Online Bible

2 Timotì 1 - Ŋwàklù Fùyèn Kàn Mù Fê (Cameron)

Bôl chinhi toŋtînì ha Timotì

¹ À nyak mu Bôl, ŋwàklù yina ha wò a Timotì. Mu mô wut à tum wù Klistù Jisòs ma à chwok Fùyèn. Fu chwok mu na mu fokti tum yì jùŋ kum chyənà ye a yi bè mê wi kə te fu tì chwùne. Chyənà mi yîn mô a wu yu afa ghàhnà mò a kak à mòk nì Klistù Jisòs.

² Timotì, wâ mù wù kòŋ, Yènfù, a mô Bì, ghê Klistù Jisòs, Bâba ghàhnà, chwuti təm a wuna ghɨ jûŋà ha wò nì kwohi seni, nì yutìnì.

Bôl fo àyòŋnà ha Yènfù kum Timotì, fî jəm na wù khɨti təm a ta

³ Mu fo àyòŋnà ha Yènfù njwo wò fêtà ha wûn nì kwâktì yi yuleni kə te bom ghɨ̂n ndùku fêtà. Mu jə̂mà ha wò kə yû mù jɨ̀m, yità wi hi toŋte yi yet ya ha Yènfù a mu yi tɨ̂nà yì jə̀m.

⁴ Mu kwâktè te wò ndùku jyê, mu hì kôŋà nâ a jûŋ hi yen a wò shyəma yi ni, ma mu hi saŋlê.

⁵ Mu baha kwâktèlò nki yi bimî hamok ye a wò kəta ha Klistù, a mô kə yi bimî ye a Lôs a nè ni wâ ghe Yunìs a ni wâ ndùku kəta. Mu khə hamok na wò kəta kə yi bimî mi yê.

⁶ Kum gha mi yîn, mu wu hì yɨ̂ŋtè ha wò na wò kahà kwakti fo ye a Yènfù tì fo ha wò te mu tì lèma wo a wò a tû

⁷ Mu jìsà ni beka Yènfù tà tì fo jə yohnà a fanana ha ghàhnà. Fu fo yohnà na ghɨ hi nê ghàhnà kəta təm a ta, kôŋà ghɨta, fê khə hi khɨte ngɨŋsu ghàhnàsu.

⁸ Yi ni chwùtè na wò kəta wi hi tè wumî hi fòktì kum Bâba ghàhnà makə hi chwùtì na wò khəlò mu te mu mò a ndâ chyâk beka mu bime ha Klistù. Mu jîsà na wò bɨlà lyi jyak ghe a Yènfù fo ha wò, ma wò hi mô nì fati wùni hi yena ngə̂k ye a mu mò atɨ̂n kum tum yì jùŋ.

⁹ Yènfù ti bônhì ghàhnà ni na ghàhnà hi mô a ghɨt a wuna. Fu tà tì ni ni beka ghàhnà nè gha yi jûŋì yile ha wûn. Fu tì ni kə ha wun a ngɨŋ kum təm a jûŋà. Fu ti lêm nâ shyəma mbyî yimi, na wù nè nêlò gha mɨ ghɨ̂n tohne a Klistù Jisòs hi chwùtì təm a wuna ghɨ jûŋà.

¹⁰ Chin te à hì mô ma wù ti chwûtì təm a jûŋà mɨ ghɨ̂n wu lum na Klistù Jisòs, Bònhì ghàhnà tî bên. Wù ti nî kpû hì fê kəta wi jyaka kum ghàhnà, yiki tum yì jùŋ hi nì na ghàhnà hi khə chyənà ye a yì bè mê wi.

¹¹ Yènfù ti chwok mu na mu hi mô wut à tum, fôktè tum yì jùŋ mi yîn, fê yike ghɨta.

¹² A ni gha ye a mu yena ngə̂k kum yì yîn, biyani wume wi beka mu khəlò wùt we a mu bime ha wûn khə na wù tòknèlò nì mu hi tàn wu tuk wu gokhenu.

¹³ Fati khɨti hamok mi yìna a mu yike wò ni ma wò hi boŋa yike ghɨta. Wò shìki nê gha mɨ ghɨ̂n, wo fati khɨti bimî ya nì kôŋ ye a ghàhnà kəta ha Klistù Jisòs.

¹⁴ Fati khɨti gha a jûŋ ghe a ghɨ tì fo ha wò nì jyak ghe Yohnà Yulena ghe a ghɨ mô a ghàhnà fùtɨ̂n fo ha wò.

¹⁵ Wò khəlò na nâ ghɨt a bimena ghe a ghɨ mô yi lak yi Esiyà à jɨ̀m ti tet de mu. Nâ Fìjelùs nì Hèmòjenès ti boŋ têt.

¹⁶ Mu jə̀mà na Bâba chwuti seni kwolani ha ghɨt a Ònesfolùs yi sah yi nda beka wù che ni mu hì saŋle kə ni. Wù chehì wume wi na mu mò wut à ndâ chyâk.

¹⁷ Wù tì ben tan a Lûm kə wu yu, gbi khɨŋ kə mu ni, yen mu.

¹⁸ Mu jə̂mà na Bâba bê chwuti seni kwolani wuni ha wûn wu Tuk wu gokhenu. Nâ wò khəlò te wù ndùku gâmtè mu a Efisùs.

« Předchozí

další »

Následuj nás:

Sponzorované odkazy

Reklamy