JOSUWE 18 - Boy Lonana

Ɓorow u mbassa hinda ki maŋ dee suu hin kiɗisiyana

¹ Suu Israelna halaŋ tok tasi hu ɦoŋzina Silo, suu muli suu li ɓivunna u suu njun usina pi Mbutluɓ ma Tokka huwa, mbassa halaŋ hin ki ni masira.

² Dee suu taa kiɗisiya duk suu Israelna bay fi mbas masira joosina ki kay tasi tuwa.

³ Josuwe di suu Israelna ana, «Agi hin tuɗ kak hu mbas magira Yawe, Lo ma vi somoyogina, ɦagirara ni saɓa tuge?

⁴ Yowogi suuna ay u deeregi na hindi hindi an sunusi asi tuɗ gol yam mbassa ay ki na halaŋ halaŋ, goloɗ ay ki jivi ii a asi a lak hu a joosinara, hin hoŋ ay egen tani.

⁵ Asi ɓorow mbassa ki duk tasi na zeɗ zeɗ kiɗisiya. Yuda tli mbas mamba ii ma dalina na, goryoŋ Yosefna masira ni ii ma mbayawna na may.

⁶ Agi ɓiirigi ii mbassa ndaɗta ay ki na zeɗ zeɗ kiɗisiya, mbaaran ɓii ndaɗta ay tani. An hin mba lagi dew ma agi a ŋgaɓpa ni tani fok Yawe, Looygina.

⁷ Na may njaf suu vi Levina ii ɓorow masi maa ka dukugiɗi kama, ɓorow masina ni ɓivun ma asi lam maŋ Yawena. Lini kay dee suu vi Gad, Ruben u nus suu vi Manasena ni asi fi ɓorow masina ha ki ii ma u maɗiinana keŋ lum ma Yurdanna ni jo ma Moiz, sa ma sun Yawena, ɦasina kana.»

⁸ Suu asina yow a tuɗta, Josuwe di suu tuɗ a ɓii lina asina ana, «Tuɗugiya, poyogi lina ay ki halaŋ, ɓii dla ndaɗta ay kogiya, hoŋogi ay egen tani, an hin mba tumugi agi a paɗ dewna ni fok Yawe hu Silo tani.»

⁹ Suu asina tuɗa, poy yam mbas ndaɗta ay ki halaŋ halaŋ, ɓii ay kosi may. Ni u ɦoŋzi ma ŋgolona ɓorowom irim ay ki na zeɗ zeɗ kiɗisiya. Asi hin mbay eg Josuwe hu Silo.

¹⁰ Josuwe cukusi a paɗ dewna fok Yawe hu Silo. Nam hin ɓorow mbas ndaɗta ki maŋ suu Israelna ni ko ndaɗta na. Ni u irisi ta ɓorowi vora may.

Dee suu vi Benjaminna

¹¹ Mbas mayra ŋgaɓaɗ ki jewra ni mbassa vi goryoŋ Benjaminnara. Mbassa asi ŋgaɓaɗta ni duk ɦoŋ goryoŋ Yudana u goryoŋ Yosefna na gay.

¹² Keŋesi ii mbayaw na ni ii hakara ay ni mbo lum ma Yurdanna gaw. Jaki kolo mbayaw keŋ mbassa Yerikora na, i kolo kay ɦinira ii u fiɗigina na may. Daɓ ay ki hu ŋgoo bagira Bet-Arvenda.

¹³ Ii hakara jak ay hu Luz ii ma dalina na, ni mbassa Betella. Hakara tuɗ ga ta ta hu Atrot-Addar, kay ɦini mayra ii dalira vi Bet-Horon ta Gaara na.

¹⁴ Ii hakara gun ay ii ma u maɗiinana, tuɗ ii dali na col ay vok tasi u ɦini mayra Bet-Horonda ii dali na, tuɗ tew ay ki hu Kiriat-Baal, ta yaɗ ana Kiriat-Yearimba. Ni ɦoŋzi ma vi goryoŋ Yudana, ni keŋ ma ii u fiɗigina nana.

¹⁵ Keŋ ma ii dalina gijaŋŋa ay ni hu Kiriat-Yearim, ii u fiɗigina na hakara maɗ ay ga u fiɗigina fun mbo ma Neftoana na.

¹⁶ Ndaɗ kal ay ga u ɦinira ka coli fun ɦuɗugumba Hinnomba na, keŋ ma mbayawna ii ɦuɗugumba Refara na. Hakara maɗ ha ki keŋ ɦuɗugumba Hinnomba na gak, ta ta tew ay ki keŋ mbura Jebussa tuɗ ha ki ga ta ta tew ay ki En-Rogel.

¹⁷ Ii hakara hoŋ ii mbayaw nara tuɗ ay En-Semes na, jak ay Gelilot vok taɗ u mbura Adumimba, ay hu li namma ndaɗ kal ay ga hu li ma gogoyra ma yam ana Bohanna na, li ma vi goryoŋ Rubenna.

¹⁸ Ii hakara jak ay mbayaw vok mbassa Arabara na, hin tuɗ ha ga hu ɦuɗugum Yurdanna na may.

¹⁹ Hakara jak ay ga hu Bet-Hogla ii ma mbayawna na, tew ay ki fun mbo lum ŋgol ma Galakŋa ii mbayaw na may. Tew ay ki ii dali hu vun lum ma Yurdanna ta do ayra na may, ii hakara dalira do ay ni na.

²⁰ Ii hakara u maɗiina nara ni mbo lum ma Yurdanna. Gola ni jo ma vi goryoŋ Benjaminna u deeeresi halaŋ u ii hakara ŋguyusira halaŋ lay.

²¹ Ҥoŋzi ŋgolo ma vi goryoŋ Benjamin u njafasi halaŋŋa ni Yeriko, Bet-Hogla, Emek-Kesis.

²² Bet-Araba, Semaraim, Betel,

²³ Avim, Para, Ofra.

²⁴ Kefar-Amona, Ofni u Geba. Ҥoŋzi ma ŋgolona doogo yam mba u ɦoŋzi ma gorina usi hu olo.

²⁵ Ҥoŋzi ma daŋŋa olo ni Gabaon, Rama, Beerot.

²⁶ Mispe, Kefira, Mossa,

²⁷ Rekem, Irpeel, Tarala.

²⁸ Sela, Elef, ɦoŋzi ma Jubusna ni ana zi ma Yerusalemma, Gibea u Kiriat. Ҥoŋzi ŋgolona doogo yam fiɗi u ma gorina usi hu olo. Gola ni mbassa vi goryoŋ Benjaminna u njafasi halaŋ.