LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 20 - Bokyi Bible

Ḿbím kyi-kim ne Busa ḿbú Jisos

¹ Dyicí dyibónge, ké nkéré Jisos mu ké kafâ-kiǐtí-kyise-kyifen-Osówo echi, o-tángê e banet, o-sét ng to kámbé Bǎmpém ḿbé Banong, batu-banchi kyifen-Osówo ne bantánge Byije-Músis, cibicibi ne bakínkán-banet-Jûs ba/bê ba-kâm Jisos.

² Ne ba-bí ǎ ba/fu, sét bě, ebóng busa ḿbú wo amu a-yip ng a-chi i byěm ḿbyín. Yeě o/kye ǒ busa ḿbún.

³ Jisos o-faa kámbé o/fu, me to m-bí ng běn ḿbím. Sét n̂g mě.

⁴ Busa ḿbú Jǒn mú o/mû o-kyâ banet osoo mú Osówo bu/fím ne Osówo aa, aa bu/fím ne banet.

⁵ Mbé ba-kpet ekán ké dyishí ne barî ba/fu, byi-faa ng ǎ nǎ. Â byi/faa byi/fu, bu/fím ne Osówo, nyǐ o/chi o-bí bě o/fu, aa ebóng kâng ben ba*da/bángê ne Jǒn*.

⁶ Nké â byi/fu, bu/fím ne banet, bujê-banet ḿbún bu/chi bu-tím bě aká, ké ebóng, kángkáng banet ba/bángê ba/fu, Jǒn o/mû mkpábé mú odasét byiraa-Osówo.

⁷ Ne ba-faa Jisos kâng ba/fu, mbé ba*fí ba-nyît ng kyikit ńkyí bu/fím*.

⁸ Ne Jisos o-faa kámbé o/fu, nang me to nn*sét běn kyicê ńkyí busa ḿbú me mu n-chi i byěm ḿbyín bu/fím*.

Dyitím-Ekan kyi-kim ne Banyáme Kyifát-Byirim-Byichí

⁹ Ne Jisos o-tím banet ḿbé ba/mû ányi dyitím-ekan ńdyín o/fu, onyinchéng obónge o/chi kyifát-byirim-byichí, o-kúng kánkyí o-yámê banet, o-dim bucen ḿbú o/rí áku chwóó.

¹⁰ Ńdyí nkéré oo/fyi mú badabóng byirim-byichí ámbyi, oyén-kyifát ámu o-twóm ósóng obónge o/fu, oca o-kâm banet ḿbé ba/yámê kyifát ánkyi ba-kye ǎ kyicê-byirim ḿbyí baa/bóng, ḿbyí byi/já ǎ. Nké banet ḿbé ba/yámê kyifát ánkyi ba/kám ósóng ámu ba-mín. Ba-ró ǎ o-bwa esim abwô ábwo.

¹¹ Oyén-kyifát ámu o-chîtwóm ósóng okíri. Mún to banyáme kyifát ánkyi ba/kám ba-mín. Ba-chi ǎ byěm-éshwân ké byiko. Ba-ró ǎ o-bwa esim abwô ábwo.

¹² Oyén-kyifát ámu o-chîtwóm kâng ósóng okíri ké banet bachât. Mún banyáme kyifát ánkyi ba/némê ǎ, ba-ró ǎ ké kafâ-kyifát.

¹³ Ne oyén-kyifát ámu o-raa kâng o/fu, kántîk, me n-chi i nǎ. N/chi n-twóm wǎn-dyityém ejí. N/kabe n/fu, ba-man ba-kye ǎ ofê.

¹⁴ Nké ké nkéré banyáme kyifát ánkyi ba/ri wǎn mú onyinchéng ámu, ba-raa ne barî ba/fu, nyín wǎn-oyén-kyifát ńkyín. Bâ n̂g byi-ju ǎ, eringe nyí byěm emen ḿbyí o/mû o/chi o-ryí bukyû byi/chi byi-firi ḿbyí eten.

¹⁵ Ba-kám wǎn ámu ba-byí ne nyǐ ké bukô-kyifát, ba-ju. Jisos o-bí kámbé o/fu, ben ba/kabe ba/fu, oyén-kyifát ámu o-chi i nǎ.

¹⁶ O-bâ ng eju banyáme kyifát ámbe. O-kúng kyifát ánkyi o-kye banet bakíri ba-yámê. Ké nkéré banet ba/jwo ńkyín ba-raa ba/fu, Osówo oo*bángê*.

¹⁷ Jisos o-bírî achi o-tún kámbé, ne o-bí kámbé o/fu, aa ejá-Osówo ńnyín kâng, nyí ba/sáng kyísí e/byí nǎ. Nyí e/fu, ochíchí-kyirim-buká ńkyí bambi byise ba/né kii/bírî kyi-firi kiǐtí kyi-shwôm aká nyí áku.

¹⁸ Nang yeě nké o/myii ké buká ámbu o/chi o-bún byikit emen kángkáng. Nké â buká ámbu bu/róng nang yeě ké byiko bu/chi bu-sé ǎ degedege.

Ḿbím kyi-kim ne Akpuga-Dyishí ekye

¹⁹ Bantánge Byije-Músis ne batu-banchi kyifen-Osówo ba/nam ba/fu, mbé ba-kám m Jisos ké abe ányi. Ké ebóng, mbé ba/nyît ba/fu, Jisos o/tím dyitím-ekan ńdyín ké byiko ebe. Nké ba/shî banet ḿbé ba/mû ányi.

²⁰ Ne mbé ba-kpet ebám kâng nkéré mú onong, mú mbé ba/chi ba-ri bukwóp. Ba-kye banet-boǒfêp-esí ngu ba/fu, bada-nîm Jisos ba-bwom wǎ banet ḿbé banong ké byije etî, ba-bí ǎ bǎmbím o-róng ké ejá. Eringe nyí mbé bada ǎ ekám ba-kye otu-dyishí-oshê ámu, mú mu ne kángkáng busa ké kyikim-esí ánkyi.

²¹ Banet-boǒfêp-esí ámbe ba-bâ ba-kâm Jisos, ba-sét ǎ ba/fu, ntánge byiraa-Osówo, be byimu byi-nyît ng byi/fu, wo amu a-sét ng ntûntû, a-tángê e to byěm ké bukwóp ḿbú bunong. Wo a*fí a-shî ng achi nyí onet nang obónge*. Nké wo amu a-tángê e ńkyí nkyi ntûntû kyi-kim ne ńkyí Osówo mu o-ryuu ng o/fu, banet bachi.

²² Sét bě, byije eten byi/ciring otu mú Rûm akpuga-dyishí ekye aa, aa byi*da/ciring*.

²³ Nké Jisos o/nyît kyibî-okabe ebe ne o-raa ne mbé o/fu,

²⁴ tông n̂g mě akpuga ányi kpá n-ri. Ne o-bí kámbé o/fu, bushú ḿbún něen ne dyizîn ńdyín to ḿbyí yeě, ḿbyí ba/fé ké akpuga ńnyín. Mbé ba-faa ǎ ba/fu, ḿbyí otu mú Rûm.

²⁵ Ne Jisos o-sét kámbé kâng o/fu, kye n̂g kâng otu mú Rûm ńkyí kyi/já ǎ. Ba-kye to Osówo ńkyí kyi/já Osówo.

²⁶ Banet-Boǒfêp-esí ámbe ba*da ǎ eman ekám ké chwǒm nang kyibónge* ké bushú-banet ḿbé ba/mû ányi*. Ne ba-cíbî kâng pyêp, ba-waa ocím ké dyishí fúú ké ejá nyí o/faa kámbé.

Ḿbím kyi-kim ne Ojwóbe ké Bukyû

²⁷ Kyicê-banet ḿbé ncibi mú badakó Sádusyî ba-bâ ba-kâm Jisos. Mbé nké ba/fu, Osówo oo*ba/chi o-jwóbê banet ké bukyû*. Ba-bí Jisos ba/fu,

²⁸ ntánge byiraa-Osówo, Músis nké o/sáng kyije ńkyín o-tî bě o/fu, â onyinchéng o/kpú o-mîng onyi, nké o*da/fwon wǎn* wǎn-boné-onyinchéng ámu o-man o-kúng onyǐnkú ámu o-bé, eringe nyí badafwon bwǎn ba-kye wǎn-boné emen ámu mú oo/kpú.

²⁹ Nkéré obónge, bwǎn-bané ba/mû ashí káchâtkányi, banyinchéng mbé mbe. Okínkán ebe o-bé onyi, o-kpú, wǎn o*da/fwon*.

³⁰ Nche emen mú o/nye ǎ o-kúng onyinyi ámu o-bé.

³¹ Eringe ebónge to ne nnyinyěng-nche emen ámu, ne ashí ebe amúmú káchâtkányi. Mbé kángkáng ba/bé onyinyi ámu ba-kpú, nang wǎn ba*da/fwon*.

³² Ké nkuli kyikû, onyinyi ámu o-kpú to.

³³ Ké dyicí ńdyí Osówo o/chi o-jwóbê kâng banet ké bukyû, onyinyi ámu o-kyú u onyi mú yeě. Ké ebóng, mbé kángkáng ashí káchâtkányi baa/bé ǎ.

³⁴ Jisos o-faa kámbé o/fu, banyinchéng ne banyinyi ḿbé bwǎn-bafî ba-bé ng abé ne barî.

³⁵ Nké banyinchéng ne banyinyi ḿbé ba/kwárê ḿbé Osówo odajwóbê kámbé ké bukyû, ne ba-kyú ké nkéré mú mu o-bâ ké kashú, baa*ba/chi ba-bé abé ne barî*.

³⁶ Ké ebóng, mbé baa*ba/chi ba-chîkpú ne banyá* ké nǎ, mbé ba-firi ng jangjang ne barím ḿbé banong. Mbé ba-firi ng bwǎn-Osówo, ké ebóng, Osówo oo/jwóbê kámbé ké bukyû.

³⁷ Músis o/tông wááng o/fu, Osówo mu o-jwóbê ng banet ké bukyû. Ké kyikit ńkyí o/sáng kyísí kyi-kim ne kyichí ńkyí kyi/mang okwâ, Músis o/raa kyi-kim ne Otu Kyítá, o/fu, Otu Kyítá o-chi i Osówo mú Ébarahâm ne mú Ázik ne mú Jekôp.

³⁸ Ányi kyi/byí, nyǐ o-chi i Osówo mú banet ḿbé mbe bakpó, *chí mú bakúsí* ké ebóng, kángkáng banet mbe bakpó ké bushú emen.

³⁹ Kyicê-bantánge Byije-Músis ba-raa ba/fu, a/man efaa kanong kanong, ǎ ntánge byiraa-Osówo.

⁴⁰ Ké ebóng, banet-Sádusyî ámbe ba*da/chîman ebí Jisos ḿbím nang obónge*.

Ḿbím kyi-kim ne Onet mú Osówo o/kúng ǎ Butu

⁴¹ Jisos o-bí kámbé o/fu, kyi/cen nǎ ne banet ba/fu, onet mú Osówo o/kúng ǎ butu o/chi o-fím ké kyikû-banet ńkyí Otu Dívit.

⁴² Ké ebóng, Otu Dívit oyén o/raa ké Nwet-Ekwan-Osówo mú badakó Sâm o/fu, Osówo Óburúkpâbí o/sét Otu Kyítá ejí o/fu, kyú mě nyín ké kyicê-bubwô-etyebéng ejí

⁴³ tete n-ren banet-bushwôn eyên kyísí ké byiká eyên wǎ kyichí ńkyí badacím byiká.

⁴⁴ Otu Dívit oyén o/kó ǎ Otu Kyítá. Aa kyi-cen n nǎ kâng ne onet mú Osówo o/kúng ǎ butu o-fím ké kyikû-banet ńkyí Otu Dívit.

Jisos o/kuri Ekó kyi-kim ne Bantánge Byije-Músis

⁴⁵ Ké nkéré banet mbe ba-fwôo ng atông ba-jwo ng ńkyí Jisos mu o-sét ng, Jisos o/raa ne bǎmgbán emen o/fu,

⁴⁶ bám m̂ byiko enen kyi-kim ne bantánge Byije-Músis. Ḿbé kyidanyîn kámbé eyêe ké byikit ne ágbádá ké byiko, banet ba-kûta kámbé kyiraa ne ofê ké ntim-kasî. Ḿbé badacá to bukyúng ḿbú ofê ké byise-ékwâbashi ḿbyí banet-Jûs ne byichí ḿbyí byi/nwa byi-shwôm ké ajî.

⁴⁷ Mbé mbe ba-nîm m to banyǐnkú ba-koo ng kámbé byěm ne byise, ne ba-kûtông byiko ba/fu, mbé nké mbe banet ḿbé banong ké biintintang-banshwam efé. Mpan mú Osówo o/chi o-pan kámbé o/chi o-bên o-shwôm.