SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 9 - Bokyi Bible

N/kó Osówo Asǎma ké Mpan Emen mú oo*ryí Acît*

¹ Óburúkpâbí, me n/chi m-kpee ǒ ne dyityém ejí kángkáng. Me n/chi n-sét kyi-kim ne kángkáng biǐtí-byěm ḿbyí wo aa/chi.

² Me n/chi n-kwán ekwan ne bunyîn-dyityém ké bubwô eyên. Óburúkpâbí mú o/rêe o-shwôm, me n/chi n-kwán ekwan-akpee n-kye ǒ.

³ Banet-bushwôn ejí ba-bwa ng esim ké bushú eyên. Mbé ba-myii ng kyísí ba-kpú.

⁴ Wo aa*ryí acît ké bampan eyên ḿbé amu a-két ng* ne wo aa/két mpan o-nwa mě.

⁵ Wo aa/két mpan o-bên banet ḿbé baa*nyît ǒ* ne aa/man ne bambên atyém. Baa*ba/chi ba-chîzîim kyi-kim ne mbé*.

⁶ Banet-bushwôn eten baa/man ne banyá. Wo aa/bên eshê ebe ne baa/ráp kángkáng kyi-kim ne mbé.

⁷ Nké Óburúkpâbí mu Otu ne banyá. Nyǐ oo/nap kakyúng-butu emen o-tî ké mpan epan.

⁸ Nyǐ mu o-kyú u Otu mú ejíí ne kanong echi. Nyǐ oo*ryí acît ké mpan mú nyǐ mu o-két ng eshê*.

⁹ Óburúkpâbí nké mu kyikit-dyirem ńkyí banet ḿbé mbe ba-cít ng kámbé. Nkyi kyikit ńkyí onet odafem ké nkéré afaníkong.

¹⁰ Óburúkpâbí, banet ḿbé mbe ba-nyît ng ǒ ba/chi ba-tî dyityém ké wo. Wo a*fí a-ró ng onet nang obónge mú mu o-bâ o-kâm ǒ*.

¹¹ Kwán ekwan-akpee a-kye Óburúkpâbí mú mu Otu mú Záyon. Sét eshê kángkáng kyi-kim ne ḿbyí nyǐ oo/chi.

¹² Osówo mu o-zîim m banet ḿbé mbe ba-ri ng busông. Nyǐ o*fí o-ráp ng bukyû ebe ḿbú mbe ba-tî ng* ne nyǐ mu o-kyâ banet ḿbé mbe ba-chi i kámbé byibî busông.

¹³ Ô Óburúkpâbí, ri mě bafip. Ri busông ḿbú banet-bushwôn ejí mbe ba-chi i mě n-ri. Ô Óburúkpâbí, nyii mě ké abwô nyí bukyû,

¹⁴ eringe nyí me ndaman ebwom ké bushú-banet-Jerúsélem n-sét kámbé kángkáng byěm ḿbyí me mu n-kyâ ǒ akpee. Me n/chi n-jêe, ké nǎ, wo aa/nyii mě.

¹⁵ Banet ḿbé baa*nyît ǒ* baa/sím dyibíng ne baa/róng ké kafâ-kaǎtám ńké mbé ba/kuu. Kaa/kám kámbé mbé bayén.

¹⁶ Óburúkpâbí oo/tông byiko emen wááng ké kanong emen ńké mu o-chi i ké bampan ekét, ne bambên atyém baa/róng ké kaǎtám ńké byibî-byěm ḿbyí mbé mbe ba-chi i.

¹⁷ Bambên atyém ne kángkáng banet ḿbé mbe ba-né ng Osówo ba-man ba-kpú.

¹⁸ Ké nǎ, Osówo oo*ba/chi o-né banet ḿbé mbe ba-ri ng afaníkong kángkáng nkéré* ne achi etî nyí banet-kyikpu aa*tánê ne banyá*.

¹⁹ Óburúkpâbí, bâ. *Dabángê banet ba-shwane ba-shwôm ǒ*. Bâ ne banet ḿbé baa*nyît ǒ* ba-bwom ké bushú eyên a-két kámbé mpan.

²⁰ Óburúkpâbí, chi kámbé ba-kû ǒ eshî. Chi kámbé ba-nyît ba/fu, mbé ba-chi i banet ḿbé badakpú.