SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 7 - Bokyi Bible

Nshwam mú Mpan mú Ntûntû

¹ Ô Óburúkpâbí mú mu Osówo ejí, me m/bê n/fu, ku mě. Nyángê mě a-nyii mě ké abwô nyí kángkáng banet ḿbé mbe ba-zóngê e ne me.

² Â kyi*fí éné* mbé ba/chi ba-tut mě wǎ ekpang ba-dim ne me ké kyikit ńkyí onet nang obónge oo*man mě enyii*. Ányi nké mbé ba/chi ba-ját mě byicê byicê.

^3-4 Ô Óburúkpâbí mú mu Osówo ejí, â me nn/chi onet nang obónge kyibî, n-nîm nang ocín ejí obónge, n-ri onet nang obónge mú o/chi mě kyibî bafip, â nn/chi byěm ḿbyín nang kyibónge,

⁵ éné mîng banet-bushwôn ejí ba-zóngê ne me ba-kám mě. Mîng kámbé ba-cere mě ba-twóp kyísí ba-ju mě ba-mîng kyísí sáre.

⁶ Ô Óburúkpâbí, bûu ké kafâ eyên esa. Bûu a-bwom bunwa ne kyibî-kafâ esa ńké banet-bushwôn ejí. Bûu a-chwáp mě. Mpan mú acît a*fí* nké wo amu a-ryuu ng.

⁷ Ké bubwô ámbu, bâ ne banet kángkáng ba-wáp ǒ byicê byimúmú, [a-kyú kámbé Otu áku kyíbóng.]

⁸ Wo nké amu nkêt bampan ḿbé kángkáng banet. Ô Óburúkpâbí, két mpan o-nwa mě. Wo amu a-nyît ng a/fu, me n*da/chi chwǒm*.

⁹ Wo amu Osówo mú mu o-chi i kanong, ne wo amu a-kan n atyém eten ne ekabe eten a-ri. Chi byibî-banet ba-mîng dyityém ebên, a-kye banet ḿbé mbe ba-chi i kanong eyáré.

¹⁰ Osówo nké mu Onet-Obâm ejí. Nyǐ mu o-nyii ng banet ḿbé mbe ba-chi i ńkyí nyǐ o/sét.

¹¹ Osówo nké mu nkêt mpan mú oo*ryí acît* ne kángkáng nkéré, mu o-két ng mpan o-bên n bambên atyém.

¹² Osówo o/chi o-jee kashwám emen â mbé ba*fí ba-yángê e édúú ebe*. Nyǐ mu o-sep ng búre emen o-kpá ng kámbú byiko.

¹³ Nyǐ mu o-yip ng byibî-byiyám emen o-kan n abán emen nyí baa/mee okwâ ké nyǐ.

¹⁴ Ri eringe nyí bambên atyém mbe ba-kabe ng kyi-kim ne byibî-byěm. Mbé mbe ba-nam m afaníkong ne mbe ba-kwâa ng byisédéng to esét.

¹⁵ Nké mbé bayén mbe ba-róng ng ké boǒtám ebe ḿbú mbé mbe ba-kuu ng ba/fu, banet baróng.

¹⁶ Ké bubwô ámbu, byibî-byěm ḿbyí mbé mbe ba-chi i nké mbyi byi-kyâ kámbé busông. Ne bakân ebe to nké mbe ba-némê e kámbé.

¹⁷ Me mu n-kó ng Óburúkpâbí asǎma ké mpan emen mú ntûntû mú nyǐ mu o-két ng. Me mu n-kwán n ekwan-akpee n-kye Óburúkpâbí mú kyíbóng kyíbóng.