SANGO EYAMU EA LUL E LĚNDĚKIDI 2 - Panga ea Kya 1895

¹ E diyakindi o hwi tědině, ka elekanako ya viya oviya Sisa Augustus a jadi, na, he yěhěpi e langakwe tango.

² Tango těkaně e takind‘ o hawě o ’gombe ya Sairinius e diyakidi gâven ya Siria.

³ Ka běhěpi ba ’la ka langwě, moto uěhěpi o mboka ’aju mětě.

⁴ Ka Josěf a viya o Galili, o mboka ya Nasarět, na ’la o Judia, o mboka ya Devid, e tubakwě, na, Běthlihěm (ikabojana a diyakindi ua ndabo na diyâ ja Devid),

⁵ ka langwě na mwad‘ ’aju a diyakidi nyimango, Meri, a bě boněně na jěmi.

⁶ E diyakindi, o bâ‐ba diyakid‘ omě, ka hwi j‘ ijadi ja tima.

⁷ Ka mâ‐a ja njad‘ ’aju ya momo, ka mâ‐a dinga mâ menamba bodingaka, ka mâ‐a nangidě mâ o ilika via honji; ’kabojana bu diyaka na iboko o ndabo ’a bangi.

⁸ O yâ ’hiki tě o diyaki na batati ba medâmbě ba diyaka o ’hiki, ba tataka meanga meabu na bulu.

⁹ Na umbwakiyate, enjěl ya Upangiyi ya viya o bâ‐ba jadi, ka ivenda ja Upangiyi ja panya ulwaniděngo o bâ‐ba jadi, ka bâ‐ba banga nangudi.

¹⁰ Ka enjěl ya vâ na bâ, na, O bangakeni: ’kabojana mbi vanindi inyěni sango eyam‘ ya mbya ’něně, e ka diyě ya bato běhěpi.

¹¹ Ikabojana A ndi jawěngo inyěni o buhwa těkabo o mboka ya Devid, Uhungini, a jadi Kraist Upangiyi.

¹² Ndembo e ka diyě o inyěni o jadi nd‘ ekaně; O ka kâbiděndini ukěkě dingwěngo na menamba, bya o ilika via honji.

¹³ O mbenjě pâkâ ndumba ya ebumbu ya oba ba bě na enjěl, ba bendakě Anyambě, na,

¹⁴ Ivenda na Anyambě oba mětě, o he jonga, upango uyamu na bato.

¹⁵ E diyakindi, o enjěl i diyakidi i kěkětě oviya o bâ‐ba jadi na ’la oba, ka batati ba medâmbě ba vâ bâ mětě na bâ mětě, na, Ho t‘ o valani o Běthlihěm, ka yěně elombo tě e di hamango, ya Anyambě e di hwě yowuděngo.

¹⁶ Ka bâ‐ba hungana o pâ, ka bâ‐ba kâbidě Meri na Josěf, n‘ ukěkě bya o ilika via honji.

¹⁷ O bâ‐ba yěnidi, ka bâ‐ba yowudě ilango tě i langwakudwě bâ o pělě ’a mwa těkaně.

¹⁸ Ba yokakidi běhěpi ba mamakindi belombo tě bea batati ba medâmbě be langwakiyi bâ.

¹⁹ Ndi Meri a tatakindi belombo těkabe beěhěpi, na mâ‐a pikilakiya beâ n‘ ulema muaju.

²⁰ Ka batati ba medâmbě ba timbanidě, ba kěkě ba věkě Anyambě ivenda n‘ ibendě o pělě ’a belombo beabu be yokakidi n‘ ibeabu be yěněkidi beěhěpi, hohonganěngo na nyanga e langwakudwě bâ.

²¹ O hwi logwambi i hânjâbiyedi j‘ ihěbě ja mwana, a vangakudwi dina, na, JISUS, dina ja enjěl i vangakidě mâ ovaně a t‘ o kahwě jemi.

²² O hwi jaju j‘ ibongu wě hohonganěngo na elekanako ya Mosěs i hânjâbiyedi, ka bâ‐ba vana mâ o Jěrusalěm, ka levidě mâ Upangiyi;

²³ (pani ka yâ e di lěndwěngo o elekanako ya Upangiyi, na, Momo uěhěpi a bumwakidě ihuhu a ka tubwi, na, hole o Upangiyi A jadi;)

²⁴ na ka vě mwambo hohonganěngo na e di vânwěngo o elekanako ya Upangiyi, na, Lobembe lobale tombe bana ba mbenga babale.

²⁵ Umbwakiyate, o diyaki na momo o Jěrusalěm, dina, na, Simiân; momo tě a diyakindi ua hânjâbiyěngo uyam‘, a vengaka ipeyudwě ja Israěl; Ilina Iyamu i diyakindi na ju.

²⁶ E levakudwi mâ, n‘ Ilin‘ Iyamu na, a yěne iwedo, kabo a ta yěně Kraist ya Upangiyi.

²⁷ Ka mâ‐a pâ o těmpěl n‘ Ilina Iyam‘: o hangwě na nyangwě ba vanidi ukěkě mua Jisus, ka ha yâ mběmbâ ya elekanako,

²⁸ ka mâ‐a nângâ mâ o benâ beaju, ka mâ‐a bendě Anyambě, na,

²⁹ Nandi Jěhova, hulwakidě uhayi muâvě u kěkě na jonga, hohonganěngo na ndaga ’vě:

³⁰ Ikabojana mihâ mamě ma yěnindi iyonga jâyě,

³¹ Ijâvě i kenjakidě o boho boa bato běhěpi;

³² Bwe e panyakiye betomba bepâkwě, na ivenda ja bato bâvě Israěl.

³³ Ka Josěf na nyangwě ba mama belombo tě be kalakudwě o pěl‘ ’aju.

³⁴ Ka Simiân a vambiya bâ ibâtâ, ka mâ‐a vâ na nyangwě Meri, na, Hilakěte, mwa těkaně a ndi tědwěngo o ikwa n‘ iumuwa ja baitě o Israěl;

³⁵ na ndembo e ka kalakudwě bobe; e, ukwala mu‘ ibâtâ u ka tubě tepě ilina jâvě mětě; na ovaně nd‘ o mapikiliya ma melema meitě ma ka saliyě.

³⁶ O diyaki na Ana pâkâ, usâki mua mwajo, mwan‘ ’a Fanuěl, ua diyâ ja Asěr: a diyakindi a bě utodu uitě, na mâ‐a diyaki na momo mepuma hěmbwědi oviya itângâ;

³⁷ a diyakindi mwalika mabo ma mepuma logwambi na mepuma menai, a věngěme oviya těmpěl, ndi a ma dilakěndi Anyambě na ihindina ja nja na makaliya bulu na mwehe.

³⁸ O mâ‐a ngiyedi o ’gombe těně ka mâ‐a vě tepě Upangiyi akeva, ka mâ‐a kala na ba diyakidi ba vahaka ivango o Jěrusalěm běhěpi o pěl‘ ’aju.

³⁹ O bâ‐ba hadi belombo beěhěpi hohonganěngo na elekanako ya Uyangiyi, ka bâ‐ba timba o Galili, o mboka ’abu mětě Nasarět.

⁴⁰ Ka mwana A tombuwa, ka Mâ‐a yâdiyě n‘ ilina, londango n‘ iyowě; na ehekwě ya Anyambě e diyakindi o Mâ‐a jadi.

⁴¹ Nandi hangwě na nyangwě ba ma kěkěndi o Jěrusalěm upuma k‘ upuma muěhěpi o isango j‘ Ikunduwa.

⁴² O Mâ‐a diyakidi a bě jomu ja mepuma na mepuma mebale utodu, ka bâ‐ba beta na ’la o Jěrusalěm ibenga ja behadi be‘ isango.

⁴³ O bâ‐ba timakidě hwi tě, ka bâ‐ba timba, ka etumbě ya Jisus ya dikana o mbuhwa o Jěrusalěm; ndi Josěf na nyangwě bu yowakě yâ.

⁴⁴ Ndi ba yebakiyendi na a t‘ o njamba, ka bâ‐ba tamuwa ekěndâ ya buhwa bâkâ; ka bâ‐ba vaha Mâ o majawě mabu na o badiya babu ba jadi.

⁴⁵ O bâ‐ba ha duwaki Mâ, ka bâ‐ba timba pě o Jěrusalěm, ba kěkě ba vahaka Mâ.

⁴⁶ E diyakindi, o hwi ’lalo ka bâ‐ba duwa Mâ o těmpěl, diyang‘ o ibemba ja bayokwedi, a yokolakidě bâ, na Mâ a uwaka bâ nyuwe.

⁴⁷ Ba yokakidi běhěpi ba mamakindi ibweyidě n‘ iyavwanidi viaju.

⁴⁸ O bâ‐ba yěni Mâ, ka bâ‐ba mama: ka nyangwě a vâ na Ju, na, Mwana ’amě, o lě hwě hango kakana na? hilakěte hwě na hângwě ho vahind‘ âvě na ngěbě.

⁴⁹ Ka Mâ‐a vâ na bâ, na, O ma vaha li ’Mba ni nande? oa ’wěni na Mbi vahakand‘ o diya o ehavu ya Paia?

⁵⁰ Ndi bu bweyakidě ilango jaju i kalaki na bâ.

⁵¹ Ka Mâ‐a huba na bâ, na ’la o Nasarět, a ma dilaki bâ: ndi nyangwě a ma tatakandi ndaga těkadi jěhěpi o ebumulema ’aju.

⁵² Ka Jisus a tombuwa n‘ iyowě n‘ utě, n‘ itândě ja Anyambě na bato.