Kolóshan 1 - Bokyi Bible

¹ Me Pôl mú ké okabe mú Osówo mu onet-kyitwóm-Jisos Karâs, ne Tyímótyi mú wǎn-boné eten nké byimu byi-sáng ng léta mún byi-kye

² banet-Osówo ḿbé mbe ké Kolósa, ḿbé mbe barî-banet eten ké ofê mú mbe ba-kyâ Karâs. Kyi/bát Osówo Bonchí eten okye běn ochwâp ne bunyîn-dyityém.

Nshwam-Asǎma ekó

³ Be kángkáng nkéré byimu byi-kó ng Osówo asǎma mú mu Bonchí-Jisos Karâs, Otu Kyítá eten ké nkéré byimu byi-fâ nshwam byi-kyâ Osówo ké bubwô enen.

⁴ Ké nǎ, be bii/jwo kyi-kim ne dyityém enen ńdyí ba/fé ne Jisos Karâs, ne kyi-kim to ne kyijé enen ńkyí bamu ne nkyí ne kángkáng banet-Osówo.

⁵ Ké nkéré ba/twóm kyitwóm ńkyí ntûntû, ányi Bǎmpém ḿbé Banong, ba-bâ ba-kâm běn ké mbwôp kashú, ben ba/jwo kyi-kim ne achi etî nyí Bǎmpém ámbe mbe ba-kyâ. Ké bubwô ámbu, dyityém enen ńdyí ba/fé ne Jisos Karâs ne kyijé enen byi/jêem busi ké ńkyí bamu ba-tî ng achi, ńkyí Osówo oo/tî běn kánkyí kanong kyíbóng.

⁶ Bǎmpém ḿbé Banong ba-cen n ne banjware ne mbe ba-káng ng ejíí emúmú wǎ eringe kyi/mû ne ben kyi-fím ké dyicí ńdyí ké mbwôp kashú ńdyí ba/jwo kyi-kim ne ochwâp mú Osówo ne ba-kpet enyît kyi-kim ne mǔ wǎ eringe nyí mu chíchí.

⁷ Ben ba/kwâa ńkyín ne Épafaras mú óten-ḿgbán mú dyityém, mú o/fé dyityém ké bǎmkpóngé ḿbé Karâs ké bubwô eten.

⁸ Nyǐ o/sét bě kyi-kim ne kyijé ńkyí Busun-Osówo boo/kye běn.

⁹ Ké bubwô ḿbún, be byimu byi-fâ nshwam kángkáng nkéré byi-kyâ Osówo ké bubwô enen, kyi-fím ké nkéré mú be byi/jwo kyi-kim ne ben. Be byimu byi-bí ng Osówo byi/fu, ofé běn byinyídíng ḿbyí okabe emen ké byiko ne kángkáng bubong ne byěm enyît ḿbyí Busun emen mbu bu-kyâ.

¹⁰ Ne ben ba/chi ba-man n ekyú kâng dyikpen wǎ eringe nyí Otu Kyítá mu o-ryuu ng, ne kángkáng nkéré ba-kûchi ńkyí nkyi kyi-nyîn n ǎ dyityém. Akpen enen a/chi a-zím byirim ké kángkáng azong-bǎmkpóngé ḿbé banong, ne ben ba/chi ba-kán ké Osówo enyît.

¹¹ Kyi/bát Osówo ochi běn ba-shwane ké kángkáng busa ḿbú mbu bu-fím m ké kiǐtí-busa emen. Eringe nyí ben badaman eryí ofit ké kángkáng byěm ne dyityém ńdyí degere.

¹² Ba-kó to Osówo mú Bonchí eten asǎma ne bunyîn-dyityém, nyǐ mú o/chi běn ba-kwárê eringe nyí badakoo to ńkyí enen, ńkyí nyǐ o/tî banet emen ké Butu ḿbú kiinwángé emen.

¹³ Nyǐ oo/chi bě byi-fem ké busa ḿbú kyifip, ne o-bwa ne be kanong ké Butu ḿbú Wǎn emen mú dyityém,

¹⁴ mú nyǐ oo/nyii bě ké bubwô emen. Ányi kyi/byí, Osówo oo/pwoo bě ké byibî eten.

Karâs wǎ Onet ne Bǎmkpóngé Emen

¹⁵ Karâs, mú bii/ri ǎ, o/bí Osówo mú oo*nwa eri*. Nyǐ o-chi i Ókpá-Wǎn mú o/rêe o-shwôm kángkáng byěm ḿbyí Osówo o/chi.

¹⁶ Ké ebóng, ké busa ḿbú Karâs nké Osówo o/chi kángkáng byěm ḿbyí mbyi kyíbóng ne ḿbyí ké ejíí, ḿbyí byidaman eri ne ḿbyí bii*man eri* cibicibi ne kángkáng barím ne bací ne busa-bukye nang burá ne kángkáng batu-ashí ḿbé kyíbóng. Osówo o/chi ejíí emúmú ké busa ḿbú Karâs, ne byěm ámbyi to kángkáng mbyi ké bubwô ḿbú Karâs.

¹⁷ Nyǐ o/byí kpá o-sí kángkáng byěm, ne ké ocibi ne nyǐ, kángkáng byěm byi-bwom m kerededet.

¹⁸ Nyǐ nké mu onet-dyishí mú enyam-byiko emen, ányi banet-ékwâbashi nyí emen. Nyǐ o-chi i nkye dyikpen mú enyam-byiko ányi. O-chi i to Ókpá-Wǎn mú Osówo o/jwóbê ǎ ké bukyû, eringe nyí nyǐ kǎnchí odakyú mbwôp kashú ké kángkáng byěm.

¹⁹ Ké ebóng, kyi/mû ké okabe mú Osówo nké Wǎn emen to mu dyizong dyibónge wǎ nyǐ.

²⁰ Ké bubwô ḿbú Wǎn emen kâng nké Osówo o/fu, nyǐ o-bwa ng esim ne bubóng ne esí byi-kâm ǎ. Osówo o/chi kyikwáré ne banet ké bubwô ḿbú bukyû ḿbú Wǎn emen, ké kyikwap ńkyí ba/shwân ǎ ké nkyí, ne o-bwa esim kâng ne kángkáng byěm ḿbyí ké bubóng ne esí byi-kâm ǎ.

²¹ Ké nkéré obónge, ben ba/mû ba*fí fáráng ne Osówo* ne ba/mû banet-bushwôn emen ké bubwô-byibî-byěm ḿbyí ba/chi ne ké ḿbú byibî-okabe enen.

²² Nké kántîk, ké bubwô-bukyû ḿbú Wǎn emen o/kpú ne enyam-byiko wǎ onet, Osówo oo/chi běn ba-firi bacín emen, eringe nyí nyǐ odabê ne ben wǎ banet ḿbé banong, ḿbé ba*fí ne kyibî* ne baa*kyú ne ébîn* ké bushú emen.

²³ Nké ben ba-man ba-ca kashú ké dyityém enen ńdyí ba/fé ne Karâs ké kiimkpet kyikû ńkyí shwaneshwane ne ńkyí ntûntû. *Da n̂g enáng byiko enen ké achi enen etî nyí baa/já ké nkéré mú ben ba/jwo Bǎmpém ḿbé Banong* ḿbé me n/firi kámbé ḿgbán, ḿbé baa/pem nang yeě nang yeě ké ejíí.

Bǎmkpóngé ḿbé Pôl o/chi o-kye Ékwâbashi nyí Karâs

²⁴ Kántîk, me n-kú n-jêe ng kyi-kim ne busông ejí ḿbú mu n-ri ng ké dyishí enen. Ké ebóng, ké bubwô ḿbú busông ḿbú me mu n-ri ng ké enyam-byiko ejí, me mu n-chwáp ng m-man kyikim-busông ńkyí kyi/waa ké dyishí ńdyí enyam-byiko-Karâs, ányi banet-ékwâbashi nyí Karâs.

²⁵ Ne me Osówo oo/chi mě n-firi ḿgbán mú banet-ékwâbashi nyí Karâs, nyǐ mú o/kye mě bǎmkpóngé ḿbén o/fu, me nchi kámbé ké kanong ńké enen. Bǎmkpóngé ámbe, ányi kyitwóm emen esét wááng

²⁶ ńkyí nyǐ o/mû o/tî kánkyí ké kafâ-dyityém emen, ké bushú ḿbú kángkáng banet, ké nkéré mú o/shwôm ké esim. Nké kántîk, oo/byí ne nkyí kyíjí wááng ké bushú ḿbú banet emen.

²⁷ Okabe mú Osówo mu něen, o/fu, nyǐ o-chi i banet emen ba-nyît kyitwóm emen ńkyí nkyi ké kafâ-dyityém emen. Kyitwóm ńkyín nkyi ne kiǐtí-akpee ńkyí nyǐ odasét kángkáng banet. Ne kyitwóm ánkyi ńkyí ké kafâ-dyityém emen nkyi něen, Karâs mu ké atyém enen, ányi kyi/byí, ben to ba/chi ba-nung ké busan-Osówo ḿbú ragerage.

²⁸ Be kâng nké byimu byi-sét ng kángkáng banet kyi-kim ne Karâs. Be byimu byi-kuri ng nang yeě nang yeě ekó, byi-tángê e ǎ to ne kángkáng byinyídíng ḿbyí byimu ne mbyí, eringe nyí byida ǎ echi o-bâ ké bushú ḿbú Osówo wǎ onet mú oo/kán o-kwárê ké ocibi ne Karâs.

²⁹ Eringe nyí n/chi n-chi ńkyín, me n-yip ng kiǐtí-busa ńkyí Karâs mu o-kyâ mě, ńkyí nkyi mě ké byiko, n-nwa n-chi bǎmkpóngé n-fé busa kanong.