JOSUWE 17 - Boy Lonana

Mbassa vi goryoŋ Manasenara

¹ Gola ni jo ma vi dee suu vi Manasena kay nammi goŋ Yosef ma ŋgolna. Makir goŋ Manase ma ŋgolna ni bu Galaad. Asi ɦammi mbassa Galaadta u mbassa Basanda kay nammi sa ma wi duuna.

² Gola ni mbassa vi goryoŋ Manase suu hiŋŋara u deeresi may. Goryom asina ni Abiyezer, Helek, Asriyel, Sekem, Hefer u Semida, halaŋŋi goryoŋ Manase ma goŋ Yosefna.

³ Na may Selofaɗ goŋ Heferna, goŋ ŋgolo Galaad ma goŋ Makirna goŋ ŋgolo Manasena vuɗ go njuf kaɗi, vuɗ ni gorɓiina ɦawaa, gorɓii asina ni Mala, Nowa, Hogla, Milka u Tirsa.

⁴ Asi mbay eg mul ma li ɓivunna Eleazar eg Josuwe ma goŋ Nunna u suu ŋgolo suu fok suunana dasi ana, «Yawe di ka ki maŋ Moiz ana nam hin ɦami liimina ka duk gorsemina may.» Asi hin ɦasi lina duk gorseŋ busina ko Yawe dira na may.

⁵ Njaf suu vi Manasena fi li ma daŋŋa kay masina hu doogo olo, taɓ u liisi ma Galaad u Basan keŋ hiŋŋa ii mbo lum ma Yurdanna ii u maɗiina nana.

⁶ Ko ndaɗta na gorɓii suu vi Manasena fi lina duk gorsesi suu njufiina may. Na may mbassa Galaadta hin ki ni maŋ goryoŋ Manase suu daŋŋa.

⁷ Ii hakara vi Manasera col ha Aser ta ta Mikmetat, vok tasi u Sekem na, ndaɗ tuɗ ki hu Yamin vi suu Ein-Tappuana na.

⁸ May ni Tappua ni ii hakara vi Manasera, ndaɗ ki ni vi goryoŋ Efrayimma, ka vi Manaseɗi.

⁹ Ii hakara hoŋ ay ga fun mbo ma Kanaanna na ii ma dalina. Ҥoŋzi ma hu li nammana halaŋŋi vi Efrayim ki duk zi ma vi Manasena. Ii hakara vi Manasera col ay ni ŋgoo mbona ii mbayaw na tuɗ tew ay ki fun mbo lum ŋgol ma Mediteranena.

¹⁰ Ii ma dalina ni vi Efrayim, ii ma mbayawna ni vi Manase may. Mbo lum ŋgol ma Mediteranena ni a ii haka masira duk ɦoŋosi taɓi ii ma mbayawna ni u Aser, ii ma u maɗiinana ni u Issakar may.

¹¹ Ha hu mbassa vi Issakar u Aser, Manase ɦoŋzi mam ma ŋgolona ha varasiya, ni Bet-Sean u zi ma ga umma halaŋ, Yibleam u zi ma ga umma halaŋ, Dor, En-Dor, Taanak, Megido u zi ma ga usina halaŋ, u ma ay keŋesi tok tokŋa lay.

¹² Suu vi Manasena ka ndaki a dik suu cuki jew hu li nammana kiɗi, kay ndaɗta suu Kanaanna ka cuki hu gak gak.

¹³ Hu li ma suu Israelna mbuɗ saɓakŋana asi suu ki kay suu Kanaanna, mbuɗusi a mborɓii masisina, may asi tew ka a dikisi ki diki oloɗi kama.

Goryoŋ Yosefna mba joɓ Josuwe

¹⁴ Goryoŋ Yosefna mbay eg Josuwe dam ana, «Aŋ ɦami mbassa na dew daŋ a joomina ni nanage? Aŋ gola ami ni njaf ma Lona paɗ vunum ki kamma cecemi ami ka zulumi cocoo.»

¹⁵ Josuwe hoŋosi dira ana, «Lini agi zuli cocoo, ɦinira Efrayimba ka ndakagiɗi ni agi jak ha duk gura ŋgoo bagi hu mbassa vi suu Perizna u suu Refanna lagi senena ha huwa.»

¹⁶ Goryoŋ Yosefna hoŋom dira ana, «Mbassa ɦinira ka ndakamiɗi, ni gasi daŋ may, suu Kanaanna suu cuki hu mbas ndaɗta u pupus ma kawina kosiya, suu Bet-Seanna hu lay u suu ŋguy keŋesi tok tokŋa may, suu may suu hu ɦuɗugumba Jizreella lay.»

¹⁷ Josuwe di goryoŋ Yosefna dee suu vi Manasena u suu vi Efrayimma ana, «Agi ni suu zuli cocona, saɓakagi coco lay, agi ndak a fi lina suu dewra daŋ may.

¹⁸ Mbassa ɦinira hu cocora hin ay ki ni magira lay, lini duk gura lay, ni agi ndak a kaaɗ kiyo, tlagi mbas ndaɗta ay ki magiya. Suu Kanaanna lini pupus kawina usi lay, asi li saɓak coco lay ni agi hin dikisiya.»