Nómba 9 - Bokyi Bible

Nnyinyěng-Dyijî-Kyifen ńkyí Shwôm

¹ Óburúkpâbí o/raa ne Músis ké kyikim-dyikán ńkyí kaku ńké Sána, ké mbwôp kashú-otukáku, ké nnyinyěng-dyije ńdyí banet-Ézerel ba/mîng Éjip. Óburúkpâbí o/raa o/fu,

^2-3 ké ací diǐkpú ne anyii, ké otukáku mún, kyi-fím ké dyikurúku, banet-Ézerel batî dyijî-kyifen ńkyí Shwôm wǎ eringe byije emen kángkáng mbyi.

⁴ Ké bubwô ámbu kâng, Músis o-sét banet-Ézerel o/fu, batî dyijî-kyifen ńkyí Shwôm.

⁵ Ne ké dyikurúku, ké ací diǐkpú ne anyii, ké mbwôp kashú-otukáku, mbé ba/chi éné ké kyikim-dyikán ńkyí kaku ńké Sána. Banet-Ézerel ba/chi kángkáng byěm wǎ eringe nyí Óburúkpâbí o/kye Músis busa.

⁶ Nké banyinchéng bakíri ba/mû ḿbé banet badaciring kámbé, ké nǎ, mbé ba/ta kyikwóm-okúsí, ne mbé ba*da/man etî dyijî-kyifen ńkyí Shwôm ké dyicí ándyi*. Mbé ba/dim ba-kâm Músis ne Éron,

⁷ ne ba-sét kámbé ba/fu, be byi-chi i banet-ociring, ké nǎ, be byi/ta kyikwóm-okúsí, nké ebóng kyi/chi ńkyí ba*da bě emîng byi-kye eyáré nyí Óburúkpâbí ne banet-Ézerel ḿbé áku ké kyikû*.

⁸ Músis o-faa kámbé o/fu, mîng n̂g kpá n-koo bacê ne Óburúkpâbí.

⁹ Óburúkpâbí o-sét Músis

¹⁰ o/fu, osét banet-Ézerel o/fu, ké nkéré mú nang yeě ké burwám enen, nang bwǎn enen nké o/firi onet mú bada ǎ eciring, ké nǎ, o/ta kyikwóm-okúsí, nang mu tíbítíbí ké bucen, nké o/tôong o-ryuu ng o/fu, nyǐ o-chi i dyijî-kyifen ńkyí Shwôm,

¹¹ mîng n̂g ǎ o-chi kánkyí ké nkéré kii/shwôm otukáku obónge, ké dyikurúku, ké ací diǐkpú ne anyii, ké nnyinyěng-otukáku. Ochi kánkyí o-ryí berêt mú ba*da/fé bukye o-mut* ne eshǎan-byichí nyí edaruu.

¹² O*dachi o-mîng byiryíng ámbyi byi-waa tete orî-dyicófóróng* ne o*dachi o-sé kyikúú-wǎn-etám-ebû ámu nang kyibónge*. Ochi dyijî-kyifen ńkyí Shwôm wǎ eringe nyí me n/tî byije emen.

¹³ Nké nang yeě mú mu onet mú ba*fí ba-ciring ng ǎ* ne o*fí kyíjí ké bucen* nké o*da/chi dyijî-kyifen ńkyí Shwôm* baa*kúng ǎ to wǎ onet ejí* ké nǎ, nyǐ o*da mě ekye eyáré ké nkéré mú me n/tî*. Nyǐ o-man o-ri busông ké dyishí-kyibî emen.

¹⁴ Â ocinónet mú mu o-kyú u ne ben mu o-ryuu ng o/fu, nyǐ o-chi i dyijî-kyifen ńkyí Shwôm, nyǐ o-man o-chi kánkyí wǎ eringe nyí me n/tî kángkáng byije emen. Byije ámbyi byibónge byi/ta nang yeě nang yeě, nang oyén-oshê nang ocinónet.

Ófíbí-Bumang-Okwâ

^15-16 Ké dyicí ńdyí ba/bi mpyep mú Óburúkpâbí odakyú, ófíbí o/bacít kámú. Ófíbí ámu o/mû wǎ bumang-okwâ ne buchú.

¹⁷ Nkéré nang orá nké ófíbí ámu o/dim ké mpyep ámu, banet-Ézerel ba-jaa ng oshê, ba-da-bi ké kyikit kyikíri ńkyí ófíbí ámu o/shû kyísí.

¹⁸ Banet-Ézerel ba/mû mbe ba-jaa ng oshê ké busa ḿbú Óburúkpâbí, ba-bi ng okíri ké busa ḿbú emen. Mbé mbe ba-waa ng ké oshê ámu obónge, â ófíbí ámu o/tôong kyíbóng-mpyep mú Óburúkpâbí odakyú.

¹⁹ Nang ófíbí ámu o-waa kyíbóng-mpyep ámu ka-rí chwóó, banet-Ézerel ba-chi ńkyí Óburúkpâbí o/sét, ne mbé baa*dim*.

²⁰ Nkéré okíri, ófíbí ámu o-waa ng kyíbóng-mpyep ámu ké boǒnyín-ací, ne mbé ba-waa ng to ké oshê, ba-jaa wǎ eringe nyí Óburúkpâbí odakye busa.

²¹ Nkéré okíri, ófíbí ámu o-waa ng kyíbóng-mpyep ámu kyi-fím ké dyikurúku kyi-byí ké dyicófóróng, ne mbé ba-dim m â ófíbí ámu o-dim m o-bâ. Nang nkéré orá nké ófíbí ámu o/dim, mbé ba-dim m.

²² Nang kyi/mû kyi/rí ací afee, nang otukáku obónge, nang dyije dyibónge, nang kyi/rí kyi-shwôm éné, mbé baa*dim* â ófíbí ámu o/tôong kyíbóng-mpyep ámu. Nké â ófíbí ámu o/dim, mbé ba-dim.

²³ Mbé ba/mû ba-bi ng oshê, ba-jaa ng ké mǔ, ké ofê mú busa ḿbú Óburúkpâbí o/kye ké ocím mú Músis.