Лука 2 - Сыйлы Инжил бла Забур

Масих Иссаны туугъаны

¹ Ол кюнледе битеу Рим империяда халкъны жазаргъа Августус кесарьдан буйрукъ чыкъды.

² Бу биринчи жазыу Кириний Сириягъа башчылыкъ этген кезиуде этилген эди.

³ Сора бары да, хар ким кесини шахарында жазылыргъа бардыла.

⁴ Аны кибик Юсюп да Дауутну юйюрюнден, аны тукъумундан болгъаны себепли, Галилеяны Назарет шахарындан Иудеягъа, Бейтлехем атлы, Дауутну шахарына барды.

⁵ Анда аны бла сёз тауусхан Мариям бла жазыллыкъ эди. Мариям а бууаз эди.

⁶ Ала анда болгъан заманда уа, Мариямны къозлар заманы жетди

⁷ Эм кесини биринчи Уланын тапды. Аны бёлеп, куудушха салды, нек десегиз алагъа къонакъ юйде жер жокъ эди.

Сюрюучюле бла мёлекле

⁸ Ол къыралда аулакъда сюрюучюле бар эдиле, ала уа кеслерини сюрюулерини къатында кече къыйыр сакълай эдиле.

⁹ Билмей тургъанлай, алагъа Раббийни бир мёлеги кёрюндю эмда Раббийни аламатлыгъы аланы жарытды. Ала бек къоркъдула.

¹⁰ Мёлек алагъа: «Къоркъмагъыз! Мен сизге уллу къууанчны билдиреме, ол къууанч а битеу халкъгъа боллукъду:

¹¹ Бюгюн сизге Дауутну шахарында Къутхарыучу туугъанды, Ол а Раббий Масихди.

¹² Ма сизге белги: сиз Сабийни бёленип, куудушда жатып тургъанлай табарсыз», – деди.

¹³ Сора, билмей тургъанлай мёлек бла кёкдеги кёп аскер кёрюнюп, Аллахха ыспас этип:

¹⁴ «Эм бийикледе Аллахха махтау, жер юсюнде Ол ыразы болгъан адамлада ырахатлыкъ!» – деп айта эдиле.

¹⁵ Мёлекле аладан кёкге кетген заманда, сюрюучюле бир бирлерине: «Бейтлехемге барайыкъ, анда не болгъан эсе да, Раббий бизге билдиргенни кёрейик», – дедиле.

¹⁶ Ала ашыгъып бардыла, анда Мариямны бла Юсюпню эм куудушда жатып тургъан Сабийни тапдыла.

¹⁷ Кёргенлеринде уа, Сабийни юсюнден алагъа не билдирилгенин айтдыла.

¹⁸ Битеу эшитгенле да сюрюучюлени алагъа айтхан сёзлерине сейирсиндиле.

¹⁹ Мариям а бу сёзлени барын да кесини жюрегине салып сакълай эди.

²⁰ Сора сюрюучюле, алагъа айтылгъаныча барын да эшитгенлери эм кёргенлери ючюн Аллахха ыспас махтау сала, ызларына къайтдыла.

Исса табыныучу юйде Аллахха бериледи

²¹ Сегиз кюн озгъандан сора, Сабийге сюннет этерге керек болгъан заманда, Анга Исса атны, Ол къарыннга тюшгюнчю мёлек Анга атагъан атны бердиле.

²² Мусаны Таурат китабына кёре, аланы тазаланнган кюнлери толгъан заманда уа,

²³ «Жаш орун ачхан хар эркегырыу сабий Раббийге аталсын», – деп, Раббийни Таурат китабында жазылгъаны кибик, Раббийни аллына салыр ючюн, Сабийни Иерусалимге келтирдиле.

²⁴ Раббийни Таурат китабында айтылгъанына кёре, эки къумруну неда эки кёгюрчюн баланы къурманнга келтирирге керек эдиле.

²⁵ Ол заманда Иерусалимде Шимон атлы бир адам бар эди. Ол Израильни жапсарыллыкъ заманын сакълагъан, тюзлюклю эм дин ахлу киши эди эм аны юсюнде Сыйлы Нюр бар эди.

²⁶ Ол, Раббийни Масихин кёргюнчю, ёлюм сынарыкъ тюйюлдю – деп, Сыйлы Нюрден билим алгъан эди.

²⁷ Алай бла ол, Нюрню (кёллендириую) бла табыныучу юйге келди. Сабий Иссаны ата-анасы Анга Тауратда болгъан адетни этер ючюн келтирген заманда уа,

²⁸ Шимон Аны къоюнуна алып, Аллахха шукур этип:

²⁹ «Бийим, Сен берген сёзюнгю толтурдунг, энди (мен) къулунг ырахатлыкъ бла ёлюрме.

³⁰ Энди Сени битеу халкъланы кёзлерини аллында хазырлагъан къутхарыуунгу,

³¹ Миллетлеге билим ачарыкъ эм Сени халкъынг Израильге махтау келтирлик жарыкъны

³² Мен кёзлерим бла кёрдюм», – деди.

³³ Иссаны атасы бла анасы уа Аны юсюнден айтылгъаннга сейирсине эдиле.

³⁴ Шимон, алагъа алгъыш этип, Иссаны анасы Мариямгъа: «Ма, бу (Сабий) Израилде кёплени энишге тюшюрюлюулерине эмда (кёплени) ёрге кётюрюлюулерине себеп боллукъду. Ол (Раббийни) илишаны боллукъду, (алай болгъанлыкъгъа кёбюсю) Аны къабыл этерик тюйюлдюле.

³⁵ Сени кесинги да къылыч жанынга ётерикди. Алай бла кёплени жюреклерини ойлашыулары ачыкъ этилирле», – деди.

³⁶ Мында Ашерни тукъумундан, Пануелни къызы, файгъамбар тиширыу Ханна да бар эди. Ол бек къартлыкъгъа жетген, эри бла жети жыл жашагъан,

³⁷ Сексен тёрт жыллыкъ башсыз къатын эди. Ол, табыныучу юйден кетмей, ораза тутуп, тилек этип, кече да, кюн да Аллахха къуллукъ эте эди.

³⁸ Ол да, ол заманда жууукълашып, Раббийге махтау салып, Иерусалимде къутхарылыуну сакълагъанланы барысына да Сабийни юсюнден айтды.

³⁹ Ала, Раббийни Таурат китабына кёре, барын да этгенден сора, Галилеягъа, кеси шахарлары Назаретге къайтдыла.

⁴⁰ Сабий а ёсе эди эм, терен акъыллылыкъдан толуп, нюр бла кючлене эди, Аллахны шафауаты да Аны юсюнде эди.

Жаш Исса табыныучу юйде

⁴¹ Хар жылдан Иссаны ата-анасы Къутхарылыу байрамгъа Иерусалимге барыучу эдиле.

⁴² Ол онеки жыллыкъ болгъан заманда да, ала адетлери бла байрамгъа бардыла.

⁴³ Байрам кюнле бошалып, къайтхан заманларында уа, жаш Исса Иерусалимде къалды. Иссаны атасы-анасы муну эслемеген эдиле,

⁴⁴ Алай а, Ол башха жолоучула бла келе болур деп, кёллерине келе эди. Бир кюнлюк жолну баргъандан сора уа, жууукъларыны бла танышларыны арасында Аны излеп башладыла.

⁴⁵ Сора, Аны тапмай, Аны излей, Иерусалимге къайтдыла.

⁴⁶ Юч кюнден сора Аны табыныучу юйде устазланы арасында олтуруп, алагъа тынгылай эм алагъа сора тургъанлай тапдыла.

⁴⁷ Битеу Анга тынгылагъанла Аны акъылына бла жууапларына сейирсине эдиле.

⁴⁸ Ата-анасы Аны кёрюп сейирсиндиле. Аны анасы уа Анга: «Жашым! Сен бизге былай нек этдинг? Ма, Сени атанг да, мен да Сени уллу къайгъы бла излеп айландыкъ», – деди.

⁴⁹ Ол а алагъа: «Сизге Мени излерге не кереги бар эди? Мен Атамы юйюнде болургъа керек болгъанымы билмейми эдигиз?» – деди.

⁵⁰ Алай а ала Аны айтхан сёзлерин ангыламадыла.

⁵¹ Сора Ол, ала бла кетип, Назаретге келди, анда алагъа бойсунуп турду. Аны анасы да битеу бу сёзлени кесини жюрегинде сакълап турду.

⁵² Исса уа терен акъыллылыкъда да, ёсюуде да айный, Аллахны эм адамланы ыразылыгъын таба эди.