EZEKIYEL 1 - Boy Lonana

Ezekiyel wi suu sunda huulona

¹ Hu basara dok-hindira, hu til ma fiɗina, hu buurum ma vadlna ni an ay duk suu yowosi ha ki balna laki na tok eg mbo lum ma Kebarna, huulona mal kiyo, an wi tlesuu ha kolo huulonna.

² Buu ma vadlna hu til namma ni basa mulna Joakin ta vadlla ta asi vam ha kira may.

³ Yawe di boy mamma maŋ Ezekiyel ma goŋ Buzi mul ma li ɓivunna, hu mbassa vi suu Kaldenara tok eg mbo lum ma Kebarna. Ay hu li namma Yawe tin kom kay Ezekiyel.

⁴ Gola ni dlara an waɗta, babaa ma ŋgolna col ay ii mbayaw na, ɗugulla ŋgolla ay um may, ɗugulla yaɗ ki ŋguy u kura, duk gayra ni vana weleɗ ay hu cocora ko ndal kawi ma haɓma welera na.

⁵ Duk gayra hu olo ni vabakgina ka duk hu fiɗi tli tasi ko ndal suu warna na.

⁶ Ma dewna ni vogom fiɗi fiɗi, garaŋam fiɗi fiɗi may.

⁷ Sesi ki ɗoɓira na ɗegee ɗegee, ta sesi ma tin kaŋgana ko ndal gor mbutlina na, sesi weleɗ ko ndal walakka na.

⁸ U garaŋasi ga ni kona ka hu ko ndal ko suu warna na, ii kosi ha ki nekira keŋ lina na zeɗ zeɗ fiɗi, irisi ha ki ni na lay u garaŋasi ha ki ni hu lina zeɗ zeɗ fiɗi lay.

⁹ Garaŋasi ŋgafira ko taɗ ni na gaw gaw. Asi tuɗ ni ka pereɗ irisiɗi, gegelay ni tuɗ irim ha dukŋi na ɗegee gaw.

¹⁰ Sa ma dewna vogom gol ni ko ndal wandara na, ha fok na ni ko vok sa warna na, bik njuf na ni ko vok dlona na, bik gulu na ni ko vok mbutlna na, ŋgoo daganda ni ko vok bakŋa na may.

¹¹ Vogosi u garaŋasi ki ɓorowi, ii koloo, garaŋ ta kolo mba' a piira may, ta mba' wanda ŋgafi vok taɗ a baa tasira may.

¹² Gegelay ni pii irim ha ni fokom na ɗegee, asi tuɗ ni hu li ma asi min a tuɗ huna. Asi pii ni ka pereɗ irisi daganɗi.

¹³ Tlesuu iiri asina ni ko ndal murus kura na, wasi ha ni ko ndal ku tosolomba na, kura ɦus aya, kiɗikka li ki kasi may.

¹⁴ Suu iiri asina tuɗa hoŋ aya, asi pii fet su ii bulukka a kal ha kira.

¹⁵ An wi tlesuu iiri asina, col ha keŋesi ga kay ndaŋgara na day ni, sem pupusna kaa. Gegelay u dlasira fiɗira sem mamma kaa.

¹⁶ Sem pupus masisina ni ko ndal wandara na. Tam weleɗ ko ndal ɦinira yaɗ ana krisolitta na, sem fiɗi halaŋŋi ko tam na dew, nam mini halaŋŋi ma hiŋŋa ndak a kal hu ma hiŋŋa lay.

¹⁷ Asi a tuɗta ni tuɗ ha ni keŋ lina fiɗi halaŋ, ka gunɗi, gegelay ni tuɗ irim ha ni fok na ɗegee.

¹⁸ Sem pupus namma wulum laŋ ndaa cocoo, sem fiɗi halaŋ ni ki ŋguffi u iira na cutl weleɗ cocoo.

¹⁹ Lini tlesuu iiri asina ka tuɗa ni sem pupus namma tuɗ keŋesi may, lini asi weɗ tasi ki kolo kay ndaŋgara wa ni nam weɗ usi may.

²⁰ Asi tuɗ irisi ni hu li ma asi min a tuɗ huna, sem pupusna tuɗ ha ni hu li ma tlesuu iiri asina tuɗ ha huna gaw may.

²¹ Lini asi tuɗa ni sem pupusna tuɗ may, lini asi col wa ni, sem pupusna col may. Lini asi weɗ ki kolo kay ndaŋgara wa ni sem pupusna weɗ ki kolo lay. Kay ŋgus tlesuu iiri asina ka hu sem pupusna may.

Ezekiyel wi bibiŋilla vi Yawera

²² Kolo kay yam tlesuu iiri asina ni vana tli tam ko ndal huulona na, weleɗ su ɦinira yaɗ ana Kristalla. Va namma ki kuluɓi kasi kolo na dlum.

²³ Ga u huulona namma ni garaŋasi ka ki madiya, ŋgaf taɗ ki na halaŋ halaŋ, gegelay ta mba' wanda ni a baa tamba, ta mba' hiniŋga a baaram tam ki halaŋga may.

²⁴ Hu li ma asi ka piina an hum garaŋasi ka soo ko bil mbo ŋgolna na, ko del Lona tamba na, soo ko ndal del suu tokki eg tasi bolowna na, ko ndal suu duuna na. Hu li ma asi col wa ni asi hin garaŋasi ki maɗiira na ta.

²⁵ Ay kolo kay huulona ma ki kuluɓi kasina ni della ka soo ay kolo hu may.

²⁶ Kolo kay huulona ma kuluɓi kasi namma olo ni, vana hu ko ndal ɦini mayra yaɗ ana safirra na, tini ko ndal dlamba mulla na, kolo hu dlam ndaɗta ni vana kaki huruɗ ko ndal sa warna na may, kolo kasi halaŋ.

²⁷ Kolo kayam na ni an wi vana weleɗ haɓpa ko ndal tusuna na, ga u sem na ni an wi vana li kiɗikka u sem ko ndal kura na, ŋguy ki kam na halaŋ.

²⁸ Kolo gunira ko ndal Lona a ɓal sum ki kolo hu li ma lona hal a sira na, kiɗikka ŋguy ay hu li nammara ni ko ndaɗta na. Kiɗik ndaɗta tak ki ni ko ndal bibiŋilla vi Yawera na. An wi dla ndaɗta na ni, kuluɓ irin ki gaa, an hum della ɓakka.