SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 5 - Bokyi Bible

Nshwam-Obâm

¹ Ô Óburúkpâbí, fwôo atông a-jwo byiraa ejí.

² Osówo ejí ne Otu ejí, fwôo atông ké bukyû ejí ḿbú mu n-tii ng n/fu, chwáp mě. Ô Óburúkpâbí, me mu n-fâ nshwam n-kyâ ǒ.

³ Wo amu a-jwo ng ejá ejí ké dyicófóróng. Me mu n-fâ nshwam ké dyicófóróng m-bám m n/fu, faa mě ojá.

⁴ Wo aa*chi Osówo mú byibî-byěm echi byida ǎ enyîn*. Wo aa*ryuu kyibî nang kyibónge ké bushú eyên*.

⁵ Wo aa*man ebwom a-ri bantông byiko*. Kángkáng bambên atyém ba-sa ng ǒ kafâ.

⁶ Wo amu a-man n ne kángkáng bansêt byisédéng ne wo amu a-ciring ng banet-bakân ne bannîm banet.

⁷ Nké ké bubwô-kiǐtí-kyijé eyên, me m-man ebê ké kyise eyên. Me m-man ǒ ekye ofê ké kiǐtí-kyise-kyifen eyên echi ńkyí ociring, n-tíngê kyísí ké bushú eyên n-fé ǒ.

⁸ Óburúkpâbí, me n/jê ne banet-bushwôn n-shwôm. Tông mě eringe nyí ndachi ńkyí wo amu a-ryuu ng. Chi bukwóp eyên wááng eringe nyí me ndacen.

⁹ Baa*tî ké dyityém ne banyá ńkyí banet-bushwôn ejí mbe ba-sét ng*. Obên nké mbé mbe ba-ryuu ng. Ejá ebe nyi e-nyîn n. Nké ee/sú ne kyibî-kaǎnínǐm.

¹⁰ Ô Osówo, két mpan o-bên kámbé a-kye kámbé busông. Kyi/bát ḿbyí mbé mbe ba-nam m byicen kámbé ne bukyû. Ró kámbé ba-dim ké bushú eyên ké bubwô-byibî ebe ḿbyí byi/jê ne ké bunwa ḿbú mbé ba/bírî ne wo.

¹¹ Nké kángkáng banet ḿbé ba/rem ké busi eyên ba/chi ba-jêe. Mbé kángkáng nkéré ba/chi ba-kwán ekwan ké bunyîn-dyityém. Ku banet ḿbé wo amu a-jê ng kámbé. Mbé mbe ké bunyîn-dyityém ḿbú ntûntû ké bubwô eyên.

¹² Óburúkpâbí, wo amu a-jware ng banet ḿbé mbe ba-chi i ńkyí wo a/sét. Kyijé eyên nkyi kyi-ku ng kámbé wǎ kiinku byiko.