LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 6 - Bokyi Bible

Ḿbím kyi-kim ne Dyicí-Ékwâbashi

¹ Ké dyicí-ékwâbashi, Jisos o/mû mu o-shwôm m ké byifát ḿbyí ba/kwón esang-byichí. Bǎmgbán emen ba-kpet ebóng esang-byichí ányi ba-fîi ng ké etyém-akwâ ba-roo ng biintaa, ba-ryí i esang eyén.

² Kyicê-banet-ncibi mú badakó Fárasyî ba-bí kámbé ba/fu, ebóng ben bamu ba-chi i ńkyí kyije eten kyi/sét kyi/fu, ba*dachi ba-chi ké dyicí-ékwâbashi*.

³ Jisos o-faa kámbé o/fu, nâng ben baa/kó ńkyí Otu Dívit o/chi ké nkéré mú esong e/mû nyi e-nwa ng ǎ ne banet emen.

⁴ Nyǐ o/nung ké kafâ-kyise-Osówo, o-yip berêt mú ba/chi kyifen ba-kye Osówo, o-ryí, o-kye to banet emen ba-ryí. Nké kyije eten kyi/sét kyi/fu, onet okíri o*dachi o-ryí berêt mún* kyi-cibi ne banchi kyifen-Osówo nké nke*.

⁵ Jisos o/kúlî bǎmpém emen o/fu, Wǎn-Onet mu Otu mú o/shwôm byije ḿbyí byi/kim ne dyicí-ékwâbashi.

Onyinchéng mú Bubwô Emen bu/nyîim

⁶ Ké dyicí-ékwâbashi dyikíri, Jisos o/nung ké kyise-ékwâbashi ńkyí banet-Jûs o-tángê. Onyinchéng obónge o/mû ányi mú bubwô-etyebéng emen bu/mû bu/nyîim.

⁷ Kyicê-bantánge Byije-Músis ne banet-Fárasyî ba/mû mbe ba-kyé ng bukwóp ḿbú badabât Jisos kyiraa ba/fu, o/chi kyibî-chwǒm. Ne mbé ba-kpet ǎ ebám kanong kanong ba/fu, mbé ba-ri ng â Jisos o/chi o-chi onet o-nyange ké dyicí-ékwâbashi.

⁸ Nké Jisos o/nyît ńkyí mbé ba/mû mbe ba-kabe ng, ne o-raa ne onyinchéng ámu mú bubwô bu/mû bu/nyîim ǎ o/fu bûu nensang a-byí a-bâ kwán ké kashú. Mú onyinchéng ámu o-bûu nensang o-bwom ányi.

⁹ Jisos o-raa kâng ne mbé o/fu, me mu m-bí ng běn n/fu, kyije eten kyi/fu, be byichi nǎ ké dyicí-ékwâbashi. Byichwáp ochwábáng aa, aa byibên oběn. Byinyángê dyikpen-onet aa, aa byiju ojǔng.

¹⁰ Nyǐ o-pín achi o-tún kámbé ashí amúmú ne o-raa ne onyinchéng ámu o/fu, nabe bubwô eyên. Nyǐ o-chi éné, ne bubwô emen bu-chîfiri kanong.

¹¹ Nké kafâ ka/kpet esa kámbé, ne ba-kpet etóbê ne barî ńkyí mbé ba/chi ba-chi Jisos.

Jisos o/cá Banet-Kyitwóm Emen Ashí Diǐkpú ne Afee

¹² Ké nkéré ámu, Jisos o/yú kyíbóng-kaku o-dim nshwam efé. O-waa áku kyirim-buchú bumúmú mu o-fâ nshwam o-kyâ Osówo.

¹³ Ké nkéré mú dyicófóróng dii/cé, o/kó bǎmgbán emen ba-kâm ǎ, ne o-cá banet ashí diǐkpú ne afee, ḿbé nyǐ o/kye kámbé dyizîn ńdyí dyidabángê banet-kyitwóm emen.

¹⁴ Sámon mú nyǐ o/fé ǎ to dyizîn ńdyí dyidabángê Pyíta ne wǎn-boné emen mú odabángê Ánduru ne Jêmsyi ne Jǒn ne Fyílip ne Batólómyi

¹⁵ ne Mátyuu ne Tómos ne Jêmsyi mú wǎn-Áfus ne Sámon mú ba/mû ba-kó ng ǎ onet mú mu ne kyijé ne oshê

¹⁶ ne Júdas mú wǎn-Jêmsyi ne Júdas-Esakáryot mú o/chi ba-kám Jisos.

Jisos o/tángê, o-chi Banet Erwôm e-man

¹⁷ Jisos ne bǎmgbán emen ḿbé ashí diǐkpú ne afee ba/fím kyíbóng-kaku ba-shû kyísí. Jisos o-ba-bwom ké kyikit ńkyí ndege ńdege ne bujê-bǎmgbán emen bakíri. Bujê-banet chwóó ba/mû ányi ḿbé ba/fím Judyâ ne ḿbé ba/fím Jerúsélem ne ḿbé ba/fím ké eshê nyí nyi ké bukô-baya ḿbé baryên, nyí Táya ne Sádon.

¹⁸ Ba/bê ebajwo ńkyí Jisos o/mû o-sét ng, ne eringe nyí odachi kámbé to byirwóm ebe byi-man. Banet to ḿbé byibî-bací byi/mû byi-kyâ kámbé afaníkong ba/bê to. O-chi kámbé ba-nyange.

¹⁹ Kángkáng banet ba/mû mbe ba-nwa ng ba/fu, mbé ba-ta ng ǎ, ké ebóng, busa bu/mû mbu bu-fím m ǎ ké byiko bu-chi i kámbé kángkáng ba-nyange e.

Bunyîn-Dyityém ne Bafip

²⁰ Jisos o-bírî achi o-tún bǎmgbán emen, o-raa o/fu, bunyîn-dyityém mbu ne ben ḿbé bamu banet-byikpu, ké ebóng, banjware ḿbé Butu ḿbú Osówo ba/já běn ben.

²¹ Bunyîn-dyityém mbu ne ben ḿbé esong nyi e-nwa ng běn kántîk, ké ebóng, ben ba/chi ba-zût. Bunyîn-dyityém mbu ne ben ḿbé bamu ba-tii ng kántîk, ké ebóng, ben ba/chi ba-jwó.

²² Bunyîn-dyityém mbu ne ben ké nkéré mú ba-kú ba-sa ng barî-banet kafâ, ba-né ng běn, ba-cábê ng běn, ba-raa ng ne ben ba/fu, ben ba-chi i byibî-banet, ké dyishí-Wǎn-Onet.

²³ Jêe n̂g ké nkéré mú byěm ḿbyín byi-kú byi-chi i, ba-ne ng ane ba-pógê ng, ké ebóng, Osówo oo/tî běn eyáré nyí e/rêe e-shwôm kyíbóng, ké ebóng, banchí ebe ḿbé kpákpá ba/mû ba/chi to bamkpábé ḿbé badasét byiraa-Osówo azong-byěm ányi abónge.

²⁴ Nké kyi/chi kyi-bên kanong kanong ne ben mú bamu banet-esang kántîk, ké ebóng, ben baa/kyú ké dyikpen ńdyí ba*fí ba-ri ng busông*.

²⁵ Kyi/chi kyi-bên kanong kanong ne ben mú baa/zût kántîk, ké ebóng, esong e/chi e-nwa běn. Kyi/chi kyi-bên kanong kanong ne ben mú bamu ba-jwó ng kántîk, ké ebóng, ben ba/chi ba-kûta dyikán ba-tii ng bukyû.

²⁶ Kyi/chi kyi-bên kanong kanong ne ben mú kángkáng banet mbe ba-kpee ng běn, ké ebóng, banchí ebe ḿbé kpákpá ba/mû ba-chi i to azong-byěm ányi abónge ne bamkpábé ḿbé ba/mû ba*fí ba-sét ng ntûntû*.

Kyijé ne Banet-Bushwôn

²⁷ Nké me mu n-sét ng běn ben ḿbé bamu ba-jwo ng mě n/fu, kyú n̂g ne kyijé ne banet-bushwôn enen. Chi n̂g kanong ba-kyâ banet ḿbé ben bamu ba-sa ng kámbé kafâ.

²⁸ Fé n̂g nshwam mú onong ba-kyâ banet ḿbé mbe ba-fâ kyibî-nshwam ba-kyâ běn. Ba-fâ to nshwam ba-kyâ Osówo ké bubwô-banet ḿbé mbe ba-chi i běn byibî.

²⁹ Â onet o/díp ǒ dyikwâ ké dyínán, bírî dyínán ńdyí dyibónge to a-chî ǎ etông o-díp. Â onet o/koo kyídí eyên, bwa ne nkyû eyên to a-kye ǎ.

³⁰ Nang yeě nké o/rém ǒ chwǒm, kye ǎ kánkyí. Nang nkéré orá to nké â onet o/kúng ǒ chwǒm, mîng ǎ ne nkyí.

³¹ Chi n̂g banet byěm, wǎ eringe nyí ben bamu ba-ryuu ng to ba/fu, mbé bachi běn.

³² Â ben bamu ne kyijé ne banet-kyijé enen nké nke, kyi-cen n nǎ ne ben ba-kûkoo ojware. Nang banchi byibî to mbe ba-tông ng kyijé ne banet ḿbé mbe ne kyijé ne mbé.

³³ Nké â ben bamu ba-tông ng kanong ne banet ḿbé mbe ba-chi i běn kanong nké nke, kyi-cen n nǎ ne ben ba-kûkoo ojware. Nang banchi byibî to mbe ba-chi i dyizong ándyi.

³⁴ Â ben bamu ba-pwoo ng banet byěm ḿbé ben ba/kabe ba/fu, ba-bwa ng esim ne mbyí ba-só běn, kyi-cen n nǎ ne ben ba-kûkoo ojware. Nang banchi byibî to mbe ba-pwoo ng bábe-banchi byibî byěm, eringe nyí badabwa esim ne mbyí to kerededet ba-só kámbé.

³⁵ Kyi*fí éné*. Kyú n̂g ne kyijé ne banet-bushwôn enen, ba-chi i to kámbé byěm ḿbyí byinong. Pwoo n̂g barî-banet byěm, nké *da n̂g echi ba-kyú ne okabe mú mbé to bada běn esó*. Ben ba/chi ba-koo eyáré nyí e/rêe e-shwôm, ne ba/chi ba-kyú bwǎn ḿbé Osówo mú kyíbóng kyíbóng. Ké ebóng, nyǐ mu o-cángê e dyityém ne banet ḿbé ba*fí ba-kó ng ǎ asǎma* ne ḿbé ba/bên atyém.

³⁶ Ri n̂g barî-banet bafip, wǎ eringe nyí Osówo mú Bonchí enen mu o-ri ng běn bafip.

Barî-Banet ebîn

³⁷ *Da n̂g echi ba-kûpan barî-banet mpan ké byiko* eringe nyí Osówo to oo*ba/chi o-pan běn mpan*. *Da n̂g echi ba-kûfu barî-banet ba/fu, wo aa*nwa* eringe nyí Osówo to oo*ba/chi o-fu běn éné*. Kû n̂g epwoo barî-banet, eringe nyí Osówo to oda běn epwoo.

³⁸ Kû n̂g ekye barî-banet byěm, eringe nyí Osówo to o/chi o-kye běn. Ben ba/chi ba-koo byi-jê byi-shwôm eringe nyí byidasú ké abwô enen pwat. Kyiféng ńkyí ben badakan byěm ké nkyí ba-kye barî-banet, nkyí to nké Osówo odakan ké nkyí o-kye běn.

³⁹ Ne Jisos o-tím kámbé dyitím-ekan ńdyín o/fu, nsêe achi oo*man etông óbe-nsêe achi bukwóp*. Â o/chi éné, mbé ashí amúmú ba/chi ba-róng ké owo.

⁴⁰ Wǎn-nwet o*fí nang obónge mú odashwôm onet mú mu o-tángê e ǎ*. Nké wǎn-nwet to nang orá, ké nkéré mú oo/kwâa o-kpí, o-firi ng to wǎ onet mú o/mû mu o-tángê e ǎ.

⁴¹ Ebóng kyi/chi ne wo amu a-jebe ng kiǐnfwarê ńkyí nkyi ké dyichi ńdyí wǎn-boné eyên, â wo a*fí a-kérê ng kyi-kim ne kiǐchwóm ńkyí nkyi ké dyichi ńdyí eyên*.

⁴² Wo a-cen n nǎ ne a-sét wǎn-boné eyên a/fu, kamgbe, mîng mě n-fîm ǒ kiǐnfwarê ké dyichi, â wo a*fí a-ri ng kiǐchwóm ńkyí nkyi ké dyichi ńdyí eyên*. Ben bannîm banet. Fîm kpá kiǐchwóm ńkyí nkyi ké dyichi ńdyí eyên, ne kyi-fím ányi wo a/chi a-man eri kiǐnfwarê ńkyí nkyi ké dyichi ńdyí wǎn-boné eyên, a-fîm ǎ to.

Kyichí ne Byirim Emen

⁴³ Kyichí ńkyí nkyi kyi-kán n ké bukwóp ḿbú bunong kii*zím byibî-byirim*. Kyichí to ńkyí kyi*fí kyi-kán n ké bukwóp ḿbú bunong* kii*bwa kyi-zím byirim ḿbyí byinong*.

⁴⁴ Kyichí nang kyirá ba-nyît ng kánkyí ké byirim emen ḿbyí nkyi kyi-zím m. Kyika kii*zím émurúkú*. Ako aa*zím osén*.

⁴⁵ Onet mú onong o-raa ng byiraa ḿbyí byinong, ḿbyí byidafím ké dyityém emen ńdyí dyinong. Kyibî-onet to kyi-raa ng byibî-byiraa ḿbyí byida ǎ efím ké kyibî-dyityém. Ké ebóng, onet o-raa ng ńkyí nkyi kyi-fím m ǎ ké dyityém.

Bambi Byise Ashí Afee

⁴⁶ Ebóng ben bamu ba-kó ng mě Otu Kyítá, Otu Kyítá, ńkyí me mu n-sét ng běn ba*fí ba-chi i*.

⁴⁷ Nang yeě nké mu o-bâ o-kâm m mě, o-jwo ng to byiraa ejí, ne o-chi eringe nyí byi/sét, me n/chi n-tông běn eringe nyí onet ámu mu.

⁴⁸ Nyǐ mu wǎ onyinchéng mú o/bi kyise. O-sím kyikû-ekpe kyi-ríbî o-fé kánkyí ké buká. Kace ka-ba-sú ka-díp kyise ánkyi. Nké ka*da/man eninge kánkyí* ké ebóng, ba/man ebi kánkyí.

⁴⁹ Nké onet mú mu o-jwo ng byiraa ejí, ne o*fí o-chi i eringe nyí byi/sét* mu wǎ onyinchéng mú o/bi kyise twóóm ké ecing. O*da/sím kyikû-ekpe o-fé kyísí*. Ké nkéré kace ka/sú, ka/díp kyise ánkyi kyi-myii ké abe ké abe. Obên mú kyise ánkyi kyi/bên oo*nwa eri*.