Online Bible

Fêt 13 - Ŋwàklù Fùyèn Kàn Mù Fê (Cameron)

Ghɨt a bimena a Antiyòk tum Bànabâs ghê Sôl

¹ À hì mô yi yùŋtì ghɨt a bimena ye yi ndùku mô a Antiyòk, ghɨt ale mô atɨ̂n, fôktè tum à Fùyèn, ghɨ le mô sù chichà ha ghɨt a bimena. À ndùku mô Bànabâs nì Simùn a we ghɨ ndùku toŋte na à mò wùt wù Finana nì Lùsiyùs ma wù ben lumu yi lak yi Sìlên, nì Màniyèn a we wù tì ləma kwoka ghê bè fə̀n Helòd, a fê mô Sôl.

² À hì mô te ghɨna kokhe Yènfù, fê bama yi jwô, Yohnà Yulena ben jis ha ghɨna na, “Ghàn chwok Bànabâs ghê Sôl ma ghàn lem ma ghɨna hi nê fèt ye ghàn khɨŋa na ghɨna hi nê.”

³ À hì mô te ghɨna bama jwo jəm mîhìlò, ghɨna lem wu wô a Bànabâs a tû ghê Sôl jis na ghɨna yê hi nê fêt yi tɨni.

Bànabâs ghê Sôl fôktì Tum yì jùŋ a Sàbulùs

⁴ Yohnà Yulena chinhi Bànabâs ghê Sôl ni ghɨna chwo a yi tèk yi Sèlusiyà lye a ngwùk yen a Sàbulùs, yi mô atɨ̂n à jwò ma jwò ti jɨŋ kat yini.

⁵ Ghɨna ben tan yi tèk yi Sàlamìs a Sàbulùs lyi fôktì tum à Fùyèn a ndasu chintesu ghɨt a Jûs. Ghɨna ndùku mô ghê Jon Màk wu gbê gâmtè ghɨna.

⁶ Ghɨna fôktì tum yì jùŋ tohna yi lak afu metì yen tan yi tèk yi Bafòs yen wùt à Jûs wù fintena wùlè afû, a mô fòktì yì fə̂m, yet yi wuni mô Bà-Jisòs.

⁷ Wù ndùku mô sô Sejus Bulùs, a wùt we wù ndùku saka bâh à yi lak mu ghê, a mô wut tofa nâ jûŋ. Sejus Bulùs toŋa Bànabâs ghê Sôl na ghɨna bê fòkti tum à Fùyèn ha wûn.

⁸ Biyani wùt wu fintena mu we, a mô kəbi wûn we ghɨ tì bɨ̀nhe yet yi wuni hì toŋte yi jìs yi Gɨlìs na Èlimàs, wù tâhì Bànabâs ghê Sôl na kə ghɨna fokti tum yì jùŋ hi nì na wùt wù saka mu we boŋà bimi ha Jisòs.

⁹ Yohnà Yulena tihi Sôl we yet yi wuni ndùku mô kəbi na Bôl, wù ki yen nì wùt wù fintena atɨ̂n ni,

¹⁰ jis ha wun na, “Wò mò ni, mô kə nâ te deblì, kôŋà wi hi tè yena gha jûŋì nâ hakoh. Wo khə lumtu mùnàŋtu betu nâ tù jɨ̀m, mômhè hi tè jìs hi tê chwùtì na hamok we wù mò kum Bâba na à mô kə yi fə̂m.

¹¹ Bâba nè folò ngə̂k ha wò chîn ma wù ni ma wò fef, ma wò hi yena wi luktu hi tàn a wu yu wule.” Kə wu yu shyə baŋ a se wuna ghɨ fîn, wù hì gbê mômtè tu luk, khɨŋa wùt na wù hi gûbtè wûn.

¹² Wùt wù sakana mu we yu yi yikî kum Bâba fî yen gha ghe ghɨ gânà hì mô nì kani, bimi ha Jisòs.

Bôl ghê Bànabâs fôktì tum yì jùŋ a Antiyòk yi lak yi Bìsidiyà

¹³ Bôl yen ghɨt a wuna ghɨ gbena ghe ghê ghɨna ndùku gbê, lyi a ngwùk a Bafòs yen tan a yi tèk yi Begà, yi lak yi Bàmfiliyà. Jon Mâk de ghɨna afû kaha yen a Jèlusalèm.

¹⁴ Ghɨna lo a Begà kwok yen yi tèk yi Antiyòk a ye yi ndùku mô yi lak yi Bìsidiyà. Tuk wu laku ghɨt a Jûs bên, ghɨna yen lye a ndâ chìnti chwo ndokò a chyə̂.

¹⁵ Ghɨ taŋ a gha a Musìs a ŋwàklù yi sak nì ŋwàklù su fòktìsù chiksu, ghɨt ghe a ghɨ tihe gha a ndâ chìnti kaha jis ha ghɨna na, “Wana nê, ghàn hì kəta gha hi jìs hi gàmtè ghɨt ghɨ̂n, ghàn jis lò.”

¹⁶ Bôl lôtì shik a wô hi ni na ghɨna china moŋ, jis na, “Ghɨt a Isalì nì ghɨt ale ghe ghɨ kokhe Yènfù, ghàn yuti gha ye mu khɨŋa hi jìs.

¹⁷ Yèn fe a ghɨt a Isalì ngumle tî chwôk be ghɨt a Jûs ghɨ shyə, ni ghɨna hì dô kə ni wu tuk afa ghɨna ndùku chyə te wu tûm yi lak yi Ijìb. Yènfù tì fihi ghɨna yi lak yi Ijìb nì jyaka bəmana ghê fu kəta.

¹⁸ Fî faŋ hì gâmtè kwoka kə yi kwôk nì ghɨna yi lak yi sùsi wu lɨ̀m mkìk nâbi te ghɨna ndùku ngane funfu.

¹⁹ Fu tî bobhi lak tu sàmba a Kanàn lyi luk mu tê fo ha ghɨt a wuna na à mò wu ghɨna.

²⁰ Nâ gha mɨ ghɨ̂n à jɨ̀m tì gan atɨ̂n à wù lɨ̀m yi ghə yì kìk nì lɨ̀m mtân.” Yi bàm yi tɨ̂n Yènfù fo ghɨta na ghɨ hi tihe kwoka yê nì ghɨna. Ghɨt atɨ̂na hì saka kwoka nì ghɨna hi tàn a Samwèl wu tuk, fòktì wù chìk.

²¹ Ghɨt a Jûs mɨ ghɨ̂n tî jîs na ghɨ fo fə̀n ha ghɨna. Yènfù chwok Sôl, a wâ Kîsh, ma wù fwu a Benjamìn yi sah yi nda fo ha ghɨna. Wù sak ghɨna hi tàn a wu lɨ̀m mkìk.

²² Yènfù chwohi Sôl lem Defìt na wù hi saka ghɨna. Yènfù ki jîs a gha ghɨ̂n ni kum wûn na, ‘Mu ti yen Defìt a wâ Jesì a mô wut we mu kòŋà wù nè nê nâ gha à jɨ̀m ghe mu khɨŋa na wù ni.’

²³ Yènfù tî chwûnà na yi bè chwokalò wùt ma wù fwo a Defìt yi sah yi nda ma wù bònhi ghɨt a Isalì. Wùt wunâ mò Jisòs.

²⁴ À hì mô shyəma Jisòs ben, Jon Fo Mòlû, mô ma wù ti yiki ghɨt a Isalì à jɨ̀m na ghɨna kahi təm a ghɨna ma ghɨ fyi mòlû.

²⁵ À hì mô te Jon ne mihe fêt yi wuni, wù buf ha ghɨta na, ‘Ghàn kwàktè na mu mò nde? Mu wijə wùt we ghàn kwàktè na mu mò wunù. Wùt mu we bènà a mu yi bàm mu kpene wi hi yèntè gwusu wunsu wùsu.’

²⁶ “Wana noma, ghàn wana Ablàhâm nì ghàn tumu we wu mô afân ngumle kəbi Fùyèn, tum yì jùŋ yinâ yì bê nì bônì ha ghɨta ni mò ma ghɨ tum kə nâ ha ghàhnà.

²⁷ Ghɨt ghe ghɨ chyə a Jèlusalèm nì ghɨta ghɨna ghɨ sakana ndùku khə wi na Jisòs mò bònhì, fê ywo khɨle wi gha ghe fòktìsu chiksu ndùku nyàka lema na ghɨ hi taŋa a ghɨna tuk mù lak mù jɨ̀m. Ghɨna tî ni na gha ghe fòktìsu chiksu tì nyàka lema kum Jisòs kwok à kpen a ghɨna wu lûm, ghɨna ywi wûn.

²⁸ Nâbi te ghɨt mɨ ghɨ̂n tî chwûtè wijə gha ye Jisòs tì bobhe hi kpû ghɨna tî chyati Balèt na wù ni shyəma ghɨna ywi wûn.

²⁹ À hì mô te ghɨna nê mihe nâ gha à jɨ̀m ghe ghɨ tì nyàka a ŋwàklù Fùyèn kum wûn, jùmtìbàmsù wunsu lôtì chwohi gun yi wuni a kàkfùtàfù gûmàlò.

³⁰ Biyani Yènfù nî wù lôtì a yi kpû,

³¹ Wù chwûtì ngɨŋ à wûn nâ mu tuk ha ghɨt ghe ghê ghɨna tì lo a Galìlî amok kwok ben a Jèlusalèm. Ghɨna mô chîn hi tè fòktì kum wûn ha ghɨt a Isalì.

³² Ghàh mò chin hi fòkte tum yì jùŋ ha ghàn a mô yê Yènfù tì chwùne lema ha be ghɨt a Jûs ghɨ shyə, fu ti lunhi chwunu tɨnu ha ghàhnà.

³³ Chwùna mu wûn ti kwok kpên ha ghàh wana ghɨna, wu lum na fu tî nî na Jisòs loti a yi kpû, kə yi ghəl te ghɨ nyàka a kùmti a njàŋ àtɨ̂n a ŋwàklù sù njàŋ na, ‘Mu ti lyi wò ha mu wan, hi yìmì lân, mu nè hì mô bâ.’

³⁴ Yènfù ndùku mô ma fu ti jis na fu bè kaha lôhèlò Jisòs a yi kpû ma wù tê fwɨ̀ jə̀ atɨ̂n à yì sì. Fî jis na, ‘Hamok mu nè folò bònhì mì yì yulena ha ghàn a ye mu tì chwùne ha Defìt.’

³⁵ À ni kəbi gha ye ghɨ fe nyaka a wu lùk wu ŋwàklù Sù njàŋà ale na, ‘Wò nè de wijə gun yi wùt wâ wù fètana wù jùŋ na yi fwɨ.’

³⁶ Ghɨ tà tì nyak jə kum Defìt beka wù tî fet kwok a wûn wu tuk kə nâ te Yènfù khɨŋa ki kpû ghɨ gûmà wûn bakha wûn a be wuna ghɨ shyə a ngwùŋ, gun yi wuni fwɨ̂.

³⁷ Biyani ghɨ tì nyak kum wut we Yènfù che ne wù lôtì a yi kpû, wun wu wunu tê fwɨ̀.

³⁸ Wana noma, ghàn hi khə hamok na, Yènfù lèhèfo gha ghana ghɨ be kum kə yi gha ye Jisòs mɨ wuna tì ne, a mô yi gha ye mu jîsà ha ghàn chîn.

³⁹ Yi ni chwùtè na à bimi nâbi nde ha wûn, ma wù bonhi wûn a wun a gha be. Sak yi Musìs wi hi bònhè wût.

⁴⁰ Ghàn hi tôknè na kə gha yîn be gan ha ghàn a fòktìsù chiksu tì nyàka ni. Ghɨna tì nyak na Bâba Yènfù jis na,

⁴¹ ‘Ghàn ghɨ̂n a ghàn jîsà wijə a jûŋ ni kum gha ghe mu jìsà. Ghàn yuti! Ghàn bê hì kante kə gha atɨna ma ghàn bê kputi beka mu nè fêtì ha ghàn chîn, ghɨ fê fôktè banhe gha mi yîn ghàn bime wi’”

⁴² À hì mô te Bôl ghê Bànabâs hì fwo hi lò a nda chìnte afû, ghɨta shìki chyatî na ghɨna bê kahà ben wu tuk wu lak wu benanu ma ghɨna fôktè kpenhi gha kum a gha ghe ghɨna fòktè ni.

⁴³ À hì mô te ghɨta jyàhe a ndâ chìnti, ghɨt a Jûs jûmtì yen nì Bôl ghê Bànabâs dô kə ni. Ghɨna ndùku mô nì tumu wule mô ma ghɨna ti kahi hì kəta bimî ghɨt a Jûs. Bôl ghê Bànabâs chyati ghɨt ghe ghê ghɨna ndùku mô na ghɨna lem kə təm a ghɨna atɨ̂n à yì tòknà yi Fùyènì.

⁴⁴ Tuk wu laku ben kpên ghɨta lanti kə ni hi fwu a yi tèk afû nâ à jɨ̀m hi bè ywo gha Fùyènì.

⁴⁵ Biyani ghɨt a Jûs ale yen te nôn atɨ̂nà dò, ghɨna lôhì a ghə̀k hì chìhè gha ghe Bôl ndùku jîsà, fê sùlè wûn.

⁴⁶ Biyani Bôl ghê Bànabâs fî jìs yen kə ashyə̂ na, “Yi chehì jwôfà na ghàh fokti tum à Fùyèn ha ghàn ashyə̂ kəbi te ghàn tunhe hì chwûtì na ghàn kwoka kpene wi hi bè khɨte chyənà ye yì bè mê wi, ghàh dè ghàn chîn hi yèn ha tumu.

⁴⁷ A ni gha ye Bâba Yènfù tì jìsa fo yi sâk ha ghàh. Wù tì jis na, ‘Mu nè nê ma wò hi mô te yi bân ha tumu hi nì na ghɨt à jɨ̀m a mbyî bon kum wò.’”

⁴⁸ Tumu yu gha tɨni ni, hì saŋlê nâ haŋaŋ jis na, “Tum à Fùyèn yì jùŋ bəmalò!” Ghɨt a dona bimi ha Bâba Jisòs, a mô ghê Yènfù tite na ghɨ hi kəta chyəna ghe ghɨ bè mê wi.

⁴⁹ Tum à Bâba waŋ yen kə yi lak yê yì jɨ̀m.

⁵⁰ Biyani ghɨt a Jûs mu ghê nêkhì ghɨta chika yi tèk afû nì ywena te ghê ghɨna ndùku ngumle Yènfù, na ghɨna fo ngə̂k ha Bôl ghê Bànabâs, ghɨt mɨ ghɨ̂n jum fihi ghɨna yi tèk afû.

⁵¹ Ghɨna bukti chyâkhì wu bût a ghɨna wu wù hi chwùtì na ghê ghɨna ti mî, lo yen yi tèk yi Ìkonìyùm.

⁵² Jùmtìbàmsu Jisòs a Antiyòk faŋ yi bàm hì saŋle nâ jûŋ Yohnà Yulena tihe ghɨna.

« Předchozí

další »

Následuj nás:

Sponzorované odkazy

Reklamy