Pampujiam 4 - Bambam

Sambajam wattu bengi 4:1-9

¹ Lu lako to untetem to menani. Penaniam dikatapii. Pampujiam napapia Daud.

² O Puang Allataala, to umpomaloloä', timba'iä' ke mengkaalaä' matim. Illaam kamasippisangku umpatialaannä' inabangku. Kamaseiä' anna hingngianni sambajangku!

³ O inggammua' hupatau, la pihampi mane mondakoa' umpalele kadake sanga mapiangku? La pihampi mane mondakoa' umpadondoi kaha-kaha takeguna, anna sipangngula' kaha-kaha tatappa'? Sela

⁴ Pengngissanniia', puham napileiam kaleNa DEBATA indo to napakamaja. Nahingngiam DEBATA ke mengkaalaä' längäm oloNa.

⁵ Pabäiko keaha', sapo' daa umpogau' dosa; pasalui penaba dio petindoammu, sapo' la mengkamma' pudu'mu. Sela

⁶ Pehumalasanni bua pemala' la sipäto'na anna matappa'ko längäm DEBATA.

⁷ Buda tau mekutana naua: <> La unnenne'i hakam too DEBATA, sola mata pa'kamaseMu!

⁸ PuhangKo umpaponnoiä' katilallasam, la'bi puha ia anna la katilallasanna to bosa' gandum anna anggur.

⁹ Masannam penabangku metindo lambi' mamma', aka anggam Iko DEBATA, umpadadiä' tubo malino masannam.