yavwani mâ, na, Elekanako ya bohoboho e ndi, na, Israěl, yokakani; Jěhova, Anyambě ahu a ndi Upangiyi umbâkâ.

³⁰ Na, tândâkâ Jěhova Anyambě ’âvě n‘ ulema muâvě muěhěpi, n‘ ilina jâvě jěhěpi, n‘ ipikiliya jâvě jěhěpi, na ngud‘ ’âvě yěhěpi; elekanako ya bohoboho nd‘ ekae.

³¹ Ya babale e tepě ona ’kae, Tândâkâ bato bapâkwě ka ’vě mětě. O ’bě na ’lekanako epâkwě eněně wa na ’kabe.

³² Ka ulěndi mâ‐a vâ na Ju, na, Bwamu, Uyokwidě, o languwi pâkwěpâkwě; ’kabojana Anyambě e te yâkâ; o ’be pě na epâkwě kabo yâ dipâ;

³³ o tândâ Mâ n‘ ulema muěhěpi, n‘ ibweyidě jěhěpi, n‘ ilina jěhěpi, na ngudi yěhěpi, na o tândâ bato bapâkwě panika ’vě mětě, e ndi wa na bova bo ma tumbakwě na meambo meěhěpi.

³⁴ O Jisus a yěni na a ma yavwani n‘ iyowě, ka Mâ‐a vâ na ju, na, O ’be yaviděngo na ipangiya ja Anyambě. Oviya ’vaně o diye pě na moto a uwakě Mâ nyuwe.

³⁵ O Jisus a diyakidi a yokwakidě o těmpěl ka Mâ‐a yavwana bâ, na, Nd‘ e lě nde ya Balendi ba vâki na Kraist a ndi Mwana Devid?

³⁶ Devid mâ mětě a vâkindi k‘ Ilina Iyamu i vâki na ju, na, Jěhova a vâkindi na Upangiyi muamě, na, Diyaka ’vě o ’nâ ’amě eyomi, kabo ’Mba ta panga baloni bâvě ebonga ’vě e pitakiyě.

³⁷ Devid mâ mětě a ma tubaki Mâ na Upangiyi, nd‘ a bě lě mwan‘ ’aju na? Ka ebimba yěhěpi ya yoka Mâ a kalaka, na mbya.

³⁸ Ka Mâ‐a vâ na bâ n‘ iyokwanidi viaju, na, Kelevakani na Balěndi ba vahakě o tamwaka na ngâi iyaba na bâ‐ba tândâkâ mahomwě o mahambanido,

³⁹ na bediya beněně o ndabo ja Anyambě, na loboko la betiyango o masango:

⁴⁰ ba pukulakě ndabo ja mealika, na bâ‐ba ka temakidě bato na makaliya mayaba; ekaba ndi ba ka duwě ivomudwě iněně wa.

⁴¹ Ka Jisus a diya o pělě ya egala ya ungumba, a yěněkě ka bato ba kutwakidě hika o egala tě; ba diyakidi benami ba kutwakidi eitě.

⁴² Ka mwalika n‘ uhuhu, mâ‐a viya omě u diyakidi sâmiyěngo, ka mâ‐a kutudě mait ibale i weyakě farthing.

⁴³ Ka Mâ‐a ndiya beyokwedi beaju, ka Mâ‐a vâ na bâ, na, Pâkwěpâkwě, Mbi vâki n‘ inyěni, na, Mwalika tě mua ukuge muně u ma vaměndi wa na bato běhěpi ba ma kutudě o ’gala ya ungumba.

⁴⁴ Ikabojana bâ běhěpi ba kutwakiděndi oviya bwinge boabu; ndi a kutudendi oviya bonyamo boaju eaju yěhěpi e diyanakidi, eaju e ma bikinaka.