JOSUWE 24 - Boy Lonana

Josuwe tok suu Israelna halaŋ hu Sekem

¹ Josuwe tok njaf suu Israelna ay egem halaŋ halaŋ hu Sekem. Nam yi suu ŋgolo suu fok suu Israelna ay halaŋ halaŋ, yi muli masisina ay halaŋ halaŋ, yi suu kaɓakŋa ay halaŋ halaŋ, yi suu li sunda ŋgolora ay halaŋ halaŋ lay. Asi tok tasi halaŋ fok Lona.

² Josuwe di suu toki halaŋŋa ana, «Gola Yawe, Lo ma vi suu Israelna, di ana, somoyogi ay jew cuki ni ŋgoo lumma ii ma hiniŋŋa. Terak, ma bu gi Abraham, u Nakorna asi ay jew sunni loogi suu daŋŋa.

³ An yagi bugi ŋgolo Abraham ay ki ŋgoo lumma ii hiniŋŋa an tuɗum ki hu mbassa Kanaanda halaŋ, an zulum njafam cocoo, an ɦam goona ni Isaak.

⁴ An ɦal gorra maŋ Isaakŋi Yakob u Ezaw. An ɦal mbassa kay ɦinira Seirra maŋ Ezaw, Yakob u goryom halaŋ hin tuɗ ki hu mbassa Egiptera may.

⁵ Ŋgoo dagan an hin sun gi Moiz u Aaron an ci mbassa Egiptera u sun manda an laɗta, asi casi ci ci ni, hin cukugi ay ki dukusiya.

⁶ An cukugi somoyogi ay ki hu Egipte ta ta mba tewesi ki fun mbo lum ma ŋgolna agi mba tew ki huwa. Suu Egiptena dikigi u somoyogi ay babaa mba tewesi ki fun mbo Lum ma Cerewna u kulumi suu pupusna u suu duu suu kulumina lay.

⁷ Somoyogi tii kolo u delesira eŋga eg Yawe, nam gasi ndufunda ki duk ɦoŋosi u suu Egiptena. Nam kuluɓ mbo lumma kay suu Egiptena. Irigi wi dlara an laɗ ay hu Egiptera halaŋ. Agi cuk ay ŋgoo bagi hu fulla basara bolow cocoo.

⁸ An mbaragi ay ki hu mbassa vi suu Amorna suu cuki doŋ lum ma Yurdanna keŋ ma hiniŋŋana, asi hin duu u agiya, an ɦagisina kiyo, agi tlasi mbas masira cuk ki huwa, an dikigi sina ki fokogi halaŋ halaŋ.

⁹ Balak ma goŋ Sipporna mul ma Moabma mbay a duu u suu Israelna nam sun kay Balaam ma goŋ Beorna ana nam mbay gagi vunna yagi tlena ki kagiya.

¹⁰ Na may an min ka a hum vun Balaambi. Nam hin paɗ vunum ki kagi ni paɗi na ɗow. An hin suɗugi ay ki komu.

¹¹ Agi hin taɓa lum ma Yurdanna mbay hu mbassa Yerikora. Muli suu hu Yerikona hin duu u agiya. Suu Amorna, suu Perizna, suu Kanaanna, suu Hetna, suu Girgasna, suu Hivna, u suu Jebusna, an ɦagisina ki ni halaŋ halaŋ.

¹² An sunugi lolo ma cona ha fokogi kay muli suu mbana, muli suu Amorna dikisi ha ki ni ka u kawi magiɗi, ka u mbuuruɗi lay.

¹³ An ɦagi mbassa agi loɓ ka kaɗira, ɦagi ɦoŋzi ŋgolo ma agi minim ka agiɗi layna, hu li ma agi cuk duk gugutluna u gu conona wanna, agi zaarasi ka agiɗi lay, ni agi ka tasi vuɗusiya.»

Josuwe gaɗ suuna a asi sun Bu Suuna

¹⁴ Josuwe hin gi mamma hu di ana, «Cemi wanda ni agi lagi ndaa Yawe sunummi namu, u ndaana u huu ma jivina u ɗegeera may. Cukugi loogi suu somoyogi sunusi ay ŋgoo lumma ii hiniŋŋana kiyo u suu ay kosi hu Egiptena lay. Sunugi ni Yawe.

¹⁵ Lini ka irigi jivi a sun Yaweɗi ni managi sa ma agi a sunumma kiyo, lini loogi suu vi somoyogi suu asi goɓosi ay ŋgoo lumma ii hiniŋŋa na kala, lini loogi suu vi suu Amorna hu mbassa agi cuki huruɗ cemi wanda kala ni. An u ziin halaŋ ami sunni Yawe.»

¹⁶ Suu halaŋŋa hoŋ dira ana, «Ҥawaa, saara hin Yawe ki a sun lo ma daŋ na ɗowra ka hurumiɗi.

¹⁷ Kay Yawe ni Loomina, nammi sa ma taɓammi ay ki kolona, ami u somoyomi halaŋ ay ki hu mbassa Egiptera, buɗumi ay ki hu mbaɓura. Nam li dlara mbuɗ mbuɗta ŋgolora irimi coco ko wandara na. Nam golomi ay hu voɗta fiyekka wanda halaŋ, golomi ay duk suu ami jak ay dukusi cana halaŋ.

¹⁸ Yawe dikimi suuna ha ki fokomiya, suu Amorna suu li cuki hu mbas ndaɗtana. Ami lay ami hin sunni Yawe kay nam dew ni Loomina.»

¹⁹ Josuwe hin di suuna ana, «Agi ka ndak a sun Yaweɗi, kay nammi Lo ma teteɗna, ni Lo ma hurum ya cocona, nam ka ndak a siɓigi yaagira u dla coogiraɗi.

²⁰ Hu li ma agi noy Yawe kiyo hin sun lo ma daŋŋa ni nam hin mbuɗ um kagi lagi dla cora egegi may. Nam hin ŋgalagi kiyo hu li ma nam lagi dlara jivira vam egegi layna.»

²¹ Suu Israelna hoŋ di Josuwe ana, «Ҥawaa, kay ami a sunni Yawe.»

²² Josuwe di suu Israelna ana, «Agi ni a suu dikina kay tagira tok, kay agi man Yawe a sunumba ni agi daŋ may.» Asi hoŋ dira ana, «Ami ni suu diki kay tamina.»

²³ Josuwe hin dasi ana, «Cemi ni cukugi loogi suu ay hu mbassa daŋgana kiyo, tinigi hurugi ni kay Yawe na dew, Lona vi suu Israelna.»

²⁴ Suu Israelna hoŋ dira maŋ Josuwe ana, «Ami hin sunni Yawe, Loomina, ami hin humummi vunum doy hol.»

²⁵ Josuwe vi galamba u suu Israelna hu buu namma nam tinisi gaɗta u nera zeɗ zeɗ hu mbassa Sekemba.

²⁶ Josuwe ɓii boy namma halaŋ ga hu gaɗta vi Lonara. Nam tli ɦinira ŋgolla coloɗ kolo hu li namma u ŋgus guna fun zira vi Yawera.

²⁷ Josuwe di suu Israelna halaŋ ana, «Gola ɦini ndaɗta ni ɦinira hin diki kaygira kay ndaɗ hum dlara Yawe daɗta ki halaŋ hu li ma nam kaɓak u aygina. Ndaɗ hinni a vara diki kagira kay ana agi ka hin Loogina kiɗi.»

²⁸ Josuwe hin suu Israelna gegelay ni hoŋ hu mbas mamba.

Miɗ ma Josuwe miɗna

²⁹ Ŋgoo dagan Josuwe, ma goŋ Nunna, sa ma sun Yawena, miɗ ni eg basaɗamba kis duk doogora.

³⁰ Asi pammi hu mbas mamba ɦamba a jonora. Ni hu Timnat-Sera hu mbassa ɦinira cocora vi dee suu vi Efrayimma mbayaw keŋ ɦinira Gaassa na.

³¹ Hu li ma Josuwe ka iiri tuna suu Israelna sun Yawe ta ta miɗ mamma. U suu ŋgolo suu hin ka balamamma lay ni asi sun Yawe jivi cocoo. Suu may suu wi sunda mbuɗ mbuɗta Yawe laɗta ki u irisina halaŋŋi asi sun Yawe jiviya.

³² Sok Yosef ma asi yowom ay hu Egiptena ni asi mba pammi hu Sekem, ni hu sene ma vi Yakob ma nam gusum u silira kis ko goryoŋ Hamorna, nammi malaŋ mbassa Sekemba, pam sokommi hu mbassa vi goryoŋ Yosefna.

³³ Eleazar ma goŋ Aaronna miɗ may. Asi pammi kolo kay mbura vi gooromma Pinhassa li namma asi ɦamma ha ni kolo kay ɦinira hu mbassa vi Efrayimba.