Nómba 36 - Bokyi Bible

Esí nyí e/já Banyinyi

¹ Batu-ashí ḿbé byikû-abóng ké kyikim-banet ńkyí Gyílet ne wǎn-Mákyi, mú wǎn-wǎn-Manáse, mú o/mû wǎn-Josêf, ba/dim ba-kâm Músis ne banet-ashí ḿbé Ézerel ḿbé áku.

² Mbé ba-raa ba/fu, Óburúkpâbí o/kye ǒ busa o/fu, wo akyii esí a-kye banet ḿbé Ézerel ké ámám etwóp. Nyǐ o/kye ǒ to busa o/fu, wo akúng esí nyí Zélófahat mú wǎn-boné eten a-kye bwǎn emen ḿbé banyinyi.

³ Nké zîim a/fu, â mbé ba/bé banyinchéng ḿbé ba/fím kyikû-banet kyikíri, esí ebe kâng e/chi e-já kyikû ánkyi, ne ocím-esí kángkáng mú ba/mû ba/kye bě o/chi o-shû.

⁴ Ké dyije ńdyí byěm esó, ké nkéré mú ba/chi ba-bwa ne kángkáng esí nyí ba/mû ba/shee ba-kye bayén ḿbé ba/mû ne nyǐ, ba/chi ba-kúng byěm-Zélófahat ḿbé banyinyi ba-cibi ne nyí kyikû-banet ńkyí mbé mbe ba-bé ng batyép, ne kyikû eten baa*ri to kányí*.

⁵ Músis kâng o-sét banet-Ézerel ńkyí Óburúkpâbí o/sét, o/fu, ńkyí banet-Manáse mbe ba-sét ng nkyi ntûntû,

⁶ ne ké bubwô ámbu, Óburúkpâbí mu o-sét ng běn o/fu, bwǎn-Zélófahat ḿbé banyinyi ba-man n ebé nang yeě mú mu o-nyîn n kámbé. Nké onet ámu o-man o-fím ké kyikû-banet ńkyí ebe nké nke.

⁷ Esí nyí onet-Ézerel nang orá e-man e-waa ké kyikû-banet emen.

⁸ Onyinyi nang orá mú odaryí bukyû ké esí, ké kyikû-banet ńkyí Ézerel, o-man o-bé onyinchéng mú mbé ba/fím kyikû ánkyi. Ké bukwóp ḿbún, onet-Ézerel nang orá o/chi o-ryí bukyû ké esí nyí banchí emen,

⁹ ne esí ányi ee*ba/chi e-kûfím ké kyikû kyibónge e-jâ ké kyikíri*. Kyikû-banet nang kyirá kyi/chi kyi-kyú ne esí nyí ebe kyi-ca kashú.

^10-11 Ké bubwô ámbu kâng, Mála ne Tyíza ne Hógala ne Myíka ne Núwa ḿbé bwǎn-Zélófahat ḿbé banyinyi ba/chi wǎ eringe nyí Óburúkpâbí o/sét Músis, ne mbé ba/bé banet-kyikû ebe.

¹² Mbé ba/bé batyép ké byikim-banet ḿbyí mbyi ké kyikû-banet ńkyí Manáse mú wǎn-Josêf, ne esí ebe e/waa ké kyikû ńkyí bonchí ebe.

¹³ Ḿbyín nké mbyi byije ḿbyí Óburúkpâbí o/kye Músis o-sét banet-Ézerel ké ndege-esí mú Mówep, ké esim-kace ńké Jódan nyí esû edabyí, fáráng ne Jéríku.