JOSUWE 14 - Boy Lonana

Ɓorow ma ɓorow mbassa Kanaanda kina

¹ Gola ni ndaŋgara suu Israelna ɓorowoɗ kosi hu mbassa Kanaanda, u fiɗigina keŋ lumma Yordanna. Eleazar mul ma li ɓivunna, Josuwe ma goŋ Nunna u muli suu ŋgolo suu ay fok dee suu Israelna ɓorowosira ni asiya.

² Asi ɓorow mbassa duk tasi ni u paɗta asi paɗ dewnara. Ko ndal Yawe dasi ay ki fok jew fun Moizza na may. Ɓorowoɗ ni maŋ dee suu dleeŋena u nus njaf suu hiŋŋa may.

³ Kay Moiz ɦal mbassa ŋgoo lum ma Yurdanna ii u maɗiinara maŋ dee suu mba u nus dee ta hu dew may, may njaf suu vi Levina nam ɦasi li ka duk ndarayasinaɗi.

⁴ Goryoŋ Yosefna irisi ɓorow ki deera ni mba', Manase u Efrayim. Asi ɦal li maa na nde lay ka maŋ njaf suu vi Levinaɗi, ɦasi ni li ma min ziisina u li ma yoori masisina ti huna doy hol u li ma cuk tlegeyesi huna may.

⁵ Suu Israelna li ni ko ndal Yawe di ka maŋ Moizza na. Asi ɓorow mbassa ni ko ndaɗta na may.

Mbassa Hebronda ɦaɗ ni maŋ Kaleb

⁶ Goryoŋ Yudana mbay eg Josuwe hu Gilgal, Kaleb ma goŋ Yefunena ay dukusi may. Nam dam ana, «Aŋ wi dla mayra Yawe daɗ maŋ Moiz, sana vi Lona, kanda ura kaŋ aŋ taŋgara lay ay hu mbassa Kades-Barneara.

⁷ Hu li ma Moiz, sa sunda vi Yawe, sunun a tuɗ gol mbassa ni an basaɗan ki ni dok fiɗi. Nam sunun hu mbassa Kades-Barneara. An mba cuɗum dlara ki ni u saa manda ay hurun kurufura daŋ may.

⁸ Gorsen suu tuɗ ay u anna mba mbuɗ suuna ki ndaana, an may ni li ni u Yawe, Loonna, mbuɗ hurun kaɗi.

⁹ Hu buu namma ni Moiz suu tam ki di ana, an suu ki ana mbassa aŋ tin seŋ ay kaɗ ndaɗta hin hin ki ni maŋ a fafaɗta, ka maŋ goryoŋ suu hin ka ŋgoroŋ daganna lay, kay aŋ hum vun Yawe, Loonna.

¹⁰ Cemi ni Yawe hinin ka iiri tu gak gak ko nam dira na, li basara ki ca ni dok fiɗi yam vadl hu li ma Yawe di maŋ Moiz nana, ni hu li ma nam ka poy ŋgoo bagi hu fullana. Aŋ gola an cemi ni basaɗan ki ca ni dok kalavandi yam vadl.

¹¹ Cemi ni saɓakan ma Moiz sunun a gol lina namma ka hurun tuwa. An cemi u saɓakan ko fok jewra tu na, a li duuna tuwa, ndaki a col hu liinna tu lay.

¹² Aŋ ɦan ɦini mayra Yawe ɓak ay ki fok jew kaɗ ndaɗta ɗaŋgi su? Hu coki ndaɗta aŋ hum boy namma ni u hum taŋga lay, ana li namma suu Anakŋa cuki hu ni asiya, ɦoŋzi ma saɓak cocona. Kala Yawe hin li u an a an hin kak hu li namma ko ndal Yawe dira na kalage?»

¹³ Josuwe paɗ vunum ki kay Kaleb ma goŋ Yefunena, hin ɦam mbassa Hebronda a joomma may.

¹⁴ Kay ndaɗta mbassa Hebronda hin ki ni maŋ Kaleb ma goŋ Yefune ma Kenazna ta ta cemi. Kay ana nam hum vun Yawe, Lona vi suu Israelna, u hurum halaŋ.

¹⁵ Sem mbassa Hebronda ay fok jew ni ana Kiriat-Arba. Arba ay ni sa ŋgol ma sem tii ki duk suu Anakŋa cocona. Mbassa fi koɗ tara, duuna ka huruɗ oloɗi.