Pampujiam 8 - Bambam

KamatandeanNa Puang Allataala anna tadongkonganna hupatau 8:1-10

¹ Lu lako to untetem to menani. Situhu' ajanganna penaniam: Gitit. Pampujiam napapia Daud.

² O DEBATA, Debata to kipenombai, tä' deem pada samapuam sangamMu illaam inde lino! Dipenaniam kamatandeamMu to untandolängänni langi'.

³ Gamahanna änä'-änä' sola änä'-änä' sumusu DEBATA, umpadadi kamatohoam lako balimMu, la umpopa'luttu' ingganna bali sola to ma'patumpui.

⁴ Maka' kupahandam langi' kalua' pa'tampa limamMu, bulam sola ingganna bintä to umpatadongkonni ongeanna,

⁵ iya mekutanamä' kuua, aka ia inde hupatau DEBATA, nasuhum umpaillaam penaba? Menna hia inde to lino DEBATA, nasuhum muandaham mata liu?

⁶ Umpomahempo ia saidi' anna la Puang Allataala, anna umpatadongkom yabo ongeam matande anna malangka'.

⁷ Umbeem kakuasaam yabona ingganna pa'padadimMu, umbeem kakuasaam ungkuasai ingganna-ingganna sia, susinna:

⁸ domba, sola sapim, anna duka' olo'-olo' lako kaliane;

⁹ dassi yabo lawwa, anna bau dio le'bo', sola issinna ingganna le'bo' kalua'.

¹⁰ O DEBATA, Debata to kipenombai, tä' deem pada samapuam sangamMu illaam inde lino!