JOSUWE 20 - Boy Lonana

Ҥoŋzi ŋgolo ma ŋgayra

¹ Yawe di Josuwe ana,

² «Aŋ di suu Israelna asi man ɦoŋzi ma ŋgayra ko ndal an dasi ay ki fun Moizza na.

³ Ni ɦoŋzi ma li ni sana ci maɗ wa ka u min mambaɗi ni nam ndak pii tuɗ ŋgay tam ki huwa. Ҥoŋzi ma ŋgolo namma hinni a li ma ŋgay suu ci maɗnana.

⁴ Sa ma ci maɗnana pii tuɗ hu zi namma ma ka egem tokŋa, tuɗ col vun grekŋa, cuɗ dlamba maŋ suu ŋgolo suu hu zi nammana. Suu ŋgolo asina hin vi sa namma ha egesi voo, ɦam li ma nam a cuk zina dukusina may.

⁵ Lini suu a sa sukul saasina cuɗum um ay lay ni asi ka ɦam ki masi oloɗi, kay ana sana paɗ kommi paɗiya, nam gaɗ ka a cambi, honi ka duk tasi jewɗi lay.

⁶ Nam li kaki hu zi namma gak gak ɓak mamma daɓ ki tuwa, asi kaam ɓak mamma ki fok suu ŋgolona. Nam juɓ ta ta mul ma li ɓivun ma asi vam ay fokomma, miɗ ki tuwa. Ŋgoo dagan sa ma ci maɗnana ndak hoŋ hu ɦoŋzi ma nam li ay huna kal hu ziim ma nam pii ha ki huna.»

⁷ Asi suu Israelna man ɦoŋzi ma Kedesna hu mbassa Galilera, hu li ma ɦinira cocona hu mbassa vi Neftalira, Sekem hu li ma ɦinira cocona hu mbassa vi Efrayimba, u Kiriat-Arba ta yaɗ ana Hebronda hu li ma ɦinira cocona hu mbassa Yudara may.

⁸ Suu ha ŋgoo mbo lum ma Yurdanna ii hiŋŋana tok eg Yeriko keŋ lumma Yordanna u meɗiina na ni asi manni Beser hu fulla ŋgoo bagiya, ni hu mbassa vi goryoŋ Rubenna. Ramot hu Galaad ni hu mbassa vi suu vi Gadnara u Golan hu Basanni hu mbassa vi suu vi Manasena may.

⁹ Gola ni li ma kaam ki kay suu Israelna u ŋgayagi suu dukusina, ɦoŋzi ŋgolo ma sana ci maɗna ay wa ka u min mambaɗi ni nam mba pii ŋgay tam ha ki huna. Na ni sa ma sa sukulna ka ndak a cam ki jew bay suu ŋgolo suu tokina a kaam ii ɓak mamma kiɗi.