Mark 11 - Panga ea Kya 1895

¹ O bâ‐ba bakamidi na Jěrusalěm, o Běthfaje na Běthane, o ’kodi mua Âlive, ka Mâ‐a loma beyokwedi beaju bebale.

² Ka Mâ‐a vâ na bâ, na, Kěkěni o ibâkâ i jad‘ o boho boanyu, o betakateni omě, o ka hunganandini o duwa mwana buru tingamango, o moto a ha diyete; unjuwaki yâ ni, wa vanani.

³ Oningě moto a vâ n‘ inyěni, na, E lě nde eanyu e hakě ekae? o ka vâkâni, na, Upangiyi a na yâ na mala; vâkâna a hungani tepě o huludě yâ.

⁴ Ka bâ‐ba vala, ka bâ‐ba duwa mwana, buru tingamango piělě n‘ ubiyâ, o mani ma njeya, ka bâ‐ba ’njuwa yâ.

⁵ Bâkâ ba diyakid‘ omě těmetěme, ka bâ‐ba vâ, na, E lě nde eanyu e ’njuwakě mwana‐buru?

⁶ Ka bâ‐ba vâ na bâ ka Jisus a langwakiyi bâ; ka bâ‐ba hulidě bâ.

⁷ Ka bâ‐ba vana mwana buru o Jisus a jadi, ka â‐bba puga yâ ngâi jabu, ka Mâ‐a diya o yâ.

⁸ Baitě ba wanjaka ngâi jabu o njeya; bâkâ ba lenaka paha ja bele, ba takidě jâ o njeya.

⁹ Ka ba kěkid‘ o bohoboho, na ba vitakidě ba yama, na, Hosana, Ibâtâ na A vakě na dina ja Upangiyi.

¹⁰ Ibâtâ na ipangiya ja hangw‘ ’ahu Devid i vakě na dina ja Upangiyi, Hosana oba mětě.

¹¹ O ka Jisus a pâ o Jěrusalěm, na o těmpěl; o Mâ‐a běkidi belombo beěhěpi hilěngo, ndi egombe ya kolo e ka vaka, ka Mâ‐a vala o Běthane na jomu na babale.

¹² Mwehe upâkwě o Mâ‐a timbakidi oviya Běthane, ka Mâ‐a yoka nja.

¹³ Ka Mâ‐a yěně ele ya itâla yaviděngo e di na bekai, ka Mâ‐a ’la ovoně n‘ ipě a ka duwandi elombo omě; o Mâ‐a pâkidi o tina, au duwaka elombo kabo bekai; ’kabojana egombe ya fig e diyakite e t‘ o pâ.

¹⁴ Ka Jisus a vâ na yâ, na, Moto a je pě bebuma o âvě‐o jadi oviya ’kava nala egombe yěhěpi. Ka beyokwedi beaju bea yoka yâ.

¹⁵ Ka bâ‐ba pâ o Jěrusalěm; ka Jisus a vala o těmpěl, ka Mâ‐a yalě ipumě ja ba ma hambaka na ba hambakidě o těmpěl; A ka hovaka tagulu ja bapepengani ba dâlě na bediya bea ba ma hambakidě mbenga;

¹⁶ A bâbe na moto a pudunganake těmpěl na eva.

¹⁷ Ka Mâ‐a yokude bâ, na, E ’be lěndwěngo, na, Ndabo ’amě e ka tubwi na betomba beěhěpi na Ndabo y‘ Ikaliya? ndi o pangindi yâ ni ndabo ’a meyibi.

¹⁸ Ka Balěndi na prist iněně ja yoka yâ, ba ka butaka nyang‘ ’abu e ka weyaně Mâ; ba ma bangaki Mâ, ’kabojana ebimba yěhěpi e mamakindi iyokwanidi viaju.

¹⁹ O kolo e pâdi ka Mâ‐a věngěmě o mboka tě.

²⁰ N‘ ubwa, o bâ‐ba diyaki ba tombaka, ka bâ‐ba yěně ele ya itâla vivilaniyango ’viya metamba.

²¹ Ka Pitě a yongidě, ka mâ‐a vâ na Ju na, Paia o, yěněkěte ele tě ya fig eâvě e hâkâkidi e vivilaniyendi.

²² Jisus a ka Mâ‐a vâ na bâ, na, Diyakani n‘ ikamidě o Anyambě a jadi.

²³ Ikabojana Mbi vâki n‘ inyěni mbambaye, na, A ka vâyě n‘ ukodi těkamu, Věngěměkě, wa ’la ka kwa o manga, a bome penda n‘ ulema, ndi mâ‐a kamakidě na belombo beaju be ma vâ be ka hamandi, a ka pahiyandi eaju e ka vâyě.

²⁴ Ovaně nd‘ o ’mbambi vâkě n‘ inyěni, na, Belombo, beanyu be uwakě, oningě o kalakiyani, kamakiděni na o pahakiyandi beâ ni, vâkâna be ka diyandi o inyěni o jadi.

²⁵ Oningě o jadini de o kalakiyani, iyakiděni oningě o jadini na moto na ’lombo; na ovaně nd‘ o Hangw‘ ’anyu a jad o Hěvěn a ka ’yid‘ inyěni mabe manyu.

²⁶ Nd‘ oningě o ’yiděni, Hangwě ’anyu a jad o Hěvěn a ’yide ’nyěni mabe manyu.

²⁷ Ka bâ‐ba pâ pě o Jěrusalěm; o Mâ‐a diyakidi a tamwaka o těmpěl kakana ka prist ja meolo na Balěndi na batodu ba viya o Mâ‐a jadi, ka bâ‐ba vâ na Ju,

²⁸ na, I lě nja ipangiyě ijâvě i hanakě belombo těkabe? Nja věkid‘ âvě ipangiya tě i hakě belombo těkabe?

²⁹ Jisus a yavwanakindi ka Mâ‐a vâ na bâ, na, Mbi ka uwa tepě inyěni ndaga pâkâ, wa yavwani ’Mba ni, vâkâna Mbi languwendi ’nyěni ipangiya jamě i hanakě belombo těkabe.

³⁰ Baptisma ya Jân e vakiyendi oviya Hěvěn, ipě o bato ba jadi? yavwanaki ’Mba ni.

³¹ Ka bâ‐ba hokolaniya bâ mětě na bâ mětě, na, Oningě hwa vâ, na, Oviya oba, A ka vwi, na, Nd‘ e lě nde ’anyu e ha kamakidě Mâ?

³² Nd‘ oningě hwa vâ, na, Ya bato; ho bangaki bato, ’kabojana běhěpi ba ma yěněki Jân na a ndi usâki mbambaye.

³³ Ba yavwanaki ka bâ‐ba vâ na Jisus, na, Hoa languwe, Jisus a yavwanaki ka Mâ‐a vâ na bâ, na, Mba languwe tepě inyěni ipangiya jamě i hanakě belombo těkabe.