MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 7 - Bokyi Bible

Otánge mú Banet ḿbé Kpákpá

¹ Banet-ncibi mú badakó Fárasyî ne kyicê-bantánge Byije-Músis bakíri ḿbé ba/fím Jerúsélem ba/bê ba-kâm Jisos.

² Mbé ba/ri ba/fu, bǎmgbán-Jisos bakíri mbe ba-ryí i byiryíng abwô ba*da/soo* ányi kyi/byí, ba*dasoo kányí wǎ eringe nyí banet-Fárasyî ba/fu, banet bakûsoo*.

³ Ké ebóng, banet-Fárasyî ne kángkáng banet-Jûs mbe ba-chi i byěm ké bukwóp ḿbú banchí ebe ḿbé kpákpá ba/tángê kámbé. Mbé baa*ryí byiryíng* tete ba-soo abwô ebe ké ochíchí-bukwóp ḿbú badasoo kányí.

⁴ Mbé to baa*ryí chwǒm nang kyibónge ńkyí kyi/fím ké kasî* tete mbé ba-bwóp kpá kashú ba-soo kánkyí. Ba-tî ng to byije byikíri chwóó wǎ eringe banchí ebe ḿbé kpákpá ba/sét kámbé, wǎ ochíchí-bukwóp ḿbú badasoo bammîk ne butí ne bǎmkpângokunge ne buríng.

⁵ Ne banet ḿbé Fárasyî ne bantánge Byije-Músis ba-bí Jisos kâng ba/fu, ebóng bǎmgbán eyên baa*chi byěm ké bukwóp ḿbú banchí eten ḿbé kpákpá ba/tángê bě*. Mbé ba/bwa mbe ba-ryí i byiryíng abwô ebe baa*soo*.

⁶ Jisos o-faa kámbé o/fu, ben ba-chi i bannîm banet. Azáya mú mkpábé mú odasét byiraa-Osówo o/raa ntûntû ké nkéré nyǐ o/jwo ne Osówo ne o-sét kyi-kim ne ben, wǎ eringe o/sáng o/fu, Osówo o/fu, banet ḿbén ba-kyâ mě ofê ké ejá éja, nké atyém ebe nyi byikit byikíri.

⁷ Mbé mbe ba-fâ mě dyikáá, ké ebóng, mbé mbe ba-tángê e byije ḿbyí banet ba/chi, wǎ me nké n/chi kámbyí.

⁸ Ne Jisos o-sét kámbé o/fu, ben baa/né byije ḿbyí Osówo, ba-koo ḿbyí banet ba/tángê.

⁹ Jisos o-chîraa ne mbé o/fu, ben baa/kúng byinyídíng ba-né byije-Osówo, eringe nyí ben badatî byije enen ḿbyí bamu ba-tángê e.

¹⁰ Ké ebóng, Músis o/kye kyije o/fu, fé ńchân ne ńnân. Nang yeě nké o/raa kyibî-chwǒm kyi-kim ne bonchí nang ne boné emen, ba-man n ba-ju ǎ.

¹¹ Nké ben bamu ba-tángê e ba/fu, â onet mu ne chwǒm ńkyí odakúng o-nyángê bonchí nang boné emen, nké onet ámu o/bwa o/fu, ńkyín něen kobân, ányi kyi/byí, kyi/já Osówo,

¹² kyije kyi*da ǎ echîkám* nang o*da/chîchwáp bonchí nang boné*.

¹³ Ké dyizong-bukwóp ḿbún, ben bamu ba-né ng ejá nyí Osówo ké byěm ḿbyí bamu ba-tángê e barî-banet. Azong-byěm akíri nyi kô chwóó to nyí nyi wǎ ńkyín, nyí ben bamu ba-chi i.

Byěm ḿbyí byidachi Onet ne o-firi Onet mú bada ǎ eciring

¹⁴ Jisos o-chîkó kâng bujê-banet ámbu ne o-raa ne mbé o/fu, fwôo n̂g atông enen ba-jwo mě, ben ashí amúmú, eringe nyí badanyît kyikû.

¹⁵ Chwǒm kyi*fí* ńkyí onet odaryí o-fé ké dyifít* ńkyí kyida ǎ echi o-firi onet mú bada ǎ eciring*. Nké ńkyí kyidafím ké kafâ-dyityém-onet nké kyidachi onet ámu o-firi onet mú bada ǎ eciring. [

¹⁶ Fwôo n̂g atông ba-jwo, â bamu ne atông nyí badajwo.]

¹⁷ Ké nkéré mú Jisos o/mîng bujê-banet ámbu ne o-dim o-nung ké kyise, bǎmgbán emen ba-bí ǎ kyi-kim ne dyitím-ekan ńdyín.

¹⁸ Jisos o-raa ne mbé o/fu, ben to ba*fí ne bubong ba-shwôm banet ḿbé áku*? Ben ba*fí ba-nyît ng kyikû dí*. Chwǒm kyi*fí* ńkyí onet odaryí o-fé ké dyifít* ńkyí kyida ǎ echi ké ntûntû o-firi onet mú bada ǎ eciring*.

¹⁹ Ké ebóng, nkyí kyi-jâ ǎ ké kafâ-dyifít emen, *chí ké kafâ-dyityém emen* ne kyi-cen kâng ké enyam-byiko kyi-byí kyíjí. Ńkyí Jisos o/raa něen o/tông wááng o/fu, kángkáng byiryíng byi/kwárê ḿbyí badaryí.

²⁰ Ne o-chîraa o-ca kashú o/fu, ńkyí kyidafím onet ké kafâ-dyityém nké kyida ǎ echi o-firi onet-ociring.

²¹ Ké ebóng, ńkyí kyidafím ké kafâ-dyityém-onet nké kyida ǎ echi o-já byibî-okabe ḿbyí odachi byibî-byěm, wǎ kajii ejii ne banet eju ne

²² byinam echi ne byěm eshwam, ne o-chi to kángkáng byibî-byěm byikíri, wǎ banet enîm ne byibî-acáá echi ne kafâ esa ké byěm-banet ne banet eram ne byiko etông ne enyam eróng.

²³ Kángkáng byibî-byěm ḿbyín byi-fím m ké kafâ-dyityém-onet ne byi-chi ǎ o-firi onet mú bada ǎ eciring.

Onyinyi mú o/fé Dyityém Emen ne Jisos

²⁴ Jisos o-dim kâng o-wâa kyicê ńkyí Táya. O-da-nung ké kyise kyibónge. Nyǐ o/mû o*fí o-ryuu ng o/fu, onet nang obónge onyît o/fu, nyǐ mu ányi*. Nké oo*man erem byiko emen*.

²⁵ Onyinyi obónge mú wǎn emen mú onyinyi mu ne kyibî-bucí o-jwo kyi-kim ne Jisos, ne o-waa ké abe o-bâ o-kâm ǎ. O-myii Jisos ké byiká.

²⁶ Onyinyi ámu o/mû ocinónet. Ba/fwon ǎ ké oshê mú badakó Fonésha, mú mu ké kyikim-esí ńkyí Syírya. O-tîm Jisos arông o/fu, oró kyibî-bucí ńkyí nkyi wǎn emen ké byiko.

²⁷ Nké Jisos o/faa o/fu, mîng byi-nen ḿbé bwǎsíng kpá. Kii*nwa ńkyí byidakúng byiryíng ḿbyí ḿbé bwǎsíng byi-kye boǒbyî*.

²⁸ Mú onyinyi ámu o-faa o/fu, bonchí, ké nang boǒbyî ḿbú mbu ké dyifít-ókpákpúrúk-byiryíng bu-ryí i ekén-byiryíng-bwǎsíng nyí e/waa kyísí.

²⁹ Jisos o-raa kâng ne nyǐ o/fu, ké bubwô ḿbú a/faa éné, a-man n edim dyijê, kyibî-bucí ánkyi kii/byí wǎn eyên ké byiko.

³⁰ Onyinyi ámu o-bwa esim dyijê, o-da-ri wǎn emen ámu sáre ké karíng. Kyibî-bucí ánkyi ntûntû kii/byí ǎ ké byiko.

Jisos o/chi Onyinchéng mú o/mû Kiǐmyímé o-kpet eraa

³¹ Jisos o-mîng kâng Táya, o-cen ké kiǐfáng ńkyí esí nyí badakó Eshê Diǐkpú, ányi oo/shwôm Sádon, ne o-ribi ké baya ḿbé Gályílyi.

³² Banet ba-bâ ne onyinchéng obónge mú oo*jwo atông* oraa to oo*man eraa kanong* ba-kâm Jisos. Ne ba-kpet Jisos arông etîm ba/fu, oyip bubwô emen o-ta mú kiǐmyímé ámu.

³³ Jisos o-kpî kâng mú kiǐmyímé ámu nké nke o-dim ne nyǐ, o-mîng kángkáng banet cát, o-fé ǎ efwa ké atông. O-shú akorong o-ta ǎ to ké kabyíbabang.

³⁴ Ne Jisos o-bírî achi o-tún kyíbóng, o-rime ké kyikû-omiríng, ne o-raa ne mú onyinchéng ámu o/fu, éfata, ányi kyi/byí, bâa.

³⁵ Atông nyí onyinchéng ámu a-waa ké abe ányi a-bâa. Kabyíbabang emen ka-waa ké abe ányi to ka-firi, ne onyinchéng ámu o-kpet eraa kanong kanong.

³⁶ Ne Jisos o-nyibi kángkáng banet ḿbé ba/mû ányi atông o/fu, ba*dachi ba-sét nang onet obónge kánkyí*. Nké â Jisos o/nyibi onyíbíng kámbé atông, ányi nké mbé badasét osédéng kánkyí.

³⁷ Kángkáng banet ḿbé ba/jwo kánkyí byiko byi/kaa kámbé. Ne mbé ba-kpet eraa ba/fu, nang ké Jisos odaman echi kángkáng byěm kerededet. Nyǐ o-man n echi nang banet ḿbé baa*jwo atông* ba-kpet ejwo, nang ḿbé baa*man eraa* ba-kpet eraa.