SANGO EYAMU EA LUL E LĚNDĚKIDI 1 - Panga ea Kya 1895

¹ O baitě ba nângâkidi na enâ itědě j‘ ipakuwa ja belombo tě be kamakudwě pâkwěpâkwě o hwě ho jadi,

² te pani ka bâ‐ba bweyakidě hwě beâ, ba diyakidi oviya jali tali ja mihâ, na bahayi ba ndaga;

³ e yěněněki tepě bwam‘ o ’mba‐mbi jadi, ’kabojana mbi jadi hânjâbiděngo ibweyidě ja belombo beěhěpi oviya jali mětě, ka lěndi y‘ âvě Tiâfilus uyamu hohonganěngo,

⁴ na ovaně nd‘ âvě o ka yowě pâkwěpâkwě ea belombo tě ibeâvě be yokwakudwě ekabe.

⁵ O diyaki na prist pâkâ, o hwi ja Hěrod y‘ upolo mua Judia, dina na Sakaraias, ua njamba ea Abaia: mwad‘ ’aju a diyakindi ua bana ba Erân, dina jaju i diyakindi Ilisebět.

⁶ Na bâ babale ba diyakindi bayam‘ o boho boa Anyambě, ba tamwaka na belekanako na sale ja Upangiyi jěhěpi ba diye na njěnji.

⁷ Bu diyaka na mwana, ’kabojana Ilisebět a diyakindi ekomba; na bâ běhěpi ba diyakindi batodu.

⁸ E diyakindi, o mâ‐a hakidi ebano ’aju ya prist o boho boa Anyambě hohonganěngo na njamb‘ ’aju,

⁹ hohonganěngo na ihadi via ebano ya prist mběi ’aju e diyakindi itumba ja uyâmbâ o mâ‐a ngakiyedi o těmpěl ya Upangiyi.

¹⁰ Ka ebimba ya bato yěhěpi ya diya e kalakiya o bwebwe o ’gombe y‘ uyâmbâ.

¹¹ Ka enjěl ya Upangiyi ya pumiya mâ těměngo o pělě ’a ’nâ ’yomi ya âlta y‘ uyâmbâ.

¹² O Sakaraias a yěni yâ, a yěněki njuke, ka jângâ ja bweya mâ.

¹³ Ndi enjěl e vâki na ju, na, O bangake, Sakaraias: ikabojana ikaliya jâvě i yokanindi; na mwad‘ ’âvě Ilisebět a ka jand‘ âvě mwa‘ momo, na nâvě oa vangidě mâ dina jaju na Jân.

¹⁴ O ka diyi na mbya n‘ upeyo; baitě ba ka peyandi n‘ ijawě jaju.

¹⁵ Ikabojana a ka diyandi boněně o boho boa Upangiyi, à mâte ivě tombe maku makolo; a ka diyandi londango n‘ Ilina Iyam‘, oviya ihuhu ja nyangwě.

¹⁶ A ka ’ludi bana ba Israěl baitě o Upangiyi Anyambě ’abu a jadi.

¹⁷ A ka ’land‘ o boho boaju n‘ ilina na ngudi ya Ilaias, ka ’ludě melema mea ba hangwě o bana ba jadi, na ba ha yokakiya o iyowě ja hohonganěngo; ka kenje bato kokěngo na Upangiyi.

¹⁸ Ka Sakaraias a vâ na enjěl, na, Mbi ka yowě lě ekae na ove? ’kabojana mba běndi utodu na mwad‘ ’amě a toduwendi na hwi jaju.

¹⁹ Ka enjěl ya yavwana ka yâ‐ya vâ na ju, na, Umba ndi Gebriěl e těměkě o pwanja ya Anyambě; mbi ma lomwěndi ka kala na nâvě, na ka levid‘ âvě sango t‘ iyam‘ ekadi.

²⁰ Ndi, hilakěte, o ka diyandi emukumuku, o diye na ngudi ya kala, kabo buhwa boa belombo těkabe bo ka hamě, ’kabojana ou kamidě ndaga jamě, i ka hamě o ’gombe ’abu.

²¹ Ka bato ba venga Sakaraias, ba ka mamaka eaju e bembanakidi o těmpěl.

²² O mâ‐a pumidi, a yâlě o kala na bâ: ka bâ‐ba yowě na a yěnindi ehihila o těmpěl; ikabojana a pěpěkidi bâ, ndi a kale.

²³ E diyakindi, o hwi ja ehavu ’aju i diyakidi i makiyate, ka mâ‐a timba o ndabo ’aju mětě.

²⁴ Hwi tědině kělěbě ka mwad‘ ’aju Ilisebět a kaha, ka mâ‐a kutamiya ngândě itano, na,

²⁵ Kakana ndi ka Upangiyi a hadi n’ umba o hwi jaju i ’mbuwi ’mba, ivěngidě j‘ ihubiya jamě o bato ba jadi.

²⁶ O ngândě y‘ utoba ka enjěl Gebriěl ya lomwě oviya Anyambě a jadi o mboka ya Galili, dina, na, Nasarět,

²⁷ o itângâ vya ndabo ya Devid i jadi, i diyakidi nyimwěngo na momo dina ja Josěf; dina j‘ itângâ i diyaki na Meri.

²⁸ Ka enjěl ya pâ o j‘ i jadi, na vâkâ, na, Mbolo, âvě o jadi hekudwěngo nangudi, Upangiyi a na nâvě: o n‘ ibâtâ o bajo ba jadi.

²⁹ O j‘ i yěni mâ, ka jâ‐ja yěně njuke na ndaga jaju, ka mâ‐a pikiliya na jângâ tě ja mbolo ekadi i ka diya lě na.

³⁰ Ka enjěl ya vâ na jâ, na, O bangake, Meri: ‘kabojana o duwindi ehekwě o Anyambě a jadi.

³¹ Ndi hilakěte, o ka kahandi jemi, na nâvě oa ja mwa‘ momo, o ka vangakidě dina jaju, na, JISUS.

³² A ka diyandi boněně, a ka tubwi, na, Mwana ua A did‘ oba mětě; Upangiyi Anyambě a ka vi mâ eka ya hangwě Devid:

³³ a ka pangiyandi ndabo ya Jekâb egombe yěhěpi; ipangiya jaju ja diye n‘ ihuku.

³⁴ Jâ ndi ja Meri ja vâ na enjěl, na, Ekae e ka diya lě na, o mbi ha yowěte momo?

³⁵ Ka enjěl ya yavwana ka yâ‐ya vâ na ju, na, Ilina Iyam‘ i ka pândi âvě o jadi, na ngudi ya A did‘ oba mětě e ka pugand‘ âvě: ovaně nd‘ o elombo tě ya holi eâvě e ka jayě yeně e ka tubwě, na, Mwana ua Anyambě.

³⁶ Ndi hilakěte, mwan‘ ’a ’kad‘ ’âvě Ilisebět, a kahindi mwa‘ momo o utodu muaju; ekaně ndi ngândě y‘ utoba na a ma tubakwě na ekomba.

³⁷ Ikabojana o ’bě na ’lombo e ka měndě e hame na Anyambě.

³⁸ Ka Meri a vâ, na, Hilakěte uhayi mua Upangiyi mua mwajo; e diyake n‘ umba hohonganěngo na ndaga ’vě. Ka enjěl ya věngěmě o mâ‐a diyakidi.

³⁹ O jâ hwi tědině ndi ja Meri i umwakidi, ka mâ‐a hadividě o vala o ’hiki y‘ ukodi, o mboka ya Juda;

⁴⁰ ka mâ‐a ngiya o ndabo ya Sakaraias, ka mâ‐a homa Ilisebět.

⁴¹ E diyakindi, o Ilisebět a yoki mbolo ya Meri, ukěkě u ka sodaka mâ o ihuhu; ka Ilisebět a londa na Ilina Iyamu.

⁴² Ka mâ‐a kala na joi kehěngo, na vâkâ, na, O n‘ ibâtâ o bajo ba jadi, ibâtâ na ebuma e jad‘ o ihuhu jâvě.

⁴³ Ekae e viye lě ’mba na ove, ya nyangwě y‘ Upangiyi muamě e pâdi o ’mba‐mbi jadi ekae?

⁴⁴ Ikabojana hilakěte, joi ja mbolo ’âvě ja běte i yokanaka o matâ mamě, ukěkě u ka sodaka ’mba o ihuhu na mbya.

⁴⁵ Ibâtâ na mâ‐a kamakidě: ’kabojana belombo tě be langwakudwě mâ o viya o Anyambě a jadi be ka hamandi.

⁴⁶ Ka Meri a vâ, na, Ilina jamě i kenakě Upangiyi,

⁴⁷ N‘ ilina jamě i peyaki na Anyambě Uhungini muamě.

⁴⁸ Ikabojana A tanginindi ihubiya j‘ uhayi muaju mua mwajo: ’kabojana, hilakěte, oviya okava magona měhěpi ma ka tube ’mba, na, ibâtâ.

⁴⁹ Jambojana A di na ngudi A ’mba hango belombo beněně; na dina jaju i ndi holi.

⁵⁰ Ngěbě ’aju e nd‘ o ba bangakě Mâ oviya mbamba nala mbamba.

⁵¹ A levidi ngudi na enâ ’aju; A vanjanganiděndi b‘ iduba na iyebiyedi via melema meabu.

⁵² A hubidi ba ngudi oviya bediya beabu, ka mâ‐a betidě ba hubiyango.

⁵³ A vulidi ba nja na belombo beyam‘; A timbakě benami naně.

⁵⁴ A hanindi uhayi muaju Israěl, iyongidě ja ngěbě ’aju;

⁵⁵ Ka Mâ‐a kalaki na ba hangwě bahu, na Ebraham, n‘ ibângâ jaju egombe yěhěpi.

⁵⁶ Ka Meri a diya na ju ba ngândě ilalo, ka mâ‐a timba o ndabo ’aju mětě.

⁵⁷ Nandi egombe ya Ilisebět y‘ ijadi ya hohonganěngo e diyaki ya pâ; ka mâ‐a ja mwa‘ momo.

⁵⁸ Ka ba ma bakaka na ju, na bana ba ’kadi baju ba yoka nyanga ya Upangiyi e levakidě mâ ngěbě ’aju ’něně; ka bâ ba peya na ju.

⁵⁹ E diyakindi, o buhwa boa logwambi, ka bâ‐ba pâ ka hěbě mwana; ka bâ‐ba vangidě mâ dina ja hangwě, na, Sakaraias.

⁶⁰ Ka nyangwě a yavwana ka mâ‐a vâ, na, Hanga nonaně; ndi a ka tubwi, na, Jân.

⁶¹ Ka bâ‐ba vâ na ju, na, O ’bě na ijawě jâvě i di vangamango dina těkadi.

⁶² Ka bâ‐ba ha hangwě ndembo, na, a vahaka lě mâ a tubakwě na.

⁶³ Ka mâ‐a uwa elombo e lěnděněkwě, ka mâ‐a lěndě, na, Dina jaju ndi Jân. Ka bâ běhěpi ba mama.

⁶⁴ Ka udumbu muaju mu‐a bumuwa o mbenjě pâkâ, ka emi ’aju ya hulama, ka mâ‐a kala, ka mâ‐a bendě Anyambě.

⁶⁵ Ka jângâ ja bweya ba diyakidi ulwaniděngo běhěpi: k‘ ivâdi těkadi jěhěpi ja hamana o ’hiki y‘ ukodi ya Judia yěhěpi.

⁶⁶ Ba yokaki jâ běhěpi ba nangakidi jâ o melema meabu, na, Mwa těkaně a ka diya lě nja jângâ‐ě! Enâ ya Upangiyi e diyaki na mâ.

⁶⁷ Ka hangwě Sakaraias a londa n‘ Ilina Iyamu, ka mâ‐a sâkâ, na,

⁶⁸ Ibâtâ na Upangiyi Anyambě ya Israěl; ikabojana a lumbiyendi, ka Mâ‐a vanguwa bato baju,

⁶⁹ A umudi hwě ibomba j‘ iyonga o ndabo y‘ uhayi muaju Devid;

⁷⁰ Pani ka Mâ‐a kalakidi n‘ udumbu mua basâki baju ba hole, ba diyakidi oviya jali ja he:

⁷¹ Na ovaně nd‘ o hwě ho ka yongě oviya ndoba jahu, na oviya enâ ya ba lonakě hwě běhěpi;

⁷² Ihaya ja ngěbě e yohanakudwě ba hangwě bahu, na o iyongidě ja panga ’aju e di hole;

⁷³ Ikana jaju i kanaki na hangw‘ ’ahu Ebraham,

⁷⁴ Na, A ka vi hwě, oningě hwě věngěměngo o ’nâ ya ndoba jahu, ho ka hakiya Mâ ho bange,

⁷⁵ Na hole na bwam‘ o boho boaju, hwi ja eměnâ ’ahu jěhěpi.

⁷⁶ Na nâvě mwana, o ka tubwi, na, usâki mua A did‘ oba mětě: ’kabojana o ka ’landi o boho boa Upangiyi ikenjě ja njeya jaju;

⁷⁷ Ivě ja bato baju iyowě j‘ iyonga na ivěngidě ja bobe boabu,

⁷⁸ Na ngěbě ya Anyambě ’ahu ebâbu; yâ ndi ya majenjina ma buhwa e lumbi hwě oviya ’ba,

⁷⁹ Ivě ja ba didi o ivitit‘ na ’dingihě y‘ iwedo bwe, itumbwana ja matambi mahu o njeya ya jonga.

⁸⁰ Ka mwana a tombuwa, a ka yâdâkiyě n‘ ilina, a diyakind‘ o nginga kab‘ o buhwa boaju bo levakudwě Israěl.