Dyitórónómyi 22 - Bokyi Bible

¹ Â ba/ri mpong nang etám-ebû nyí ónen-onet-Ézerel nyí e*fí to e-nyît ng kiǐfáng* *da n̂g emîng kányí*. Yip n̂g kányí ba-ba-kye oyén.

² Nké â oyén o*fí o-kyú u jwángjwáng* nang ba*fí ba-nyît ng oyén* kúng n̂g kányí ba-jâ ne nyǐ. Â oyén o-kú o-kyé ng kányí, kúng n̂g kányí ba-kye ǎ.

³ Chi n̂g eringe ebónge â nang ba/ri kaanyam-atû nang kyídí nang chwǒm kyikíri ńkyí kii/tánê orî-onet-Ézerel.

⁴ Â kaanyam-atû nang mpong mú orî-onet-Ézerel o/myii kyísí, *da n̂g emîng kámú*. Chwáp ǎ o-bêem kámú o-bwom cip.

⁵ Banyinyi ba*dachi ba-bwá byídí ḿbyí banyinchéng* ne banyinchéng to ba*dachi ba-bwá byídí ḿbyí banyinyi*. Banet ḿbé mbe ba-chi i azong-byěm ámbyi ba-sa ng Óburúkpâbí mú mu Osówo enen kafâ.

⁶ Â ba/ri dyiju-kanurung ké kyichí nang ké ecing ne boné-kanurung mú oo/cít ké ácě nang ké bwǎn, *da n̂g eyip kanurung ánke ba-dim ne nké*.

⁷ Ba-man n ekúng bwǎn-bunurung ámbu, nké ba-man ba-mîng boné-kanurung o-jâ eringe nyí ben badakyú dyikpen ńdyí dyidakwóp ne ńdyí dyinong.

⁸ Â ba/bi kyise ńkyí kyifyîfî, fé n̂g oro o-wáp bajep kerékeré. Â ba/chi éné, baa*ba/chi ba-níbî běn* â onet o/zûu ké mbwôm o-róng o-kpú*.

⁹ *Da n̂g ekwón kyíkwôn kyikíri ké kyifát-byirim-byichí*. Â ba/kwón baa*ba/chi ba-bángê běn ba-ryí byirim-byichí ámbyi* nang kyíkwôn ánkyi*.

¹⁰ *Da n̂g ebwá mpong ne kaanyam-atû kyikit kyibónge* byi-chi bǎmkpóngé*.

¹¹ *Da n̂g ebwá kyídí ńkyí ba/kúng bacat ḿbé eríp-etám-ebû ne ḿbé okpówo ba-chi kánkyí*.

¹² Tím m̂ byirim-bacat byinyii ké ocím-byídí enen.

Byije kyi-kim ne Banet erí ne Barî

¹³ Â onet o/bé wǎn-onyinyi, ka-bwon o/fu, nyǐ oo*chi to mú wǎn-onyinyi ámu*.

¹⁴ Ké bubwô ámbu, o-sét kyisédéng o-bât ǎ, o-sét o/fu, ba/rí kpáá ne nyǐ, ne nyǐ o-bé ǎ.

¹⁵ Â ńkyín kyi/chi, bonchí ne boné-wǎn-onyinyi ámu ba/chi ba-yip byídí-baróng ḿbyí dyicí ńdyí ba/rí ne barî, ḿbyí byi/tông byi/fu, ba/mû ba*da/rí ne ne mú wǎn-onyinyi* ba-tông banet-ashí-oshê ké esuk.

¹⁶ Bonchí-wǎn-onyinyi ámu o/chi o-sét kámbé o/fu, me n/kúng wǎn ejí n-kye onyinchéng mún n/fu, obé ǎ, nké kántîk o*fí to o-ryuu ng ǎ*.

¹⁷ Oo/sét byisédéng o-bât ǎ o/fu, ba/rí kpáá ne nyǐ, ne nyǐ o-bé ǎ. Nké nyín ekap nyí e/tông e/fu, wǎn ejí o/mû o*da/wá o-rí ne onyinchéng*. Kan n̂ achi ba-ri baróng ḿbé ba/ta ké kyídí ké dyicí ńdyí ba/bé dyibé, ba-rí ne barî.

¹⁸ Banet-ashí-oshê kâng ba/chi ba-kúng onyinchéng ámu ba-mín ǎ.

¹⁹ Ba-két ǎ bajam-akpuga-basyílyíba atánge, ba-kúng kányí ba-kye bonchí mú wǎn-onyinyi, ké nǎ, onyinchéng ámu o/fé wǎn-onyinyi mú Ézerel éshwân. Wǎn ámu kâng o-man o-waa onyi mú onyinchéng ámu, ne oo*man eman dyibé ne nyǐ* tete o-kpú*.

²⁰ Nké â nkyi ntûntû ńkyí chwǒm kyi*fí ńkyí kyi/tông kyi/fu, ba/mû ba*da/rí ne ne mú wǎn-onyinyi*

²¹ bakúng kâng mú wǎn-onyinyi ámu ba-ca ne nyǐ ké ocím-dyifyi-kyise mú bonchí, banyinchéng ḿbé ba/fím oshê emen ba-tím ǎ aká ányi ba-ju. Wǎn-onyinyi ámu oo/chi chwǒm-éshwân ké burwám-banet eten, ńkyí o/mîng ba-rí ne nyǐ ne o-bé otyép, ké nkéré o/mû o/tôong o-kyú u ké kyise-bonchí. Ké bukwóp ḿbún nké ba/chi ba-fîm kyibî ánkyi ké oshê enen.

²² Â ba/kâm onet mu o-chi i kyinam ne onyi-onet, ba-man ba-ju kámbé ashí amúmú. Ké bukwóp ḿbún nké ba/chi ba-fîm kyibî ánkyi ké oshê enen.

²³ Â ba/kâm onyinchéng mú mu o-rí i ne wǎn-onyinyi mú onet okíri o/fu, nyǐ o-bé ng ǎ,

²⁴ kúng n̂g kámbé ba-byí ké kafâ-oshê ba-tím kámbé aká ba-ju. Mú wǎn-onyinyi o-man o-kpú, ké nǎ, o*da/tii o/fu, bachwáp ǎ* nang ké o/mû ké kafâ-oshê mú banet ba/mû ba/chi ba-jwo ǎ*. Mú onyinchéng to o-man o-kpú, ké nǎ, o/rí ne wǎn-onyinyi mú baa/ryí búkyî ne nyǐ. Ké bukwóp ḿbún nké ba/chi ba-fîm kyibî ánkyi ké oshê enen.

²⁵ Â onyinchéng o/bam wǎn-onyinyi ké dyikán o-rí ne nyǐ, mú onet okíri oo/ryí búkyî ne nyǐ, ba-man ba-ju mú onyinchéng nké nke.

²⁶ Ba*dachi ba-chi mú wǎn-onyinyi chwǒm* ké nǎ, o*da/chi kyibî ńkyí bada ǎ eju*. Kyije ńkyín nkyi eringe ebónge ne ńkyí onet odakye onet okíri bunwa o-ju ǎ.

²⁷ Mú onyinchéng ámu o/bam ǎ obǎm ké dyikán o-rí ne nyǐ, nké nang o/mû o/tii o/fu, bachwáp ǎ, onet o/mû o*fí mú oda ǎ echwáp*.

²⁸ Â ba/kám onet mú o/bam wǎn-onyinyi mú o*fí ne otyép* o-rí ne nyǐ,

²⁹ onyinchéng ámu o/chi o-kye bonchí-wǎn-onyinyi ámu bajam-akpuga-syílyíba bafee esim diǐkpú, wǎ akpuga-dyibé, o-bé wǎn-onyinyi ámu, ké nǎ, o/bam ǎ o-rí ne nyǐ. Oo*man o-man to dyibé ne mú wǎn-onyinyi ámu* tete o-kpú*.

³⁰ Onet nang obónge o*dachi o-dángê bonchí* o-rí ne onyi mú bonchí emen nang obónge*.