MÂK BǍMPÉM ḾBÉ BANONG KYI-KIM NE JISOS KARÂS ERINGE NYÍ MÂK O/SÁNG 15 - Bokyi Bible

Jisos o/bwom ké Bushú-Otu-Dyishí mú odabángê Pálet

¹ Ńdyí dyicófóróng dyi-câ dyi-bâ, batu-banchi kyifen-Osówo ba/kám ncibi ne bakínkán-banet-Jûs ne bantánge Byije-Músis ne kángkáng banet-Jûs ḿbé esuk nyí eryên, ne ba-tóbê ne barî. Ba-fé Jisos bamgbokobá, ne ba-kúng ǎ ba-dim ne nyǐ ba-da-kye otu-dyishí mú odabángê Pálet.

² Pálet o-bí ǎ o/fu, wo a-chi i otu mú banet-Jûs dí. Jisos o-faa o/fu, éné nké wo a/fu.

³ Batu-banchi kyifen-Osówo ba-bât Jisos byiraa chwóó!

⁴ Ne Pálet o-chî ǎ ebí kâng o/fu, wo a*fí ne ojá mú adafaa*? Kûri bujê-byibî-byěm ḿbyí baa/sét ba-bât ǒ.

⁵ Jisos o-chîné ojá efaa. Pálet byiko byi-kaa ǎ.

Ba/két Mpan ba/fu, baju Jisos

⁶ Pálet, kángkáng nkéré mú ba-kú ba-chi i dyijî-kyifen ńkyí Shwôm, o-fwam m ezú onet-mgbokobá obónge nang orá abwô mú banet bada ǎ efu ozú.

⁷ Ké nkéré ámu, onyinchéng obónge mú odabángê Barábas o/mû ké mgbokobá ne burwám-banet ḿbé bambên oshê, ḿbé ba/nwa ne batu-oshê ba-ju banet.

⁸ Ké nkéré bujê-banet baa/sú kyikit kyibónge, ne ba-kpet Pálet ebí ba/fu, ochi kámbé wǎ eringe nyí mu o-fwam m echi,

⁹ Pálet o-bí kámbé o/fu, ben bamu ba-ryuu ng ba/fu, me nzú běn otu mú banet-Jûs abwô dí.

¹⁰ Pálet o/mû o-nyît ng kanong kanong o/fu, batu-banchi kyifen-Osówo ba/kám Jisos ba-kye ǎ, ké ebóng, Jisos o/mû o-sa ng kámbé kafâ, ké nǎ, Jisos o/mû o-nyîn n nang yeě nang yeě.

¹¹ Nké batu-banchi kyifen-Osówo ámbe ba/tírîng bujê-banet ámbe ba/fu, basét Pálet o-zú Barábas abwô.

¹² Pálet o-chîbí bujê-banet ámbe o/fu, ben kâng bamu ba-ryuu ng ba/fu, me nchi mú ben bamu ba-kó ng ǎ otu mú banet-Jûs ebóng.

¹³ Mbé ba-wonge ba/fu, mán ǎ ké kyikwap.

¹⁴ Pálet o-bí kámbé o/fu, ebóng kyibî ńkyí nyǐ o/chi. Mbé ba-bwa ba-wonge kakânkakân ba-shwôm oshwǒm ba/fu, mán ǎ ké kyikwap.

¹⁵ Pálet o-zú kámbé Barábas abwô, ké ebóng, o/mû o-ryuu ng o/fu, nyǐ o-chi i eringe nyí kyidanyîn bujê-banet ámbe. Ne o-kye kâng busa o/fu, bamín Jisos. O-níbî ǎ o-kye basúja o/fu, bada-mán ǎ ké kyikwap ńkyí badashwân onet.

Basúja ba/fát Jisos Kiikuku

¹⁶ Basúja ámbe ba-níbî Jisos ba-dim ne nyǐ ké kafâ-kabám, ányi ké kyibám ńkyí otu-dyishí ámu. Ne ba-kó bábe ḿbé áku kángkáng ba-cibi kyikit kyibónge.

¹⁷ Ba-fé Jisos ágbádá-butu. Ba-chi etam-butu ké byire-byichí ḿbyí byiwong byíwong, ba-cít ǎ ké dyishí.

¹⁸ Ba-kpet ǎ kâng kyiraa eta ba/fu, kyi/bát otu mú banet-Jûs okpen o-wu.

¹⁹ Ba-kpet ǎ ochí emurung ké dyishí, ba-shú u ǎ akorong ké byiko, ba-tím m arông kyísí ba-tíngê e ba-ta ng ǎ kyiraa wǎ otu.

²⁰ Ké nkéré mú baa/fát ǎ kiikuku kpók, ba-pii ǎ ágbádá ányi, ba-bwa ne byídí emen ba-fé ǎ. Ne ba-níbî ǎ kâng o-byí kyíjí ba-wâa ǎ edamán ké kyikwap ńkyí badashwân onet.

Ba/mán Jisos ké Kyikwap ńkyí badashwân Onet

²¹ Ké nkéré mú mbe ba-cen n ba-câ ké bukwóp, ba-kwárê ne onyinchéng obónge mú odabángê Sámon ké oo/fím áku o-kú o-bâ Jerúsélem. Ba-tírîng ǎ ké busa o-tû kyikwap ńkyí Jisos. Sámon mún o/mû o/fím Saryínyi. O/mû bonchí-Alyikyizánda ne Rúfos.

²² Ba-ba-ribi ne Jisos ké kyikit ńkyí badakó Gógúta, ányi kyi/byí, kyikit-kiǐfâa-dyishí-onet.

²³ Ké kyikit ánkyi nké ba/kan Jisos bato ekye ḿbé ba/chwáp ne burwan ḿbú badakó mîi. Nké Jisos o*da/jwáp kámbé*.

²⁴ Ne mbé kâng ba-mán ǎ ké kyikwap ńkyí badashwân onet. Ba-kyii byídí emen ké bukwóp ḿbú dyímám etwóp, eringe nyí badari onet mú dyímám dyi/nwa ǎ, o-kúng kyicê-kyídí ńkyí kyi/nyîn ǎ.

²⁵ Kyi/mû kyi/firi égbáng kátángekányi nyí dyicófóróng ńdyí ba/mán ǎ ké kyikwap ánkyi.

²⁶ Ba-sáng chwǒm ńkyí ba/bât ǎ, ba-lák ké kyikwap ánkyi ba/fu, nyín otu mú banet-Jûs.

²⁷ Ba-mán to banjii kajii ashí afee ányi ne Jisos ké byikwap ḿbyí ebe, obónge ké kyicê-bubwô-etyebéng-Jisos, mú obónge ké kyicê-bubwô-eku. [

²⁸ Ké bukwóp ḿbún, ejá-Osówo nyí ba/sáng kyísí nyí e/raa e/fu, nyǐ ba/cibi ǎ ne banjii kajii e/sét ntûntû.]

²⁹ Banet ḿbé mbe ba-shwôm m ányi ba-me ashí ba-kye ǎ edángé ba/fu, nyâ, wo a/mû a/fu, wo a-bú ng kiǐtí-kyise-kyifen-Osówo echi a-bi kánkyí ké ací achât.

³⁰ Kántîk, shû kâng ké kyikwap ánkyi a-nyángê byiko eyên.

³¹ Eringe ányi to ebónge nké batu-banchi kyifen-Osówo ne bantánge Byije-Músis ba/fát Jisos kiikuku, ba-raa ng ne barî ba/fu, nyǐ o/nyángê banet ḿbé áku, nké oo*man enyángê byiko emen*.

³² Mîng n̂g byi-ri onet mú Osówo o/kúng ǎ butu, otu mú Ézerel, o-shû kyísí kántîk ké kyikwap ánkyi ne be byi/chi byi-bángê ne nyǐ. Banet ámbe ashí afee ḿbé ba/mû ba/mán to kámbé ne Jisos ba-kye ǎ to edángé.

Bukyû ḿbú Jisos

³³ Ké nkéré busun boo/mán, kyifip kyi/róng ké esí emúmú. Kyi/bwon égbáng jangjang echât.

³⁴ Ké nkéré kyi/firi égbáng echât nyí dyikurúku, Jisos o-wonge kakânkakân o/fu, elô elô lama sabatányi. Ányi kyi/byí, Osówo ejí, Osówo ejí, ebóng ńkyí wo aa/mîng mě.

³⁵ Ńdyí kyicê-banet ḿbé ba/mû ányi ba/jwo kánkyí, ba-raa ba/fu, fwôo n̂g atông ba-jwo. O-kú o-kó ng Elája.

³⁶ Onet obónge mú o/mû ányi ne mbé o-byí ne ochéé, o-da-yip oringe o-lip ké bato ḿbé baa/myám, o-fâp kámú ké dyishí-ochí. O-níbî o-bêem kámú kyíbóng, o-tîm Jisos ké ocím. Ne o-raa o/fu, mîng n̂g kpá byi-ri, â Elája mu o-bâ o-ba-shû ǎ ké kyikwap ńkyín o-tî kyísí.

³⁷ Jisos o-wonge kakân kakân, ne o-waa ányi o-kpú.

³⁸ Ékpígí nyí ba/mû ba/tîm ké kiǐtí-kyise-kyifen-Osówo echi e-waa ányi e-járê byicê byifee, e-fím kyíbóng tata e-ribi kyísí.

³⁹ Onet-dyishí-basúja obónge mú o/mû o/bwom ányi ké kashú-kyikwap ánkyi ńkyí ba/mán Jisos, o/ri eringe Jisos o/wonge ne o-kpú. Ne o-kpet eraa o/fu, onyinchéng mún něen o/mû Wǎn-Osówo ntûntû.

⁴⁰ Banyinyi ba/mû ányi ḿbé ba/bwom kú cát mbe ba-tún n. Salóme ne Méryi mú o/fím Mágádála ne Méryi mú boné-Jêmsyi mú wǎsíng ne mú Jǒsis ba/mû ké burwám-banyinyi ámbe.

⁴¹ Mbé ba/mû baa/cen ne Jisos ké kyikû ba-chwáp ǎ to ńdyí o/mû ké Gályílyi. Banyinyi bakíri ba/mû ányi to ḿbé ba/mû ba/bê Jerúsélem ne Jisos ké kyikû.

Ba/ryii Jisos

^42-43 Kyi/mû kyi-kú kyi-câ dyikurúku ńdyí Josêf mú o/fím Aramatyâ o/baribi. Nyǐ o/mû onet mú ba/mû ba-kyâ ǎ ofê ké burwám-banet-Jûs ḿbé esuk nyí eryên, ne nyǐ to o/mû o-tún n achi o/fu, nyǐ o-ri ng nkéré mú Butu ḿbú Osówo bu/chi bu-byí wááng. Kyi/mû dyicí ńdyí byiko ekpá, ányi kyitwom-ékwâbashi nyí banet-Jûs. Josêf o-cíp kâng dyityém, o-dim o-kâm Pálet, o-da-bí ǎ kyi-kim ne kyikwóm-enyam-byiko-Jisos.

⁴⁴ Pálet o/waa ocím ké dyishí fúú ńdyí o/jwo ba/fu, Jisos oo/kpú. O-kó onet-dyishí-basúja o-bí ǎ, â Jisos o/kpú kaa/bwon.

⁴⁵ Ké nkéré nyǐ o/jwo ńkyí onet-dyishí-basúja ámu o/sét, Pálet o-sét Josêf o/fu, â kyi/nyîn ǎ, oda-kúng kyikwóm-enyam-byiko o-dim ne nkyí.

⁴⁶ Josêf o-ré kyídí-okpówo, o-shû kyikwóm-Jisos kyísí, o-ním kánkyí kyídí ánkyi, ne o-kúng kánkyí o-ryii ké dyikun ńdyí ba/sím ké dyifít-buká. Ne o-bírî kiimbâng-buká o-cít ányi ké ocím-dyikun.

⁴⁷ Méryi mú o/fím Mágádála ne Méryi mú boné-Jǒsis ba/mû ányi ba-tún n. Ba/ri to kyikit ńkyí ba/ryii Jisos.