Марк 15 - Сыйлы Инжил бла Забур

Исса оноучу Пилатны аллында

¹ Мычымай эрттенликде баш дин къуллукъчула таматала бла, дин алимле бла эм битеу синедрион бла бирге кенгеш этип, Иссаны байлап, элтип, Пилатха бердиле.

² Пилат Анга: «Сен Иудей Патчахмыса?» – деп сорду. Ол а анга жууапха: «Сен айтханчады», – деди.

³ Баш дин къуллукъчула Аны кёп затла бла терслей эдиле.

⁴ Пилат а дагъыда Анга: «Сен бир жууап да бермеймисе? Кёремисе, Санга къажау ненча шагъатлыкъ этедиле», – деп сорду.

⁵ Исса уа мындан ары бир жууап да бермеди, Пилат анга бек сейирсинди.

⁶ Хар Къутхарылыу байрамгъа Пилат алагъа, ала тилеген бир тутмакъны эркин этиучю эди.

Исса терсленеди

⁷ Ол заманда тюрмеде кесини къозгъаучу нёгерлери бла Барабба атлы биреу бар эди, ала уа халкъ къозгъалгъан заманда адам ёлтюрген эдиле.

⁸ Сора халкъ, къычырышып, Пилатдан, ол алагъа хар заманда этгенича этерин тилеп башлады.

⁹ Ол алагъа жууапха: «Мен сизге Иудей Патчахны эркин этсем сюемисиз?» – деди.

¹⁰ Нек десегиз ол баш дин къуллукъчула Иссаны зарлыкъдан тутдургъанларын биле эди.

¹¹ Алай а баш дин къуллукъчула Иссадан эсе алагъа Бараббаны эркин этерин тилерге халкъны къозутдула.

¹² Пилат дагъыда алагъа: «Ол сиз Иудей Патчах атагъаннга уа мен не этсем сюесиз?» – деди.

¹³ Ала дагъыда: «Аны къачха кер!» – деп къычырып башладыла.

¹⁴ Пилат алагъа: «Не аманлыкъ этгенди да Ол?» – деди. Ала уа: «Аны къачха кер!» – деп, андан да бек къычырышдыла.

¹⁵ Сора Пилат, халкъны ыразы этерге сюйюп, алагъа Бараббаны эркин этди. Иссаны уа, тюйдюрюп къачха керирге берди.

Аскерчиле Иссаны хыликкя этедиле

¹⁶ Аскерчиле уа Аны претория атлы арбазны ичине элтип, анда битеу полкну жыйдыла.

¹⁷ Иссагъа къызгъылдым кийим кийдирдиле, чыгъанадан таж эшип, Аны башына кийдирдиле.

¹⁸ Сора: «Жашасын, Иудей Патчах!» – деп, Анга салам берип башладыла.

¹⁹ Аны башына таякъ бла ура эдиле, Анга тюкюре эдиле эм тобукъланып, Анга сежда эте эдиле.

²⁰ Аны хыликкя этгенден сора уа, юсюнден къызгъылдым кийимни тешип, Анга Кеси кийимлерин кийдирдиле, сора Аны къачха керирге алып кетдиле.

Иссаны къачха кередиле

²¹ Сабандан келе тургъан Шимон атлы Киринейли бир адам алайтын озуп бара эди. Ол Аскендирни бла Руфну аталары эди. Иссаны къачын анга кётюртюп элтдирдиле.

²² Иссаны Голгота атлы жерге келтирдиле, аны магъанасы уа: «баш сюек жер».

²³ Анда Анга ичерге мюр къатышдырылгъан чагъыр бердиле. Ол а ичмеди.

²⁴ Аны къачха кергенден сора, кимге не тюшерине чёп атып Аны кийимлерин юлеше эдиле.

²⁵ Аны къачха керген заманларында ючюнчю сагъат эди.

²⁶ Аны юсюнде терслигин кёргюзтген ярлыкъда: «Иудей Патчах», – деп жазылгъан эди.

²⁷ Аны бла эки аманлыкъчыны да къачха керген эдиле, бирин Аны онг жанында, экинчисин а сол жанында.

²⁸ Алай бла Сыйлы Китапда: «Аманлыкъчыла бла тенгнге саналгъанды», – деп жазылгъан сёз толду.

²⁹ Озуп баргъанла Анга аман айта эдиле, башларын булгъап: «Эй! Табыныучу юйню бузуп, юч кюннге жангыдан ишлеучю!

³⁰ Кесинг-Кесинги къутхар да, къачдан тюш!» – дей эдиле.

³¹ Аны кибик баш дин къуллукъчула да дин алимле бла бирге хыликкя этип, бирбирлерине: «Башхаланы къутхара эди, Кеси-Кесин а къутхаралмайды!

³² Израильни Патчахы Масих, энди къачдан тюшсюн, сора биз кёрюп Анга ийнанырбыз», – дей эдиле. Аны бла бирге къачха керилгенле да Анга аман айта эдиле.

Иссаны ёлюмю

³³ Алтынчы сагъатдан а тогъузунчу сагъатха дери битеу жер башында къарангы болуп турду.

³⁴ Тогъузунчу сагъатда Исса уллу ауаз бла: «Элохий, Элохий! Лема шевакътаний?» – деп къычырды, аны магъанасы уа «Эй Аллахым, эй Аллахым! Сен Мени нек атып къойдунг?» деген сёздю.

³⁵ Былайда тургъанладан бир къауумла муну эшитип: «Ма, Илиясны чакъырады!» – дей эдиле.

³⁶ Биреу а, чабып барып, жуугъучну мысты чагъырдан толтуруп, таякъгъа тагъып, Анга ичерге берип: «Тохтагъыз, Илияс Аны тюшюрюрге келлик эсе кёрейик», – деди.

³⁷ Исса уа, уллу къычырып, жанын берди.

³⁸ Ол заманда табыныучу юйде жабыу башындан тюбюне дери жыртылып экиге айырылды.

³⁹ Иссаны туурасында тургъан жюзбашчы Аны, алай къычырып, жан бергенин кёрюп: «Кертиси да бу Адам Аллахны Уланы эди!» – деди.

⁴⁰ Мында, узакъдан къарап тургъан тиширыула да бар эдиле; аланы арасында Магдаллы Мариям да, кичи Якъупну бла Юсюпню аналары Мариям да, Шеломит да бар эдиле.

⁴¹ Исса Галилеяда болгъан заманда да ала, Аны ызындан барып, Анга къуллукъ этип тургъан эдиле. Аны бла бирге Иерусалимге келген башха кёпле да узакъдан къарай эдиле.

Иссаны асыралыуу

⁴² Ол хазырлау кюн – алай демеклик шабат кюнню аллында кюн – болгъаны себепли, ингир болгъанлай,

⁴³ Кенгешни белгили члени, Араматиялы Юсюп келди. Ол а кеси да Аллахны Патчахлыгъын сакълагъанладан эди. Ол, таукелленип Пилатха барып, Иссаны ёлюгюн тиледи.

⁴⁴ Аны алай терк ёлгенине Пилат сейирсинди эмда жюзбашчыны чакъырып, анга: «Эрттеми ёлгенди?» – деп сорду.

⁴⁵ Эмда жюзбашчыдан тюзюн билип, ёлюкню Юсюпге берди.

⁴⁶ Юсюп, гетен къумач сатып алып, Иссаны къачдан тюшюрюп, Аны гетен къумач бла кебинлеп, къаяны къазып этилген къабыргъа салды; къабырны эшигине да таш аудуруп сюеди.

⁴⁷ Магдаллы Мариям бла Юсюпню анасы Мариям а, Иссаны къайда асырагъанларына къарап тура эдиле.