Jemisi 3 - Panga ea Kya 1895

¹ Bana b‘ ina, o diyakeni na baitě ba vahakě ehavu y‘ iyokwanidě ’kabojana o yowuděteni na ho ka pahiyandi makwa maněně wa.

² Ikabojana hwě běhěpi ho haka bobe na belombo beitě. Oningě moto a haka bobe na ndaga, mâ ndi moto wa hânjâbiyěngo, na mâ tepě na ngudi e pangakiyě nyolo yěhěpi.

³ Umbwakiyateni, ho vamaki bekěyi o medumbu mya kabala, na ovaně ndo jâ i ka yokiyě hwě, na hwě ho ’lwakidě nyolo abu yěhěpi ilwo.

⁴ Umbwakiyateni myalo mya metangani tepě, me jadi, tombe myâ kenakate nonaně, na myâ me hunjakwě na mepupě mekolo, ndi me ’lwakudwě na epepa ehâlě mětě iboko vya ngâwě vi pangakě vyěhěpi.

⁵ Yâ nyangatě te ya emi, mâ evande ehâlě nd‘ a kětěkě belombo beněně. Umbwakiyateni ekekeke eněně ya veya vihâlě vi ka dikidě!

⁶ Na emi a veya, he ya bobe; nonaně ndi ka emi e těkudwě o bevande byahu, na yâ ndi e bevakě nyolo yěhěpi, na yâ tumbaka ikângâ ja e di velwěngo yěhěpi, na yâ e yodakwě na veya vya hěli.

⁷ Ikabojana jângâ ja tito jěhěpi, na ja lonâni, na ja belombo be kulakě, na ja belombo be didi o manga, be vâtâkwěte, na byâ be vâtwěngo na bomwa moto;

⁸ ndi o bě na moto ka moto a ka vâtě emi, bobe bo ha panganakiya, ti na malě ma weyanakě.

⁹ Yâte eyahu e vambanakiyě Anyambě ibâtâ, ya Hangw‘ ahu mětě; na yâ te eyahu e hâkânâkě bato, ba velakudwě na ’gâlani ya Anyambě;

¹⁰ o udumbu tě m‘ umbâkâ te u pumakě ibâtâ na jâki. Bana b‘ ina, belombo těkabe bya lukaka o diya nonaně.

¹¹ O nyanga ya na tongo a pumakěndi o iboko te vya vyâkâ miba ma vâdu na ma nyanga?

¹² O nyanga ya na ele ya fig, bana b‘ ina, e te na ngudi e yěkěměkě bebuma bya âlivi, tombe ukâdi mwa ivě fig? Nonaně tepě o bě na tongo e kapumě miba mavâdu na ma nyanga.

¹³ A lě nja motwě w‘ iyowě na mâ londango n‘ ibweyidě inyěni o jadi? a levikidě o bodiya bwaju behavu byaju na hwě n‘ iyowě.

¹⁴ Nd‘ oningě o jadini o bebumulema byanyu ivinaniya ja jodi, na momano, o kětěkeni; o jowepěni pâkwě‐pâkwě.

¹⁵ Iyowě těkadi ja hubaka oviya oba, ndi i ja he, ja nyolo, ja ukuk‘ ube.

¹⁶ Ikabojana o ivinaniya na momano be jadi, ngwangwalani na ehadi ebe yěhěpi e nd‘ omě.

¹⁷ Ndi iyowě ja oba i bo takandi na kěngěngě, běngě jonga, hwě, bobâbu n‘ ibâbiyě, i na ngěbě na bebuma beyamu, iyabana i diye, inoka i diye.

¹⁸ Na ebuma ya hohonganěngo e liyakwě na jonga na bâ ba hakě jonga.