SANGO EYAMU EA LUL E LĚNDĚKIDI 3 - Panga ea Kya 1895

¹ O upuma mua jomu na metano mu‘ ipangiya ja Taibirius Sisa, Pântius Pailat gâven ya Judia, Hěrod titrak ya Galili, mwana nyangwě Filip titrak ya Ituria n‘ indendandenda via Trakonaitis, Lisanias titrak ya Abilini,

² Anas na Kaiafas prist ja meolo, ka ndaga ja Anyambě ja pâ o Jân mwana ua Sakaraias a jadi o nginga.

³ Ka mâ‐a viya o indendandenda via Jâdan viěhěpi, a vaka a kalakiya baptisma y‘ iluwa ja melema o ivěngidě ja bobe;

⁴ Panika yâ di lěndwěngo o ejanganangobo ya ndaga j‘ usâki Iseas, na, Joyi j‘ umbâkâ i yamaka o nginga, na, Kenjakěni megâmbâ mea Jěhova, těkiděni njeya jaju.

⁵ Itaba jěhěpi i ka londwěndi, ukodi na ekandangolo yěhěpi be ka hubudwěndi; bea lěngěměngo be ka tědwěndi, njeya ja potapota i ka pangwěndi věvělě;

⁶ Mehoni meěhěpi me ka yěněndi iyonga ja Anyambě.

⁷ Ka mâ‐a vâ na bebimba be vakidi ka baptaiswě na mâ, na, A! igona ja mbamba, nja a kelevidě inyěni na kweyakiyani malingwa ma vakě?

⁸ Nandi lângâkâni bebuma be di lukango iluwa j‘ ulema, n‘ inyěni o yalakěni o vâ o melema meanyu, na, Ho na hangw’ ahu Ebraham: ikabojana mbi vâki n‘ inyěni, na, Anyambě a te a yâlâkě o ’mudě malale těkama ma bě bana ba Ebraham.

⁹ Nandi ubâki u tepě nangudwěngo o tina ya bele: ovaně vâkâna ele yěhěpi e ha lângâkâ bebuma beyam‘ e kwělěkwěndi, na yâ‐y‘ uhwě o veya.

¹⁰ Ka bato ba uwa mâ, na, Ho hake lě nde?

¹¹ A yavwanakindi ka mâ‐a vâ na bâ, na, A di na ngâi ’bale, a kabake na a ha ’bě ně; a di na beja, a haki tepě nyanga tě.

¹² Ka bayoli pago ba viya ka baptaiswě, ka bâ ba vâ na ju, na, Paia, ho hake lě nde?

¹³ Ka mâ‐a vâ na bâ, na, O nângâkeni wa na nyanga ’anyu e di langudwěngo.

¹⁴ Ka sâjě ja uwa tepě mâ, na, Hwě ho hake lě nde? Ka mâ‐a vâ na bâ, na, O hakeni moto njuke, n‘ inyěni o bakanakiděni moto elombo o naně, n‘ inyěni o ka diyakani hwěmiyěngo n‘ ivě janyu.

¹⁵ O bato ba diyakidi n‘ ipepuwa, na běhěpi ba diyakindi ba yebakiya o melema meabu o pělě ya Jân, n‘ ipě mâ ndi Kraist, ipě a ibě;

¹⁶ Jân a yavwanakindi ka mâ‐a vâ na bâ běhěpi, na, Pâkwěpâkwě mbi baptaisakandi inyěni na miba; nd‘ Umbâkâ a di ngudi wa n‘ umba a vakandi, mbi ’bě weyango n‘ injuwa j‘ ukâdi mua makogo maju: Mâ nd‘ a ka baptaisě inyěni n‘ Ilina Iyamu na veya:

¹⁷ a na epepa o ’nâ ’aju, A ka viyândi nděk ’aju, na Mâ‐a yolě hwit o ndabo ’aju; nd‘ A ka dikiděndi behavu na veya vi ha dimaka.

¹⁸ A kalakiyi bato belombo bepâkwě beitě bea ihâhâlidě jaju.

¹⁹ Nd‘ o mâ‐a kandakidě Hěrod titrak, o pělě ya Hěrodias mwad‘ a mwana nyangwě Filip, na o pělě ya mabe ma Hěrod ma hakidi měhěpi,

²⁰ a badakindi ekabo wa na meěhěpi, ivamě ja Jân o ndabo ya meboka.

²¹ E diyakindi, o bato běhěpi ba diyakidi baptaiswěngo, na Jisus tepě na baptisakwě A ka kalakiya, oba e dubwanakiyendi,

²² Ilina Iyam‘ i hubakind‘ o Mâ‐a jadi na ehini ya nyolo ka mbenga, ka joyi ja viya oviya ’ba, na, O Mwan‘ ’amě a tândâkě; o tândâkidi ’mba bwamu.

²³ Jisus mětě a diyakindi a ka ’mbaka o pâ mabo ma mepuma malalo utodu, (pani ka yâ e piviyakudwě, na,) a diyakindi mwan‘ ’a Josěf, a diyaki mwan‘ ’a Hilai,

²⁴ a diyaki mwan‘ ’a Matat, a diyaki mwan‘ ’a Livai, a diyaki mwan‘ ’a Mělkai, a diyaki mwan‘ ’a Jana, a diyaki mwan‘ ’a Josěf,

²⁵ a diyaki mwan‘ ’a Matataias, a diyaki mwan‘ ’a Emâs, a diyaki mwan‘ ’a Neum, a diyaki mwan‘ ’a Eslai, a diyaki mwan‘ ’a Nagi,

²⁶ a diyaki mwan‘ ’a Maat, a diyaki mwan‘ ’a Matataias, a diyaki mwan‘ ’a Sěmiai, a diyaki mwan‘ ’a Josěf, a diyaki mwan‘ ’a Juda,

²⁷ a diyaki mwan‘ ’a Joana, a diyaki mwan‘ ’a Risa, a diyaki mwan‘ ’a Sorobaběl, a diyaki mwan‘ ’a Salatiěl, a diyaki mwan‘ ’a Nirai,

²⁸ a diyaki mwan‘ ’a Mělkai, a diyaki mwan‘ ’a Adai, a diyaki mwan‘ ’a Kosam, a diyaki mwan‘ ’a Elmodam, a diyaki mwan‘ ’a Ěr,

²⁹ a diyaki mwan‘ ’a Josi, a diyaki mwan‘ ’a Eliisěr, a diyaki mwan‘ ’a Jorim, a diyaki mwan‘ ’a Matat, a diyaki mwan‘ ’a Livai,

³⁰ a diyaki mwan‘ ’a Simiân, a diyaki mwan‘ ’a Juda, a diyaki mwan‘ ’a Josěf, a diyaki mwan‘ ’a Jonan, a diyaki mwan‘ ’a Eliekim,

³¹ a diyaki mwan‘ ’a Milia, a diyaki mwan‘ ’a Minan, a diyaki mwan‘ ’a Matata, a diyaki mwan‘ ’a Netan, a diyaki mwan‘ ’a Devid,

³² a diyaki mwan‘ ’a Jěsi, a diyaki mwan‘ ’a Oběd, a diyaki mwan‘ ’a Boos, a diyaki mwan‘ ’a Salmân, a diyaki mwan‘ ’a Neasân,

³³ a diyaki mwan‘ ’a Aminadab, a diyaki mwan‘ ’a Eram, a diyaki mwan‘ ’a Esrâm, a diyaki mwan‘ ’a Ferěs, a diyaki mwan‘ ’a Juda,

³⁴ a diyaki mwan‘ ’a Jekâb, a diyaki mwan‘ ’a Aisak, a diyaki mwan‘ ’a Ebraham, a diyaki mwan‘ ’a Tera, a diyaki mwan‘ ’a Nekâr,

³⁵ a diyaki mwan‘ ’a Seruk, a diyaki mwan‘ ’a Regâ, a diyaki mwan‘ ’a Felěk, a diyaki mwan‘ ’a Hibir, a diyaki mwan‘ ’a Sala,

³⁶ a diyaki mwan‘ ’a Kainan, a diyaki mwan‘ ’a Arfaksad, a diyaki mwan‘ ’a Syěm, a diyaki mwan‘ ’a Noi, a diyaki mwan‘ ’a Leměk,

³⁷ a diyaki mwan‘ ’a Matusela, a diyaki mwan‘ ’a Inâk, a diyaki mwan‘ ’a Jerěd, a diyaki mwan‘ ’a Malilil, a diyaki mwan‘ ’a Kainan,

³⁸ a diyaki mwan‘ ’a Inâs, a diyaki mwan‘ ’a Sět, a diyaki mwan‘ ’a Adam, a diyaki mwan‘ ’a Anyambě.