SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 8 - Bokyi Bible

Busun-Osówo ḿbú Ragerage ne Ofê mú Onet

¹ Óburúkpâbí mú mu Otu Kyítá eten, ejíí emúmú ee/ri eringe nyí dyizîn eyên ndyi kiǐtí. Akpee nyí mbe ba-kyâ ǒ nyi a-ribi ng kyíbóng.

² Bwǎsíng ne bwǎn ḿbé ké abwô nké mbe ba-kwán n akpee eyên. Wo aa/bi kyise ńkyí adabwom a-nwa ne banet-bushwôn eyên ne banet-ociring eyên a-kpógê kámbé.

³ Ké nkéré m/bírî achi n-ri bubóng ḿbú wo a/chi, n-ri otukáku ne ékpére ḿbyí wo a/tî,

⁴ onet o/byí ebóng mú wo amu a-kabe ng kyi-kim ne nyǐ. Onet mú o*da/byí chwǒm* nké wo amu a-nen n ǎ?

⁵ Nang ké nkyi éné, wo a/chi ǎ o-kyú ne ofê o-shwôm kángkáng byěm kyi-cibi ne [wo oyén] kǎnchí. Wo aa/yip akpee ne ofê a-cít ǎ wǎ etam-butu.

⁶ Wo aa/chi ǎ otu mú kángkáng byěm ḿbyí wo a/chi. Wo a/kye ǎ busa ké kángkáng byěm,

⁷ kángkáng byitú ne enyam-dyikán to,

⁸ bunurung ne ekworê ne kángkáng byěm ḿbyí mbyi ké baya.

⁹ Óburúkpâbí mú mu Otu Kyítá eten, ejíí emúmú ee/ri eringe nyí dyizîn eyên ndyi kiǐtí.