LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 2 - Bokyi Bible

Ofwon mú Jisos

¹ Ké nkéré ámu, otu mú Rûm, mú odabángê Agósótus o/kye busa o/fu, kángkáng banet bada-sáng azîn ebe ké banet epan.

² Ké nkéré mú mbwôp kashú-banet epan mún, Karyínus nké o/mû otu-dyishí mú Syírya.

³ Ne kángkáng banet kâng ba-dim azîn ebe esáng, onet ne onet ké oshê mú o/fím.

⁴ Josêf o/dim ké Názáret, mú mu ké esí nyí Gályílyi, o-ca ké Bételehêm mú mu ké esí nyí Judyâ. Ányi ké Bételehêm nké ba/fwon Otu Dívit. Josêf o/ce áku, ké ebóng, nyǐ o/fím oshê ámu ké kyikû-banet ńkyí Otu Dívit.

⁵ Nyǐ o/ce dyizîn emen esáng ne ńdyí Méryi mú mbé ba/mû baa/ryí ocím ne barî ba/fu, mbé ba-bé ng barî. Méryi o/mû ne dyifít.

⁶ Ké nkéré mbé mbe ké Bételehêm, nkéré mú Méryi o/mû oo/fyi mú odafwon.

⁷ Ne o-fwon ókpá-wǎn-onyinchéng. O-ním ǎ byídí ké byiko, o-ren ǎ ké kiǐkpáré ńkyí mbe ba-fâ byitú byiryíng, ké ebóng, kyikit kyi/mû kyi*fí ńkyí badakyú ké kyise-byiryíng eshee*.

Bambâm Ebû ne Barím ḿbé Banong ḿbé Otu Kyítá

⁸ Ké kyikim-oshê ánkyi, bambâm ebû ba/mû ányi ḿbé ba/mû mbe ba-rí i kyíjí ne buchú, ba-bám m ebû ebe.

⁹ Orím mú onong mú Otu Kyítá o-byí o-kâm kámbé. Ne busan ḿbú Otu Kyítá ḿbú ragerage bu-tím kámbé ké byiko. Bushî bu-róng kámbé kanong kanong.

¹⁰ Ne orím mú onong ámu o-raa ne mbé o/fu, da n̂g echîshî. Me m/bê běn ne Bǎmpém ḿbé Banong ḿbé ba/chi ba-chi kángkáng banet ba-jêe kanong kanong.

¹¹ Kurún mún, ké oshê mú Otu Dívit, baa/fwon Onet-Onyii enen Karâs, Otu Kyítá.

¹² Ńkyí kyi/chi kyi-tông běn ne ba-nyît nkyi něen. Ben ba/chi ba-ri wǎn mú ba/ním ǎ byídí ké byiko ba-ren ǎ ké kiǐkpáré ńkyí mbe ba-fâ byitú byiryíng.

¹³ Ké abe ányi, bujê-barím ḿbé banong ḿbé kyíbóng ba-ribi ba-kâm orím mú onong mú o/mû ányi. Ba-kpet ekwán ekwan ba-kpee ng Osówo ba/fu,

¹⁴ akpee akyú ne Osówo mú mu kyíbóng kyíbóng. Ne ké ejíí, bunyîn-dyityém bukyú ne banet ḿbé mbe ba-nyîn n Osówo dyityém.

¹⁵ Ké nkéré mú barím ḿbé banong ámbe baa/dim ba-mîng kámbé, ba-bwa esim ba-jâ kyíbóng, bambâm ebû ámbe ba-raa ne barî ba/fu, bâ n̂g byi-dim byi-wâa Bételehêm, byi-da-ri chwǒm ńkyín ńkyí kii/chi něen, ńkyí Otu Kyítá oo/sét bě.

¹⁶ Ne mbé ba-dim ochéé óchee ba-da-ri kyikit ńkyí Méryi ne Josêf ba/mû. Ne ba-ri to wǎn mú ba/ren ǎ ké kiǐkpáré ńkyí mbe ba-fâ byitú byiryíng.

¹⁷ Ké nkéré bambâm ebû ba/ri ǎ, mbé ba/sét kámbé ńkyí orím mú onong o/sét kámbé kyi-kim ne wǎn ámu.

¹⁸ Kángkáng banet ḿbé ba/jwo chwǒm ńkyín kyi/chi kámbé wǎ chwǒm-akat ké byiraa ḿbyí bambâm ebû ba/sét kámbé.

¹⁹ Méryi o/zîim kángkáng byěm ḿbyín, ne o-kabe chwóó kyi-kim ne mbyí.

²⁰ Bambâm ebû ba-bwa esim, ba-kwán n ekwan-akpee ba-kyâ Osówo ba-câ ké kángkáng byěm ḿbyí mbé baa/jwo ne ba-ri to. Kyi/chi kerededet wǎ eringe nyí orím mú onong o/mû o/sét kámbé.

Ba/fé Jisos Dyizîn

²¹ Ké nkéré kyipyán kyi/shwôm kyibónge, nkéré o-fyi mú badacên wǎn, ne ba/fé ǎ dyizîn ńdyí dyidabángê Jisos, dyizîn ńdyí orím mú onong o/mû o/fé ǎ, ne ba-kûkoo dyifít emen.

Ba/ce ne Jisos ké Kiǐtí-Kyise-Kyifen-Osówo echi

²² Nkéré o-ba-fyi mú Josêf ne Méryi badachi ńkyí Byije-Músis byi/sét kyi-kim ne byiko esoo. Ne mbé ba-yip wǎn ba-dim ne nyǐ Jerúsélem, ba/fu, mbé ba-da ng ǎ ekye Otu Kyítá,

²³ wǎ eringe nyí ba/mû ba/sáng ké byije ḿbyí Otu Kyítá ba/fu, wǎn-kashú nang orá mú mu onyinchéng, mú ba/fwon ǎ, ba/chi ba-yip ǎ ba-kye Otu Kyítá.

²⁴ Mbé ba/ce to ba/fu, mbé ba-da ng echi kyifen-Osówo ńkyí badachi ké ámalê afee, nang ké bootǒmtǒm bufee, wǎ eringe nyí kyije ńkyí Otu Kyítá kyi/sét.

²⁵ Ké nkéré ámu, onyinchéng obónge mú o/mû o-bángê e Syímyon o/mû mu o-kyú u ké Jerúsélem. Nyǐ o/mû onet mú onong mú o/mû o-shî ng Osówo. Nyǐ o/mû mu o-bám m nkéré mú Osówo o/chi o-ba-nyii banet ḿbé Ézerel. Nyǐ o/mû ne busa ḿbú Busun-Osówo ké byiko.

²⁶ Busun-Osówo bu/mû boo/ryí ǎ ocím bu/fu, nyǐ oo*ba/chi o-kpú* tete o-ri onet mú Otu Kyítá o/kúng ǎ butu, mú Otu Kyítá o/ryí ocím o/fu, o/chi o-bâ.

²⁷ Busun-Osówo bu-chi Syímyon o-ba-nung ké kiǐtí-kyise-kyifen-Osówo echi, ké nkéré bonchí ne boné-wǎn ba/bê ne Jisos ké kafâ-kiǐtí-kyise-kyifen-Osówo echi. Ba/fu, mbé ba-bâ ǎ echi eringe nyí kyije-Osówo kyi/sét.

²⁸ Syímyon o-koo wǎn ámu ké abwô emen, ne o-kó Osówo asǎma o/fu,

²⁹ kántîk, ǎ Otu Kyítá, wo aa/tî ocím eyên mú wo a/mû a/ryí. Wo a-man n emîng ḿgbán eyên o-dim o-da-jáng ké bunyîn-dyityém.

³⁰ Ké ebóng, me nn/kúng achi ejí n-ri onyii eyên mú a/bê banet enyii,

³¹ mú wo aa/kpá byiko ké bushú ḿbú kángkáng banet.

³² N-ri to kiinwángé ńkyí kyi/chi kyi-tông banet ḿbé ba*fí banet-Jûs* kiǐfáng eyên, ne busan ḿbú ragerage ḿbú bu/san ké banet eyên ḿbé Ézerel.

³³ Kyi/chi bonchí ne boné-wǎn wǎ chwǒm-akat ké byiraa ḿbyí Syímyon o/raa kyi-kim ne wǎn ebe.

³⁴ Syímyon o-jware kámbé, ne o-raa ne Méryi mú boné-wǎn o/fu, Osówo o/fîm wǎn mún o/fu, oba-chi banet chwóó ḿbé Ézerel ba-kpú, bakíri ba-kpen. Nyǐ o/chi o-kyú ekap nyí e/fím ne Osówo, nyí banet chwóó ba/chi ba-raa byibî-byiraa byi-kim ne nyǐ,

³⁵ ne ba-tông kâng ekabe nyí ké kafâ-atyém ebe wááng. Bafip ba/chi ba-tím dyityém eyên ba-ribi wǎ mpyi mú odanen.

³⁶ Mkpábé mú odasét byiraa-Osówo obónge, mú onyinyi o/mû ányi, mú o/mû o-bángê e Ána. O/mû wǎn mú onyinchéng obónge mú o/mû o-bángê e Fánwel. Mú o/mû o/fím ké kyikû-banet ńkyí Ásha. Nyǐ o/mû okâa-onyinyi mú o/mû oo/bé otyép ké aje káchâtkányi.

³⁷ Nyǐ oo/kyú wǎ onyǐnkú ké bajam-aje banyii esim aje anyii. Nyǐ o*da/tigi o-mîng kiǐtí-kyise-kyifen-Osówo echi*. Kángkáng buchú ne esû, nyǐ mu o-fâ Osówo ké esong ecíp ne banshwam efé.

³⁸ Ké ochíchí-nkéré ámu, nyǐ o/baribi, o-kó Osówo asǎma. Ne nyǐ o-raa kyi-kim ne wǎn ámu o-sét kángkáng banet ḿbé ba/mû ba-bám m ba/fu, Osówo oba-chi banet ḿbé Jerúsélem ba-firi ké byiko ebe.

Ba/fím ba-fyi ne Jisos ké Názáret

³⁹ Ké nkéré mbé baa/man kángkáng byěm echi wǎ eringe nyí kyije ńkyí Otu Kyítá kyi/sét, mbé ba/bwa dyijê Gályílyi, ba-fyi ké Názáret.

⁴⁰ Wǎn o-kán o-firi ne busa. Nyǐ o/mû o-nyît ng byinyídíng chwóó. Banjware ḿbé Osówo ba/mû ne nyǐ.

Jisos ne Bubwásíng ké Kafâ-Kiǐtí-Kyise-Kyifen-Osówo echi

⁴¹ Kángkáng aje, bonchí ne boné-Jisos ba-fwam m ece Jerúsélem ké dyijî-kyifen ńkyí Shwôm.

⁴² Ké nkéré Jisos oo/rí aje diǐkpú ne afee, bonchí ne boné ba-kpî ǎ ba-dim ne nyǐ ké dyijî ándyi, wǎ eringe nyí mbe ba-fwam m echi.

⁴³ Ké nkéré mú dyijî dii/man, bonchí ne boné-Jisos ba-kpet ebwa esim dyijê. Nké Jisos mú wǎn ebe o/waa áku ké Jerúsélem. Bonchí ne boné ba*da/nyît*.

⁴⁴ Mbé ba/mû mbe ba-kabe ng ba/fu, Jisos mu ké burwám-banet ḿbú mbé ba/cen ne mbé. Mbé ba/cen ké kyirim-dyicí gbât, ba-kpet ǎ ekyé ké burwám ḿbú bwǎn-bané ebe ne bacín ebe.

⁴⁵ Ba*da ǎ eri*. Ne ba-bwa kâng esim ḿbú Jerúsélem ba-kyé ng ǎ ba-câ.

⁴⁶ Ké ací achât, ne ba-da-ri ǎ ké kafâ-kiǐtí-kyise-kyifen-Osówo echi, ké oo/kyú áku me ne bantánge Byije-Músis ḿbé banet-Jûs, mu o-jwo ng kámbé, o-bí ng to kámbé bǎmbím.

⁴⁷ Kángkáng banet ḿbé ba/mû ba-jwo ng ǎ kyi/chi kámbé wǎ chwǒm-akat ké dyizong-bubong ńdyí o/mû ne ndyí, ké bǎmbím ebe ḿbé o/mû o-faa ng.

⁴⁸ Bonchí ne boné emen ba/waa ocím ké dyishí fúú ké nkéré mú ba/ri ǎ. Ne boné emen o-bí ǎ o/fu, wǎn ejí, ebóng kyi/chi ne a-chi bě dyizong-chwǒm ńdyín. Me ne ńchân byi/mû byi*fí to byi-nyît ng ńkyí byidachi* ké okyê mú byimu byi-kyé ng ǒ.

⁴⁹ Jisos o-bí kámbé o/fu, ebóng kyi/chi ne bamu ba-kyé ng mě. Ben ba/mû ba*fí ba-nyît ng ba/fu, me m-man n-kyú ké kyise ńkyí Bonchí ejí*?

⁵⁰ Nké bonchí ne boné ba*da/nyît dyishí-chwǒm ńdyí nyǐ o/raa ne mbé éné*.

⁵¹ Jisos o-dim kâng dyijê ne mbé ké Názáret, o-kyâ kámbé ofê. Ne boné emen o-kúng byěm ḿbyín o-tî ké dyityém emen.

⁵² Ne Jisos o-kán ké enyam-byiko ne ké bubong. O-jê ng Osówo, o-nyîn n to banet dyityém.