MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 4 - Bokyi Bible

Dyitím-Ekan kyi-kim ne Onet mú o/kwón Esang-Byichí

¹ Jisos o-chîkpet etángê ké baya ḿbé badakó Gályílyi. O-da-nung ké ókpǐ, o-kyú me, ké ebóng, banet ḿbé ba/mû ba/wáp ǎ ba-fé ké kafâ ba/mû ba/jê ba-shwôm. Ókpǐ o/mû ké kafâ-kace, bujê-banet ámbe ba-bwom ké nkwon, ké bukô-kace.

² Nyǐ o/tángê kámbé byěm chwóó ké atím-ekan, ne ké nkéré mu o-tángê e éné, o/raa ne mbé o/fu,

³ fwôo n̂g atông ba-jwo. Onyinchéng obónge o/dim esang-byichí epwó.

⁴ Ké nkéré mú nyǐ mu o-pwó ng kányí o-câ ké kafâ-kyifát emen, esang ekíri e/róng ké kiǐfáng, bunurung bu-ba-ryí kányí.

⁵ Ekíri e-róng ké katárábá, kyikit ńkyí ecing e*da/jê*. Ka*da/rí* esang ányi e-byí, ké ebóng, ecing e*da/jê*.

⁶ Ké nkéré esû e/byí kâng, e/shí boǒsín-esang-byichí ámbu, bu-waa to ányi ké abe bu-jwóm, ké ebóng, eriri ebe e/mû e*da/kán e-jâ kyísí kanong kanong*.

⁷ Esang ekíri e-róng ké kyikit ńkyí byiwong byíwong, ḿbyí byi/kán byi-tím boǒsín-esang-byichí ámbu. Ne bu-waa éné, bu*da/zím esang*.

⁸ Nké esang ekíri e/róng ké kyikit-ecing ńkyí kyinong. E-byí, e-kán, e-zím barî-esang. Asín akíri a/zím esang bujam esim diǐkpú, akíri bajam-esang bachât, akíri bajam-esang batánge.

⁹ Ké nkuli kyikû, Jisos o/fu, kû n̂g ejwo kâng, â ben bamu ne atông nyí badajwo.

Chwǒm ńkyí kyi/chi ne Jisos o-raa ké Atím-Ekan

¹⁰ Ké nkéré mú Jisos o/firi kǎnchí, kyicê-banet kyikíri ńkyí kyi/jwo byiraa emen kyi/bê ne bǎmgbán emen ḿbé ashí diǐkpú ne afee ba-kâm ǎ. Ba-bí ǎ ba/fu, osét kámbé dyishí-atím-ekan ányi.

¹¹ Jisos o-faa kámbé o/fu, ben baa/jwo ńkyí nkyi Osówo ké dyityém kyi-kim ne Butu emen. Nké banet bakíri ḿbé mbe kú cát ba-jwo ng kángkáng byěm ké bukwóp ḿbú atím-ekan.

¹² Eringe nyí nang ba-tún túntún, baa*ri*. Nang ba-fwôo atông fwôofwôo, baa*jwo dyishí*. Ké ebóng, â ba/jwo dyishí, ba/chi ba-bírî ba-kâm Osówo, ne nyǐ o/chi o-pwoo kámbé.

Jisos o/sét eringe Dyitím-Ekan kyi-kim ne Onet mú o/kwón Esang-Byichí dyi/byí

¹³ Jisos o-bí kámbé kâng o/fu, ben ba*fí ba-nyît ng eringe nyí dyitím-ekan ńdyín dyi/byí dí*. Aa ben ba-cen n nǎ kâng ne ba-kûnyît eringe nyí dyitím-ekan nang dyibónge dyi/byí.

¹⁴ Onet mú o/pwó esang-byichí ányi o/kwón byiraa-Osówo.

¹⁵ Nkéré otô, byiraa-Osówo ámbyi byi-róng ng ké kiǐfáng. Banet ḿbén ba/jwo kámbyí, nké mbé ba-jwo ng kámbyí ba-bâ, Sátan mú mu Otu-Byibî-Barím o-bâ o-ba-fîm byiraa ámbyi ḿbyí byi/mû bii/nung kámbé ké atyém.

¹⁶ Banet bakíri mbe wǎ esang-byichí nyí e/róng ké katárábá. Mbé ba-jwo ng byiraa-Osówo ba-bâ, ba-koo kámbyí ne bunyîn-dyityém.

¹⁷ Nké byi*da/nung kámbé ké atyém ebe kanong kanong* ne bii*rí byi-bwon*. Ké nkéré mú busông ne afaníkong bii/bê ké bubwô-byiraa-Osówo ámbyi, mbé ba-waa ké abe ányi ba-né.

¹⁸ Banet bakíri mbe wǎ esang-byichí nyí e/róng ké kyikit ńkyí byiwong byíwong. Ḿbén ba-chi i banet ḿbé ba/jwo byiraa-Osówo,

¹⁹ nké okabe kyi-kim ne dyikpen ńdyín ne kyijé ńkyí akpuga ne kángkáng byěm byikíri eryuu byi-bâ byi-ba-nung ké atyém ebe pwat, byi-cít byiraa-Osówo, mbé ba-waa éné, baa*zím byirim*.

²⁰ Nké banet bakíri mbe wǎ esang-byichí nyí e/róng ké kyikit-ecing ńkyí kyinong. Mbé ba-jwo ng byiraa-Osówo, ba-koo kámbyí, ne ba-zím byirim. Bakíri esang bujam esim diǐkpú, bakíri bajam-esang bachât, bakíri bajam-esang batánge.

Otyuryíkáng mú ba/mee ba-cít Dyicáng

²¹ Jisos o-chîraa o-ca kashú o/fu, onet mu kô nang obónge mú odabê ne otyuryíkáng meemee o-yip dyicáng o-cít kámú dí. O-tî nang kámú ké dyifít-karíng dí. Oo*kúng kámú o-twôom ké kyikit ńkyí mbe ba-twôom m dí*.

²² Nang ebóng chwǒm ńkyí ba/rôo kánkyí, ba/chi ba-byí ne nkyí kyíjí. Nang ebóng chwǒm to ńkyí ba/cít kánkyí, ba/chi ba-bâa.

²³ Kû n̂g ejwo kâng, â bamu ne atông nyí badajwo.

²⁴ O-raa ne mbé to o/fu, tî n̂g atông ké ńkyí bamu ba-jwo ng. Azong-byije nyí ben bamu ba-yip ng ba-pan n barî-banet mpan, nyǐ nké Osówo o/chi o-yip to o-pan běn mpan, nké mú enen o/chi o-bên o-shwôm.

²⁵ Onet mú mu ne chwǒm ba/chi ba-kye ǎ kyi-jê kyi-shwôm éné. Onet mú o*fí ne chwǒm* nang kaǎnyín ńké mu ne nké ba/chi ba-koo ǎ kánké.

Dyitím-Ekan kyi-kim ne Osang-Kyichí mú mu o-kán n

²⁶ Jisos o-chîraa o/fu, Butu ḿbú Osówo mbu něen wǎ onyinchéng mú o/kwón esang-byichí ké kyifát emen.

²⁷ Ne buchú, o-rí o-rê, o-jwóbê ké dyicófóróng, o-chi i byěm emen o-câ. Ké kángkáng nkéré ámu, esang-byichí ányi nyi e-byí i, e-kán n e-câ. Nké eringe nkyi kyi-cen n ne kyi-chi, nyǐ oo*nyît*.

²⁸ Ecing eyén nké edachi boǒsín-byichí ámbu bu-kán, ne bu-kpet ezím. Ké mbwôp kashú, mpyî o-byí i, ne ekong e-ba-byí, ne ké nkuli kyikû, byirim ne esang byi-chi.

²⁹ Ké nkéré mú esang-byichí ányi ee/kán, onyinchéng ámu o-kpet bǎmkpóngé echi ne kashwám emen, ké ebóng, nkéré oo/fyi mú badabóng kányí.

Dyitím-Ekan kyi-kim ne Kaǎsáng-Kyichí ńké badakó Mósatat

³⁰ Jisos o-bí o/fu, be byi-fu ng Butu ḿbú Osówo mbu wǎ ebóng. Ebóng dyitím-ekan ńdyí be byidatím, eringe nyí byidasét kyikû ńkyí Butu ḿbú Osówo.

³¹ Butu ḿbú Osówo mbu wǎ kaǎsáng-kyichí ńké badakó mósatat, nké ka/sîi ka-shwôm osang-kyichí nang orá ké ejíí ńnyín. Onet o-yip ng kánké o-kwón ké ecing.

³² Ké kaǎnyín-nkéré, ka-kán ka-firi kiǐsín-kyichí ńkyí kyi/rêe kyi-shwôm kyichí nang kyirá. Bunurung bu-kûchi aju ké busi emen, ké ebóng, kii/chi byire ḿbyí byiryên byiryên.

³³ Jisos o/sét banet bǎmpém emen ké atím-ekan akíri chwóó wǎ ńnyín. O/sét kámbé kanong kanong, eringe nyí badaman efwôo atông ba-jwo dyishí.

³⁴ Nang ké nkéré orá nang orá, o-raa ng ne mbé ké atím-ekan nyǐ nyi. Nké â o/kyú kǎnchí ne bǎmgbán emen mbé mbe, o-kpet esét kámbé kángkáng byěm eringe byi/byí.

Jisos o/chi Afú nyí Aryên a-mîng etugi

³⁵ Ké dyikurúku, ké ochíchí-dyicí ándyi, Jisos o-raa ne bǎmgbán emen o/fu, byinyáng n̂g byi-dim esim-baya nyí áku.

³⁶ Ba-mîng kâng bujê-banet ámbu ányi. Bǎmgbán emen ba-da-nung ké ókpǐ mú Jisos o/mû oo/wá o-nung ké kafâ, ba-yip ǎ ba-dim. Ékpǐ ekíri to e/mû e/cen ne nyǐ.

³⁷ Afú nyí aryên aryên a-kpet etugi kakân kakân. Baya ba-kpet enáng, ba-chi i omu o-nung ng ké ókpǐ. Omu o/mû o-kú o-bâ esú ké ókpǐ.

³⁸ Jisos o/mû ké kyikû-ókpǐ o-rê ng ne dyishí emen twóóm ké kyichí-dyishí. Bǎmgbán emen ba-jwóbê ǎ ba/fu, ntánge byiraa-Osówo, wo a*fí a-kérê ng a/fu, be byi/firi ké bukyû ekpú dí*.

³⁹ Jisos o-bûu nensang o-kye busa o/fu, afú, mîng etugi. O-raa ne baya o/fu, mîng enáng. Afú a-mîng. Byikit kángkáng byi-chee beem!

⁴⁰ Ne Jisos o-raa ne bǎmgbán emen o/fu, ebóng bamu ba-shî ng. Ben ba/tôong ba*fí ba-fâ atyém enen ne me dí*.

⁴¹ Nké mbé ba/mû ba-shî ng kanong kanong, ne ba-kpet eraa ne barî ba/fu, nyín ebóng dyizong-onet něen, mú nang afú ne kace byida ǎ ekye ofê.