Émos 9 - Bokyi Bible

Mpan mú Óburúkpâbí

¹ Me n/ri Óburúkpâbí ké o/bwom ké kyikit-kyifen emen echi. Nyǐ o/kye busa o/fu, kíbî ké ashí-byikwap nyí kyise-kyifen-Osówo echi kakânkakân eringe nyí byikwap byimúmú byidanáng. Sé kámbyí a-mîng kámbyí byi-róng banet ké ashí. Banet ḿbé ba/waa n/chi n-ju kámbé ké byití. Onet o*fí mú o/chi o-chêe*. Onet o*fí mú o/chi o-fem*.

² Nang ba-bwa ba-sím dyibíng ba-ríbî ké oshê-bakúsí, n/chi n-kám kámbé. Nang ba-bwa ba-yú ba-jâ ké bubóng, n/chi m-bwa ne mbé kyísí.

³ Â ba/rem kyíbóng-kaku ńké Kámel, n/chi n-kyé kámbé, n-kám kámbé. Â ba/chêe mě ba-da-rem ké kyikû-baya ḿbé baryên, n/chi n-kye kiǐnyám-baya busa kyi-jwóm kámbé.

⁴ Â banet-bushwôn ebe ba/kám kámbé ba-dim ne mbé wǎ básóng, n/chi n-kye busa ba-ju kámbé. Nn/tî dyityém n/fu, m-man n-ju kámbé, n*da/tî n/fu, n-chwáp ng kámbé*.

⁵ Óburúkpâbí mú mu Otu Kyítá mú o/rêe o-shwôm o-ta ng ejíí e-náng, kángkáng banet ḿbé mbe ké nyǐ ba-tii. Ejíí emúmú e-yú u kyíbóng e-shû kyísí wǎ kace ńké Nâl.

⁶ Óburúkpâbí o/bi oshê mú emen kyíbóng o-yip bubóng o-cít ejíí. Nyǐ mu o-kó ng omu mú ké baya ḿbé baryên o-yip kámú o-pwó ké esí. Nyǐ o-bángê e Óburúkpâbí.

⁷ Óburúkpâbí o/raa o/fu, banet ḿbé Ézerel, me mu n-kabe ng kyi-kim ne banet ḿbé Sudân wǎ eringe nyí mu n-kabe ng kyi-kim ne ben. Me n/fím ne banet ḿbé Fyilíta ké Kyirît m-bâ ne mbé, n-fím to ne ḿbé Syírya ké Kê m-bâ ne mbé wǎ eringe nyí me n/fím ne ben ké Éjip.

⁸ Me Osówo Óburúkpâbí mu n-ri ng butu ḿbún ḿbú Ézerel, ḿbú mbu bu-chi i byibî, ne n/chi n-chi kámbú bu-man ké ejíí. Nké mm*ba/chi n-ju kángkáng kyikû-banet ńkyí Jekôp*.

⁹ Me n/chi n-kye busa n-ninge banet ḿbé Ézerel wǎ esang-byichí nyí badacage. N/chi n-ninge kámbé ké eshê nyí nyi banet-bushwôn ebe n-fîm kángkáng banet ḿbé ba*da/byí chwǒm*.

¹⁰ Ba/chi ba-ju banchi byibî ḿbé mbe ké burwám-banet ejí ké byití, kángkáng banet ḿbé mbe ba-raa ng ba/fu, Osówo oo*ba/chi o-bángê kyibî kyi-fárâng bě*.

Osówo o/chi o-bwa Esim ne Banet ḿbé Ézerel

¹¹ Óburúkpâbí o/raa o/fu, dyicí ndyi dyi-bâ ńdyí n/chi m-bwa esim ne butu ḿbú Otu Dívit, ḿbú bu/firi wǎ kyise ńkyí kii/bûu kyi-myii. N/chi m-bwât ekpe emen, m-bwât kánkyí m-bi. N/chi m-bwât kánkyí m-bi n-chi kánkyí kyi-firi wǎ eringe nyí kyi/mû ké nkéré mú o/shwôm ké esim.

¹² Ne ké bubwô ámbu, banet ḿbé Ézerel ba/chi ba-koo kyikim-esí ńkyí Édom ńkyí kyi/waa ne kángkáng eshê nyí ké nkéré obónge e/mû nyí ejí. Óburúkpâbí mú o/chi ńkyín ne kyi-chi, nké o/raa.

¹³ Óburúkpâbí o/raa o/fu, ací nyi a-bâ nyí byíkwôn byi/chi byi-kán babap byi-shwôm eringe nyí banet badaman ebóng kámbyí, ne nyí byirim-byichí byi/chi byi-zím babap byi-shwôm eringe nyí banet badakúng kámbyí ba-chi bato. Eku nyí nyáám e/chi e-kûsen bato ḿbé badanyîn, ne eku nyí kyísí e/chi e-kûsen to ne mbé.

¹⁴ Me n/chi m-bwa esim ne banet ejí ké esí ebe. Mbé ba/chi ba-bwât oshê ebe mú oo/bûu ba-bi ba-kyú ké mǔ. Mbé ba/chi ba-kwón byichí, ba-jwáp bato emen. Mbé ba/chi ba-kpang byifát ba-ryí ńkyí ba/kwón ké mbyí.

¹⁵ Me n/chi n-kwón banet ejí ké esí nyí n/kye kámbé, ne onet o*fí mú o/chi o-chîzú kámbé*. Óburúkpâbí mú mu Osówo enen nké o/raa.