Nómba 12 - Bokyi Bible

Óburúkpâbí o/kye Myíryam Busông

¹ Músis o/mû oo/bé onyinyi mú o/fím [Kúshi,] ne Myíryam ne Éron ba/bîn ǎ ké ńkyí o/chi.

² Mbé ba-raa ba/fu, Óburúkpâbí oo/sét byěm [ké ocím mú] Músis nké nke dí. Nyǐ o*da/sét ne byěm [ké ocím mú] eten dí*. Óburúkpâbí o/jwo ńkyí mbé ba/raa.

³ Músis o/mû onet mú o/mû o-tî ng byiko emen kyísí o-shwôm nang yeě ké ejíí.

⁴ Ké abe ányi, Óburúkpâbí o-raa ne Músis ne Éron ne Myíryam o/fu, me mu n-ryuu ng běn ashí achât n/fu, bâ n̂g ké mpyep mú ndakyú. Mbé ba/ce.

⁵ Ne Óburúkpâbí o/shû o-bâ kyísí ké ófíbí, o-bwom ké ocím-dyifyi mú mpyep ámu, ne o-kó ne ejá kyíbóng kyíbóng o/fu, Éron, Myíryam. Mbé ashí afee ba-tín ba-ca kashú.

⁶ Ne Óburúkpâbí o-raa o/fu, jwo n̂g ńkyí mu m-bâ esét. [Â bamkpábé ḿbé badasét byiraa ejí mbe ké burwám enen,] me n-tông ng kámbé byiko ejí ké chwǒm-akat eri, n-raa ng ne mbé ké barê.

⁷ Ńkyín kyi/yángê ne eringe nyí me ndaraa ne Músis mú ḿgbán ejí. [Me nn/tî ǎ wǎ onet-dyishí mú kángkáng banet ejí ḿbé Ézerel.]

⁸ Ké bubwô ámbu, nyǐ mu o-bwom m ké bushú ejí n-raa ne nyǐ gbúúl, *chí ké atím-ekan*. Nyǐ oo/ri ne eringe nyí me mu. Kyi/cen nǎ ne ben ba-kûraa byiraa ba-bât Músis mú ḿgbán ejí.

⁹ Óburúkpâbí o/mû o-sa ng kafâ ne mbé, ne ké bubwô ámbu, ké nkéré mú nyǐ o/dim,

¹⁰ ne ófíbí ámu o-mîng mpyep mú Óburúkpâbí odakyú, enyam-byiko nyí Myíryam e/waa ké abe ányi e-firi ne kyibî-erwôm, e-yángê e-firi kpárádádát wǎ abíp. Ké nkéré Éron o/bírî o-tún Myíryam ne o-ri o/fu, kyibî-orwôm-enyam-byiko kii/kám Myíryam,

¹¹ Éron o/raa ne Músis o/fu, kamgbe, bonchí, *da bě echi byi-ri busông ḿbún ké bubwô-enyam-kyibî eten*.

¹² *Da ǎ emîng o-firi wǎ chwǒm ńkyí ba/fwon kiǐkpúkpú* ńkyí kyicê-enyam-byiko emen kii/fwoo*.

¹³ Músis o-tii kâng o-kó Óburúkpâbí o/fu, ô Osówo, chi ǎ o-nyange.

¹⁴ Óburúkpâbí o-faa o/fu, â bonchí emen o/mû o/shú ǎ akorong ké bushú, nyǐ o/mû o/chi o-waa ne ecábé emen ké ací káchâtkányi. Ké bubwô ámbu, *da ǎ emîng o-nung ké kafâ-oshê* tete ací káchâtkányi a-man, ne ba-bâ ne nyǐ ké kafâ-oshê.

¹⁵ Ba/fín kafâ-oshê ba-mîng Myíryam o-waa kyíjí ké ací káchâtkányi, ne banet-Ézerel ba*da/dim* tete ba-bâ ne Myíryam ké kafâ.

¹⁶ Mbé ba-dim kâng ké Házerot ba-da-bi oshê ké kyikim-dyikán ńkyí Páran.