MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 16 - Bokyi Bible

Ojwóbe ké Bukyû mú Jisos

¹ Ńdyí dyicí-ékwâbashi ńdyí banet-Jûs dii/shwôm, Salóme ne Méryi mú o/fím Mágádála ne Méryi mú boné-Jêmsyi ba/ré bakút ḿbé badanyîn kyinung ba/fu, mbé ba-da ng esabe ké kyikwóm-okúsí-Jisos.

² Pirípirí ké orî-dyicí, ányi ké dyicí-ékwâbashi, ké nkéré esû ee/byí, mbé ba/dim ba-wâa ké dyikun.

³ Ké nkéré mbe ba-cen n ba-câ ké bukwóp, ba/kpet eraa ne barî ba/fu, yeě o/chi o-bírî bě buká ḿbú mbu ké ocím-dyikun.

⁴ Buká ámbu bu/mû bu/rêe kanong kanong. Ne mbé ba-bírî kâng achi ba-ri ké buká ámbu boo/bírî bu/firi ké bukô.

⁵ Ne mbé ba-nung ké dyikun, ba-ri wǎn-kyisat ányi me ké kyicê ńkyí bubwô-etyebéng ne ágbádá nyí kpárádádát ké byiko. Ne mbé ba/waa ocím ké dyishí fúú.

⁶ Ne nyǐ o-raa ne mbé o/fu, ofong o*da běn ekédê*. Me mu n-nyît ng n/fu, ben bamu ba-kyé ng Jisos mú o/fím Názáret, mú ba/mû ba/mán ǎ ké kyikwap ńkyí badashwân onet. O*fí nyín*. Osówo oo/jwóbê ǎ ké bukyû. Kan n̂ achi ba-ri, nyín nké ba/mû ba/ren ǎ.

⁷ Nké ca n̂g ba-da-sét bǎmgbán emen cibicibi ne Pyíta ńkyín, ba/fu, nyǐ oo/bwóp běn kashú mu o-câ ḿbú Gályílyi. Ányi nké ba/chi ba-ri ǎ, wǎ eringe nyí o/mû o/sét běn.

⁸ Ne mbé ba-byí kâng ké dyikun, ba-zóngê e ba-câ, ké ebóng, bushî bu/mû boo/sú kámbé ké dyityém. Ba*da/sét onet nang obónge chwǒm* ké ebóng, ba/mû mbe ba-shî ng. [

NKULI KYIKÛ-BǍMPÉM ḾBÉ MÂK, MÚ KPÁKPÁ Jisos o/byí o-kâm Méryi mú o/fím Mágádála

⁹ Ńdyí Jisos o/jwóbê ké bukyû, pirípirí ké dyicí-ékwâbashi, nyǐ o/byí kpá o-kâm Méryi mú o/fím Mágádála, mú nyǐ o/mû o/ró ǎ byibî-bací káchâtkányi ké byiko.

¹⁰ Méryi o-dim o-da-sét banet ḿbé ba/mû ne Jisos kpákpá. Banet ámbe ba/mû mbe ba-ta ng dyikán ba-tii ng.

¹¹ Ne ké nkéré ba/jwo ńkyí Méryi o/sét kámbé o/fu, Jisos mu okpó, nyǐ o/ri ǎ ké achi, mbé ba*da/bángê ne nyǐ*.

Jisos o/byí o-kâm Bǎmgbán Emen Ashí Afee

¹² Ké nkéré mú ńkyín kii/shwôm, Jisos o/byí ké dyizong-onet dyikíri o-kâm bǎmgbán emen ashí afee ké nkéré mú ba/dim ké oshê mbe ba-cen n ba-câ.

¹³ Mbé ba-bwa esim ba-da-sét bábe ḿbé áku, nké bábe ámbe ba*da/bángê*.

Jisos o/byí o-kâm Bǎmgbán Emen Ashí Diǐkpú ne Din

¹⁴ Ké nkuli kyikû, Jisos o/byí o-kâm bǎmgbán emen ashí diǐkpú ne din ké nkéré mú mbe ba-ryí i byiryíng. O-kpet ebîn kámbé, ké ebóng, ba/mû ba*fí ba-tî ng atyém ebe ne nyǐ* ne ké atyém ebe to erêe, ké ebóng, mbé ba*da/bángê ne banet ḿbé ba/ri ǎ okpó*.

¹⁵ Ne o-raa ne mbé o/fu, ca n̂g kâng ké ejíí emúmú ba-sét ng kángkáng banet Bǎmpém ḿbé Banong ba-câ.

¹⁶ Nang yeě nké o/bángê ne dyityém emen ne ba-kye ǎ to osoo mú Osówo, Osówo o/chi o-nyii ǎ. Nang yeě nké o*da/bángê* Osówo o/chi o-pan ǎ kyibî-mpan.

¹⁷ Banet ḿbé ba/tî atyém ebe ne me ba/chi ba-kûtông ekap-busa ńnyín. Ba/chi ba-kûró byibî-bací ké dyizîn ejí. Ba/chi ba-kûraa ejá nyí banet ba*fí ba-jwo ng kyikû*.

¹⁸ Chwǒm kii*ba/chi kyi-chi kámbé* â nang ba/níbî efyi ké abwô* nang ba-jwáp kyibî-bukye*. Ba/chi ba-kûtwôom banet-byirwóm abwô ké byiko, erwôm ebe e-man.

Osówo o/yip Jisos o-jâ ne Nyǐ Kyíbóng

¹⁹ Ké nkéré mú Jisos, Otu Kyítá oo/pem ne mbé, Osówo o/kúng ǎ o-yú o-jâ kyíbóng, o-da-kyú ké kyicê-bubwô-etyebéng emen.

²⁰ Bǎmgbán emen ba-dim ba-sét ng Bǎmpém ḿbé Banong ba-câ ké kángkáng byikit. Otu Kyítá o-chwáp kámbé, ne o/tông o/fu, bǎmpém ebe mbe ntûntû, ké ekap nyí busa nyí o/kye kámbé mbe ba-chi i.] [ 9 Ḿbé banyinyi ámbe ba-dim ba-kâm Pyíta ne bacín emen, ba-sét kámbé kaǎkím kyi-kim ne kángkáng byěm ḿbyí ba/mû ba/sét kámbé. 10 Ké nkéré ńkyín kii/shwôm, Jisos oyén o/twóm Bǎmpém ḿbé Banong ḿbé baa*tánê ne banyá* kyi-kim ne onyii mú onong mú ne banyá, ba-cen ké bubwô-bǎmgbán emen, ba-byí kángkáng byikit kyi-fím ké kyicê ńkyí esû edabyí tata kyi-ribi ké ńkyí edaríbî.]