Jemisi 5 - Panga ea Kya 1895

¹ Na we, inyi ba kenango, yakani mbembe, n‘ inyěni o ka hilwakani, o nyanga ya maguga ma ka pâyě inyěni o jadi.

² Ungumba mwanyu u bândi, na kěmbâ janyu i jewudwi na nyělělě.

³ Hika anyu eveyu na etano i hiniyendi na nyanga, na nyanga abu nd‘ e ka diyě tali anyu, na yâ e ka ji mehoni myanyu o mâ na veya. O ndini kumiděngo hika ta o hwi ja madikanido!

⁴ Umbwakiyateni, ivě ja bajanji ba janjakidi myanga myanyu, ijanyu i tatidi na bo jakiya, ka jâ i dakakiyě, na medaki mya ba benjakě me ngiyendi o matâ ma Upangiyi mwa ndumba.

⁵ O diyendini n‘ usevo o he, o didini n‘ igeva, o bombindini melema myanyu o buhwa bwa iweywě.

⁶ O kwehiděndini n‘ inyěni weyango wa hohonganěngo na mwa hěměněkiyě inyěni.

⁷ Diyaki nandi n‘ iyika, bana b‘ ina, o iviya j‘ Upangiyi. Umbwakiyateni, Uliyi u vengakandi ebuma ya tâ ya he, na mâ a i yâ n‘ iyika itě, na la mâ a ka pahiyě mbwiya ja boho, na ja mbuhwa.

⁸ Yikaka tepě inyěni, yâdâkidi bebumulema byanyu; ’kabojana iviya j‘ Upangiyi i bakamakandi piyělě.

⁹ O tatanakeni bana b‘ ina, banga wa kwehwěni; umbwakiyateni uyěkidi u teměngo o jâmbě.

¹⁰ Bana b‘ ina, nângâkâni basâki ba di kalango na dina j‘ Upangiyi, ka mbuna y‘ iyěně ja etuniya n‘ iyika.

¹¹ Umbwakiyateni, ho langaki bâ ba hindinakě na ba n‘ ibâtâ. O teni yokango iyika ja Jobu, n‘ inyěni yěněngo ihuku j‘ Upangiyi i hukakidě, na Upangiyi a na nděkěbědi ite mětě, na ngěbě ebabu.

¹² Ndi, bana b‘ ina, wa na byěhěpi, o kanakeni, tombě na hěvěni, tombe na he, tombe n‘ ikana t‘ ikana, ndi e eyanyu e diyake e, na nyawě anyu e diyake nyawě, banga wa kwani o makwa.

¹³ O na moto a yěněkě etuniya inyěni o jadi? a kalakiya. O na moto a n‘ ulema mbya, a tumbwakidě lembo.

¹⁴ O na moto a běkě inyěni o jadi? a ndakidě batodu ba ikando, na bâ ba ka kalakiya opěl‘ aju, ba hakiya mâ mavulě na dina j‘ Upangiyi;

¹⁵ n‘ ikaliya j‘ ikamidě i ka yongěndi ubědi, na Upangiyi a ka mudi mâ; na oningě na a hango bobe, bo ka yidwi mâ.

¹⁶ Měměněkiyěni ipulě, o ka kalanakiyani, ovaně nd‘ inyěni o ka yongwěni. Ikaliya ja moto wa hohonganěngo i na ngudi etě mětě o iha jaju.

¹⁷ Ilaiasi a diyakite moto w‘ itingidi pani ka hwě, nd‘ o mâ a kalakiyedi na jayi na mbwiya e nâke; na yâ ya bo nâkâ o he ulingo mwa mepuma melalo, na ngândě utoba.

¹⁸ Ka mâ a kaliyapě epâkwě njo, ka hěvěni ya nâdě mbwiya, na he na yěkěměkě bebuma byaju.

¹⁹ Bana b‘ ina, oningě moto o inyěni a jadi a humama oviya pâkwě‐pâkwě, n‘ umbâkâ a ’ludě mâ,

²⁰ a yowakě na a ’lwakidě mot‘ ube oviya ihuma ja njeya aju, a ka hunginandi ilina oviya iwedo, na mâ a ka dibandi ebumbu ya bobe.