Jêmsyi 1 - Bokyi Bible

¹ Me Jêmsyi mú mu ḿgbán-Osówo ne mú Jisos Karâs, Otu Kyítá nké mu n-sáng ng léta mún n-ta kángkáng banet ḿbé Osówo ḿbé byikû-banet emen diǐkpú ne byifee, ḿbé mbe byiryibyiryi ké ejíí emúmú kyiraa.

Bubong ne Dyityém efé ne Osówo

² Bwǎn-bané ejí, ké nkéré kángkáng azong-ekan aa/bê a-kâm běn, kúng n̂g kányí emúmú wǎ chwǒm-bunyîn-dyityém.

³ Ké nǎ, ben bamu ba-nyît ng ba/fu, ké nkéré dyityém enen ńdyí bamu ba-fâ ne Osówo dii/kpógê azong-ekan ányi, ba-firi ng ne busa ḿbú ofit eryí.

⁴ Nké ca n̂g kashú ne ofit enen mú bamu ba-ryí i, eringe nyí ben badakwárê kerededet, chwǒm kii*kaa běn*.

⁵ Nké â onet nang obónge ké burwám enen o/kaa bubong, onet ámu ofé nshwam o-kye Osówo mú o/chi o-kye ǎ kámbú. Ké nǎ, Osówo o-kyâ kángkáng banet byěm ké bunyîn-dyityém, oo*kérê*.

⁶ Nké onet ámu obí ké dyityém dyibónge efé ne Osówo, oo*kyú ne atyém afee*. Ké nǎ, onet mú mu ne atyém afee mu wǎ kace ńké kadanáng, ńké afú adatín kánké a-náng ng kánké.

^7-8 Ké ebóng, dyizong-onet ándyi dyi*dachi dyi-kabe dyi/fu, onet mú mu ne atyém afee, mú o*fí dyityém dyibónge ké kángkáng édúú emen* o/chi o-koo chwǒm nang kyibónge ne Otu Kyítá*.

Kyikpu ne Efang

⁹ Orî-onet mú mu kyikpu o-man o-jêe ké nkéré Osówo oo/bêem ǎ kyíbóng,

¹⁰ ne orî-onet mú mu nfang-onet o-man o-jêe to ké nkéré Osówo oo/shû ǎ kyísí. Ké ebóng, nfang-onet o-rím m wǎ bunong-ekong-kyichí.

¹¹ Óbyísû o-byí i ne busông emen ne o-shí kyichí ánkyi. Ekong emen e-roo, ne bunong ḿbú kyichí ánkyi bu-rím. Ké dyizong-bukwóp ámbu to bubónge nké Osówo o/chi o-ju nfang-onet ámu ké nkéré o-kú o-tóbê ng efang emen.

Okan

¹² Bunyîn-dyityém mbu ne onet mú ké nkéré okan oo/bê o-kâm ǎ o*fí o-mîng ng Osówo ofê ekye*. Ké ebóng, ké nkéré oo/kpógê okan ámu, nyǐ o/chi o-koo dyikpen ńdyí Osówo oo/ryí banet ḿbé nyǐ mu o-jê ng kámbé ocím wǎ eyáré emen.

¹³ Â onet o/nung ké okan ámu, onet ámu oo*man o-raa o/fu, okan mún mu o-fím m ne Osówo*. Ké nǎ, kyibî kii*man ekan Osówo* ne nyǐ o*fí o-kan n onet nang obónge*.

¹⁴ Nké onet o-nung ng ké okan ké nkéré kyibî-okabe emen kii/kám ǎ kyi-fé kyísí wǎ kaǎtám.

¹⁵ Kyibî-okabe emen kâng kyi-koo dyifít, kyi-fwon kyibî, ne ké nkéré kyibî ánkyi kii/kán kanong kanong, kyi-fwon bukyû.

¹⁶ Ba*dachi ba-nîm běn* ǎ bwǎn-bané ejí ḿbé dyityém*.

¹⁷ Kángkáng eyáré nyí enong ne kángkáng eyáré to nyí e/kwárê nyi e-fím m kyíbóng. Nyǐ nyi e-fím m ne Osówo mú mu Nchi byěm ḿbyí mbyi byi-san n kyíbóng. Osówo oyén oo*yángê* nyǐ to nang esim oo*bírî o/fu, kyifip kyiróng*.

¹⁸ Ké okabe mú emen nyǐ oyén, ké bubwô ḿbú ejá nyí ntûntû nké nyǐ o/chi bě, eringe nyí be byidakyú wǎ bambwôp kashú-byirim-byichí ké burwám ḿbú kángkáng byěm ḿbyí o/chi.

Byiraa-Osówo ejwo ne Ochi eringe ba/jwo

¹⁹ Kû n̂g ezîim ńkyín, ǎ bwǎn-bané ejí ḿbé dyityém. Nang yeě oman o-kwáng ké ojwo, nké o*dakwáng ké kyiraa ne ké dyityém esa*.

²⁰ Ké ebóng, dyityém esa ńdyí onet dii*já ńkyí kanong ńké Osówo nke ka-ryuu ng*.

²¹ Mîng n̂g kâng echi byibî-édúú ne bakunkun-byěm. Bwa n̂g ne byiko enen kyísí ba-kye Osówo, ne ba-koo to byiraa emen ḿbyí nyǐ mu o-fâ běn ké atyém. Ké ebóng, mbyí nké byi/chi byi-man běn enyángê.

²² *Da n̂g eróng enyam ké byiraa ḿbyí Osówo ejwo ojwo ójwo*. Nké kû n̂g echi eringe nyí ba/jwo.

²³ Nang yeě nké mu o-fwôo ng atông ké byiraa ḿbyí Osówo, nké o*fí o-chi i wǎ eringe byi/sét* onet ámu mu wǎ onet mú mu o-tún n achi ké éyên o-ri ng byiko emen.

²⁴ Onet ámu o-ri ng byiko emen kanong kanong, ne o-kám abwô o-dim. Ké kaǎnyín-nkéré, o-ráp eringe nyí nyǐ mu.

²⁵ Nké onet kâng mú mu o-kpúrî ng dííng ké ochíchí-kyije-Karâs, ńkyí kyidachi banet ba-kyú ké byiko ebe, mú mu o-tî ng to dyityém ké nkyí kángkáng nkéré, ne nyǐ o*fí o-jwo ng ojwo ójwo* o-ráp kánkyí* nké mu o-chi i kánkyí eringe o/jwo, onet ámu, Osówo o/chi o-jware ǎ ké kángkáng byěm emen ḿbyí mu o-chi i.

²⁶ Onet mu kô mú o/kabe o/fu, nyǐ mu kanong ké bushú ḿbú Osówo? Â onet ámu o*fí o-man n eníbî kabyíbabang emen* kanong emen ké bushú ḿbú Osówo ka*da/byí chwǒm* ne nyǐ to mu o-nîm m byiko emen.

²⁷ Ńkyí Osówo Bonchí eten o/bángê o/fu, nkyi ochíchí-kanong ne kpárádádát ké bushú ḿbú emen nkyi něen, onet okûtún bwǎn-byibén ne banyǐnkú ké busông ebe ḿbú mbe ba-ri ng. Onet to o*dachi o-bên byiko emen ké byibî ḿbyí ké ejíí*.