Jemisi 4 - Panga ea Kya 1895

¹ Beduka na bevâvâlâ be jadi o inyěni o jadi be vakiya lě ove? hanga omě okava, o bedokuwědokuwě be yanakě na bevande byanyu?

² O dokwakandini, ndi o běni na; o weyanakandini, n‘ inyěni o vahakani na jayi, nd‘ o yâlě o pahiyani, o vâvâlânâkiyěndini, o yanakani, ndi o bi pahiyango, ’kabojana wa uwakani.

³ O uwakandini, ndi wa pahakiyani, ’kabojana o uwakandini, ndi na njeya ya lěngěměngo, na ovaně nd‘ inyěni o ka mbanidi yâni o bedoko byanyu.

⁴ Inyi ba ihonde, wa wěni na ugangano mwa he u na Anyambě bweka? Wěhěpi a di mboyi ya he a pangaki mâ mětě ndoba ya Anyambě.

⁵ O ndini n‘ ipiviya ja na Ilěndwě i vâkândi o naně na, Ilina i longakě na hwě i n‘ ivaha i tumbwanakě o ivina?

⁶ Nd‘ a věkěnd‘ ehekwě wa: ovaně nd‘ o mâ a vâki na, Anyambě a hěměněkiyěndi ba bweyakě maměmě, nd‘ a věkě ba di hubiyango ehekwě.

⁷ Hubakidi nyolo janyu o Anyambě a jadi. Hěměněkiyě ukuk‘ ube, vâkâna a kweyiend‘ âvě.

⁸ Bakamakani o Anyambě a jadi baka, vâkâna a bakamindi o hwě ho jadi baka. Tanakěni benâ byanyu inyi bato babe: wa nyěvidi bebumulema byanyu inyi ba melema mebale.

⁹ Yěněkěni majili, o ka hilwakani, o ka yakani mbembe; beyâ byanyu e ’lwakě o mbembe, na mbya anyu o ngěbě.

¹⁰ Yěkěkidě nyolo janyu o mihâ m‘ Upangiyi, vâkâna a betiděnd‘ inyěni.

¹¹ Bana b‘ ina, o kalanakiyeni bobe. A kalakiyě mwana nyangwě bobe, na mâ a yěkěkidě mwana nyangwě, a kalakiyandi elekanako bobe, na mâ a yěkěkidě elekanako; nd‘ oningě hwa yěkidě elekanako, o bě uhayi mwa elekanako, ndi uyěkidi.

¹² Uvěyi mwa belekanako u t‘ umbâkâ a ka yâlě o yongě na o weya; âvě le nja a yěkidě upâkwě.

¹³ Na we, inyi ba vâkě na, O buhwa tombe vakě mbya, ho ka valandi o mboka těkaně, na hwě hwa diya ovoně upuma, ho janjaka ukita, ho jakiya nyeno;

¹⁴ o inyěni o ha wěni e ka hamě vakě. Ikabojana eměnâ anyu e lě ndě? E nd‘ engumbe mětě e pumakiyate egombe ehâlě, kwě na yâ ya hambuwa.

¹⁵ Ndi opělě ’pâkwě o lukakandi o vâ na, Oningě Upangiyi a bagina ho ka diyate mihâ na hwě hwa ha ekaye, tombe ekayeně.

¹⁶ Nd‘ o haka kětěkě na maduba manyu; ikětě ka vině vyěhěpi vi bobe.

¹⁷ Nandi a di yowěngo iha ja bwamu, na mâ a haye bwâ, bo bobe o mâ a jadi.