Mark 1 - Panga ea Kya 1895

¹ Jali ja sango eyamu ya Jisus Kraist mwana ua Anyambe.

² E lěndwěngo o basaki, na, Mbi lomango utodu muamě o boho boâvě, u ka bonguwě njeya ’vě o boho.

³ Joyi j‘ umbâkâ i yamakandi o nginga, na, Kenjakěni megâmbâ mea Upangiyi, těkiděni njeya jaju de.

⁴ Jân a ma baptaisakandi o nginga, na mâ‐a kalakiya baptisma ya iluwa ja melema o ivěngidě ja bobe.

⁵ Bato ba ’he ya Judia, na ba Jěrusalěm, ba kěkind‘ o mâ‐a jadi, bâ běhěpi ba ma baptaisakwěndi na ju o viho Jordan, ba měměkě mabe mabu.

⁶ Jân a ma bâtâkândi ngâi ja mevâtâ mea kaměl, n‘ utumba mua ’koto tingango; a jaka lohěnjěnjě na boyi boa ’hiki.

⁷ A kalakiya, na, O vakand‘ Umbâkâ o mbuhw‘ ’amě, ngudi wa n‘ umba, mbi bě weyango n’ ibalama n’ umbamba njuwa ukâdi mwa makogo maju.

⁸ Mbi baptaisango ’nyěni mbambayě na miba, ndi A ka baptaisandi ’nyěni n‘ Ilina Iyamu.

⁹ E diyakindi o hwi tědině ka Jisus a viya oviya Nazarěth ya Galili, ka Mâ‐a baptaiswě na ju o Jordan.

¹⁰ A jabwakate o kindiki, ka Mâ‐a yěně oba e jadi bwe, Ilina i hubaka o Mâ‐a jadi ona mbenga:

¹¹ ka joyi ja viya oviya oba, na, O Mwan‘ ’amě a tândâkě, a tândâkidě ‘Mba bwamu.

¹² Ka Ilina ja validě Mâ o nginga, o njo pâkâ.

¹³ A diyakindi o nginga ovoně mabo ma hwi manai, A yějěkudwě na Setan: A diyakindi na tito: ka enjěl ja haya Mâ.

¹⁴ O Jân a běkidi vamwěngo o meboka, ka Jisus a viya o Galili, A pakwakiya sango eyamu ya ipangiya ja Anyambě,

¹⁵ na, Egombe e pândi, ipangiya ja Anyambě ja bě ndi piělě: uluakani melema, n‘ inyěni o ka kamakiděni sango eyamu.

¹⁶ O Mâ‐a diyakidi a tamwaka baka na etima ya Galili, ka Mâ‐a yěně Saimân, na mwana nyangwě Andru, ba dulaka ’lâba o ’tima, ba diyaki bahombwedi.

¹⁷ Ka Jisus a vâ na bâ, na, Vitanaki ’Mba ni, vâkâna Mbi ka pangandi ’nyěni bahombwedi ba bato.

¹⁸ Ka bâ‐ba dika belâba beabu njo tě ya pâkâ, ka bâ‐ba vitě Mâ.

¹⁹ O Mâ‐a běkidi yaviděngo kwěi, ka Mâ‐a yěně Jems mwana Zěbědi, na mwana nyangwě Jân, ba diyaki tepě o elende, ba hângâkâ belâba beabu.

²⁰ Ka Mâ‐a ndiya bâ njo tě ya pâkâ, ka bâ‐ba dika hangw‘ ’abu Zěbědi o elende na ba ma hakiya mâ, ka bâ‐ba vitě Mâ.

²¹ Ka bâ‐ba vala o Kapěrnaum; o buhwa boa Iyâjâ, ka Mâ‐â ngiya o tyâtyi ’abu, A ka yokwakidě.

²² Ba mamakindi iyokwanidi viaju, ’kabojana A yokwakidi bâ bwěsě ona moto a di na ipangiya, ndi hanga ka balěndi.

²³ Momo a diyakindi o tyâtyi ’abu n‘ ilina ibe; ka mâ‐a yama,

²⁴ na, Dikaka hwě mbwe, ho lě na nâvě nande, Âvě Jisus ya Nazarěth? O ma viyi ka weya hwě? Mbi yowudět’ Âvě, Âvě ndi Umbâkâ ua Anyambě ua Hole.

²⁵ Ka Jisus a kandidě mâ, na, Diyaka dâ, na nâvě wa puma o mâ‐a jadi.

²⁶ O ilina ibe i njimi mâ, ka jâ‐ja yama na joyi oba, ka jâ‐ja puma o mâ‐a jadi.

²⁷ Ka bâ běhěpi ba mama imama i pangaki bâ uwanaka bâ mětě na bâ mětě, na, Ekae e lě nja ’lombo ě? Vi lě nj‘ iyokwanidě via kya ekavi? ’kabojana n‘ ipangiya a sombiyakěndi tombete malina mabe na mâma yokiyate mâ.

²⁸ Ka kuma ’aju ya hungana o hamana wâwâ o hanganě tě ya Galili ně yěhěpi.

²⁹ O bâ‐ba pumakidi o tyâtyi, ka bâ‐ba ngiya o ndabo ya Saimân na Andru; na Jems na Jân ba diyakind‘ omě.

³⁰ Ndi nyangwě ya mwad‘ ’a Saimân a diyaki na mehiyo mea ivěvu bya; kwěi ka bâ‐ba languwa Mâ o pěl‘ ’aju.

³¹ Ka Mâ‐a viya ka bweya mâ o ’nâ, ka Mâ‐a ’mudě mâ; elěngiaha tepě ka ivěvu ja dika mâ, a ka hakiya bâ.

³² O joba i kweyakiyedi, na kolo, ba vanakindi mebědi meěhěpi o Mâ‐a jadi, na ba diyaki na děvil.

³³ Ka mboka yěhěpi ya yolaně o ubiyâ.

³⁴ Ka Mâ‐a yongě baitě ba diyaki na bebědi bea mangâ maitě, ka Mâ‐a pumě děvil iitě, Au tândâkâ děvil i kalaka; ’kabojana ba yowakidi Mâ.

³⁵ Ka Mâ‐a ’muwa n‘ ubwa n‘ ubwa, buhwa bo t‘ o bumuwa, ka Mâ‐a vala o iboko via ikutakuta; A ka kalakiya.

³⁶ Saimân na ba diyaki na ju ba vitakidi Mâ.

³⁷ O bâ‐ba běki Mâ duwango, ka bâ‐ba vâ na Mâ, na, Bato běhěpi ba vahakand‘ Âvě.

³⁸ Ka Mâ‐a vâ na bâ, na, Ho kěkeni o mboka ipâkwě, ovaně nd‘ Umbambi ka kaliy‘ ovoně tepě, ’kabojana tina ’amě e vanakidi ndi yâně.

³⁹ Ka Mâ‐a kaliya o tyâtyi jabu o Galili yěhěpi, na Mâ‐a věngěkidě děvil.

⁴⁰ Egâlani e vakindi o Mâ‐a jadi, ka yâ‐ya balama, e ka hâhâlâkidě Mâ, na, Oningě wa panga o te na ngudi e yongakě ’mba.

⁴¹ Ka Jisus a yěně mâ ngěbě, ka Mâ‐a hambid‘ enâ, ka Mâ‐a kupaně mâ, na, Mbi pangindi; yongaka.

⁴² Elěngiaha A kala, tepě egâlani e věngěměkě, ka mâ‐a yongwě.

⁴³ Ka Mâ‐a kelevidě mâ, ka Mâ‐a timbě mâ.

⁴⁴ Ka Mâ‐a vâ na mâ, na, Bandamakidě o langwake moto, ndi kěkě, ka levakidě nyolo ’âvě prist, na nâvě wa vě o pělě ya iyongwě jâvě belombo bea Mosěs be vâkidi, ka tali o bâ‐ba jadi.

⁴⁵ Ka Mâ‐a vala, a ka kenakě yâ n‘ iněně mětě, e pangaka Jisus a diye na ngudi e pâkě o mboka o bwebwe, nd‘ A ka diyaka kabo o loboko la nginga; bato ba ma vakandi o Mâ‐a jadi oviya hanganě yěhěpi.