Pampujiam 5 - Bambam

Sambajam wattu mebengngi' 5:1-13

¹ Lu lako to untetem to menani. Penaniam dipa'sulinni. Pampujiam napapia Daud.

² O DEBATA, patanannii talinga pa'tula'ku, pehingngii pengkaloa'ku.

³ O Tomahajangku anna Puang Allataala to kupenombai, hingngianni pengkaalaangku umpelau pepamolo, aka Iko kupa'patinandai sambajangku.

⁴ O DEBATA, wattu mebengngi' si uhhingngiangko sambajangku, wattu mebengngi' umpatokaä' kaleku la mengngolo matim, anna kuampai pentimba'Mu.

⁵ Aka Iko Puang Allataala to ungkabassi kakadakeam; tä'Ko deem la nalese' to ma'gau' kadake.

⁶ Tä' la umpabäi to malangka' penaba sule dio oloMu; ungkabassiKo ingganna to umpogau' kakadakeam.

⁷ Umpempa'deangKo to angga ma'tula' tatappa', ungkahi'di'Ko to papateam anna to manipu.

⁸ Sapo' kao-kao, aka kasalle pangkaha' pa'kamaseMu takattu tintim tamondo' sahuham, la malaä' mentama banuamMu, menomba dio olona ongeam masehoMu sola mengkahea' dio oloMu.

⁹ O DEBATA, patetteä' uhhuttu' kamaloloamMu aka nalilim pali'ä' balingku; hampasannä' lalamMu la kuola.

¹⁰ Aka tä' punala deem mala dikatappa'i pa'kadanna, ponno pattuju kadake illaam penabannai, pessubungam pudu'na umpa'gahoängam tau senga', lilana mangkuhu-kuhu.

¹¹ O Puang Allataala, pabäi sangngim umpendudum kasalaanna; pabäi natappai pa'lellenna; hambai lao aka makambammi kasalaanna, aka silele napobaliKo.

¹² Sapo' la ussi'dim ia katilallasam ingganna to mentuhehum matim, la sikaahhe tilalla' sule lako salako-lakona, aka Iko muongannii; la naponnoi katilallasam ingganna to umpake pangkaha' pa'kamase lako sangamMu, aka indo pa'pogausamMu lako kalena.

¹³ Aka Iko untamba' to meada', DEBATA; mana' pa'kamaseMu uhhindim batui, muunta' matoto'i.