Nómba 10 - Bokyi Bible

Biintán ḿbyí ba/chi ké Syílyíba

¹ Óburúkpâbí o-raa ne Músis o/fu,

² chi biintán byifee ké syílyíba mú ba/díp obíbíng, eringe nyí badakúng ba-kûkó banet ba-cibi kyikit kyibónge, ne ké oshê ejaa.

³ Ké nkéré baa/jwá biintán ámbyi byifee ka-bwon, banet-oshê kángkáng ba/chi ba-cibi kyikit kyibónge ba-wâng ǒ ké ocím-dyifyi-mpyep ejí.

⁴ Nké â ba/jwá ntán obónge nké nke, banet-ashí ebe kâng nké nke ba/chi ba-cibi kyikit kyibónge ne wo.

⁵ Â ba/jwá biintán ké kaǎnyín-nkéré, byikû-banet ḿbyí byi/bi boompyep ebe ké kyicê-mpyep ejí ńkyí óbyísû mu o-byí i byi/chi byi-dim.

⁶ Â ba/chîjwá biintán ké kaǎnyín-nkéré, ké nnyinyěng-nkéré, byikû-banet ḿbyí kyicê ńkyí busyísen byi/chi byi-dim. Ké bubwô ámbu, biintán ejwá ké kaǎnyín-nkéré, ányi ḿbyí badabú boompyep ba-dim.

⁷ Nké eringe nyí badakó oshê omúmú ba-cibi kyikit kyibónge, ba-jwá ng biintán ka-bwon.

⁸ Bwǎn-Éron ḿbé mbe banchi kyifen-Osówo nké badakûjwá biintán ámbyi. Ba/chi ba-tî kyije ńkyín kángkáng nkéré mú mu o-bâ.

⁹ Ké nkéré ba-kú ba-nwa ng byití ké esí enen, ba-ku ng byiko enen ké abwô nyí banet-bushwôn enen ḿbé mbe ba-kyâ běn bunwa, jwá n̂g biintán ḿbyín wǎ ekap nyí byití eróng. Me Osówo Óburúkpâbí enen n/chi n-zîim běn n-nyii běn ké abwô nyí banet-bushwôn enen.

¹⁰ Ké bankéré ḿbé bunyîn-dyityém to, wǎ ḿbé ajî-byifen enen ḿbyí otukáku mú ofyîfî, ne ḿbé ajî-byifen enen byikíri, jwá n̂g biintán ámbyi ké nkéré ba-kú ba-chi i byifen enen ḿbyí byirim-byitú eshí ne byifen ḿbyí okwáre ne Óburúkpâbí. Me kâng n/chi n-chwáp běn. Me n-chi i Osówo Óburúkpâbí enen.

Banet-Ézerel ba/jaa Oshê

¹¹ Ké ací bujam, ké nnyinyěng-otukáku, ké nnyinyěng-dyije, kyi-fím ké nkéré mú banet-Ézerel ba/dim ba-mîng Éjip, ófíbí mú o/mû o/cít kyíbóng-mpyep mú Óburúkpâbí odakyú o/dim,

¹² ne banet-Ézerel ba-kpet bucen ebe, ba-dim ké kyikim-dyikán ńkyí kaku ńké Sána. Ófíbí ámu o/shû kyísí ké kyikim-dyikán ńkyí Páran.

¹³ Mbé ba/kpet ecen ba-câ ké busa ḿbú Óburúkpâbí o/kye ké ocím mú Músis.

¹⁴ Ne nang nkéré orá mú mbé ba/dim, mbé mbe ba-dim m ké bunye ké bunye eringe ebónge ebónge. Byikim-banet ḿbyí byidacen ne ekap nyí banet ḿbé Júda ké kyikû nké byi/bwóp kashú, byi-cen n ké bunye ké bunye, ne Náshwon mú wǎn-Amínádap wǎ onet-dyishí.

¹⁵ Netánel mú wǎn-Zúwa o/mû onet-dyishí-kyikû-banet ńkyí Ézaka,

¹⁶ ne Élyap mú wǎn-Hélon o/mû onet-dyishí-kyikû-banet ńkyí Zébélon.

¹⁷ Ne ba/bú kâng mpyep mú Óburúkpâbí odakyú, ne byikim-banet ḿbyí Géshon ne Merári, ḿbyí mbyi byi-yip ng kámú byi-dim.

¹⁸ Ké nnyinyěng, byikim-banet ḿbyí byidacen ne ekap nyí banet ḿbé Rúben ké kyikû nké byi/dim ké bunye ké bunye, ne Elyízu mú wǎn-Shádu wǎ onet-dyishí.

¹⁹ Shelúmyel mú wǎn-Zúryishadyâ o/mû onet-dyishí-kyikû-banet ńkyí Syímyon,

²⁰ ne Elyǎsap mú wǎn-Dúwel o/mû onet-dyishí-kyikû-banet ńkyí Gât.

²¹ Kyikim-banet ńkyí Kóhat, ńkyí banet-Lyíva kâng ba/dim ne byěm-ociring ḿbyí badayip. Ne mbé ba-kûribi ké nnyinyěng-oshê, ányi baa/chîbi mpyep mú Óburúkpâbí odakyú.

²² Ké nnyinyěng, byikim-banet ḿbyí byidacen ne ekap nyí banet ḿbé Éferem ké kyikû nké byi/dim ké bunye ké bunye, ne Elyíshama mú wǎn-Amyíhut wǎ onet-dyishí.

²³ Gamályel mú wǎn-Pédazu o/mû onet-dyishí-kyikû-banet ńkyí Manáse,

²⁴ ne Abyídan mú wǎn-Gyídyonyi o/mû onet-dyishí-kyikû-banet ńkyí Běnjámin.

²⁵ Ké nkuli kyikû, byikim-banet ḿbyí byidacen ne ekap nyí banet ḿbé Dǎn ké kyikû, ḿbyí mbyi byi-bám m kángkáng banet ké esim, byi/dim ké bunye ké bunye, ne Ahéze mú wǎn-Amyíshadyâ wǎ onet-dyishí.

²⁶ Págyel mú wǎn-Ókaran o/mû onet-dyishí-kyikû-banet ńkyí Ásha,

²⁷ ne Ahíra mú wǎn-Énan o/mû onet-dyishí-kyikû-banet ńkyí Nafatályi.

²⁸ Ké dyizong-bukwóp ḿbún kâng nké ba/mû ba-cen n ké bunye ké bunye, nkéré nang orá mú banet-Ézerel ba/jaa oshê ba-dim.

²⁹ Músis o-raa ne Hóbap mú wǎn-boné-onyi emen, mú wǎn-Jétoro, mú onet-Médyan, o/fu, be byi-kú byi-bâ edim ḿbú kyikit ńkyí Óburúkpâbí o/fu, nyǐ o-kyâ bě. Nyǐ o/ryí bě ocím o/fu, nyǐ o-chi i bě byi-já byěm chwóó. Ké bubwô ámbu, bâ ne be ké kyikû, ne wo a/chi a-ryí kanong ánke ne be.

³⁰ Hóbap o-faa o/fu, aa*wááng*. Me mu m-bwa ng esim dyijê ké oshê ejí.

³¹ Músis o-raa o/fu, kamgbe, *dadim*. Wo amu a-nyît ng kyikit ńkyí be byidaman ebi oshê ké kyikim-dyikán, ne wo a-man n bě ekyú ntông bukwóp.

³² Â wo amu a-bâ ne be ké kyikû, wo a-já ng kángkáng banjware burwám ne be ḿbé Óburúkpâbí mu o-kyâ bě.

Banet-Ézerel ba/dim Bucen

³³ Ké nkéré banet-Ézerel ba/dim ké kaku ńké Sána, ńké ka/já Óburúkpâbí, mbé ba/cen bucen ké ací achât. Mkpukpu-byěm-Óburúkpâbí o/ce kámbé kángkáng nkéré eringe odakyé kyikit o-tî kámbé ńkyí mbé badabi oshê.

³⁴ Ófíbí mú Óburúkpâbí o/cít kámbé ké esû, ké nkéré mbé ba-kú ba-jaa ng ké oshê nang orá.

³⁵ Nang nkéré orá nké ba/kpet edim ne mkpukpu-byěm-Óburúkpâbí, Músis o-raa ng o/fu, Óburúkpâbí, bûu a-chi banet-bushwôn eyên ba-firi byiryibyiryi, a-chi banet ḿbé wo amu a-sa ng kámbé kafâ ba-chêe.

³⁶ Ne nang ké nkéré orá nké ba/bwom ne mkpukpu-byěm-Óburúkpâbí ámu, Músis o-raa ng o/fu, [Óburúkpâbí, bwa esim a-kâm égot-byikû-banet ḿbé Ézerel.]