Dyitórónómyi 2 - Bokyi Bible

¹ Byi/bírî ké nkuli kyikû byi-dim ké kyikim-dyikán, byi-cen ké kiǐfáng ńkyí nkyi kyi-jâ dyiga ńdyí Ákwaba, wǎ eringe nyí Óburúkpâbí o/mû o/sét bě. Ne byi/bên kyikim-nkéré chwóó byimu byi-yêe ng ké esí-eku éku nyí Édom.

² Ne Óburúkpâbí o-sét mě kâng

³ o/fu, nkéré mú be bii/yêe ké eku ányi oo/kwárê, be byibírî byi-jâ bushûyû.

⁴ Nyǐ o/sét mě o/fu, me nsét běn byiraa ḿbyín, o/fu, ben ba-kú ba-bâ eshwôm esí-eku éku nyí Édom, esí nyí bwǎn-bané enen ḿbé bwǎn-Éso. Mbé ba/chi ba-shî běn,

⁵ nké *da n̂g echi ba-nwa byití ne mbé* ké nǎ, mm*ba/chi n-kye běn kaǎnyín-esí ebe nang kabónge*. Me nn/kúng Édom n-kye bwǎn-Éso.

⁶ Ba-man n eré byiryíng ne omu ne mbé.

⁷ Zîim m̂ eringe nyí Óburúkpâbí mú mu Osówo enen oo/jware běn ké kángkáng byěm ḿbyí ben baa/chi. Nyǐ o/tún běn kanong kanong ké nkéré mú ba/mû ba-yêe ng ké kiimbâng-kyikim-dyikán ńkyín. Nyǐ oo/kyú ne ben ké bajam-aje ḿbén bafee, ne ben ba/já kángkáng byěm ḿbyí ba/mû ba-ryuu ng.

⁸ Ne byi-dim kâng byi-ca kashú, byi-mîng kiǐfáng ńkyí kyi/fím ké eshê nyí Élat ne Ezón-Gébe kyi-jâ ké baya ḿbé Bukyû, ne byi-bírî bushûyû ké kyicê ńkyí óbyísû mu o-byí i, byi-tông kashú ḿbú Mówep.

⁹ Óburúkpâbí o-sét mě o/fu, *da n̂g ekye banet ḿbé Mówep afaníkong* ḿbé mbe bwǎn-Lôt* ba-nwa nang byití ne mbé*. Me nn/kye kámbé oshê mú Âa, ne mm*ba/chi n-kye běn esí ebe nang ebónge*.

¹⁰ Kiǐtí-kyikû-banet ńkyí biǐnât-banet ḿbé ba/mû ba-bángê e Émim ba/mû ba-kyú u ké Âa. Mbé ba/mû ba/nárê wǎ banet ḿbé Ának, ḿbé ba/mû to biǐnât-banet.

¹¹ Wǎ banet ḿbé Ának, ba/mû ba-kó ng to kámbé Réfyam, nké banet ḿbé Mówep ba/mû ba-kó ng kámbé Émim.

¹² Banet ḿbé Hórit ba/mû ba-kyú u ké Édom, nké bwǎn-Éso ba/ró kámbé, ba-bên eshê ebe, ba-kpet ekyú ányi, wǎ eringe nyí banet-Ézerel ba/ró banet-bushwôn ebe ké esí nyí Óburúkpâbí o/kye kámbé.

¹³ Ne byi-nyáng kâng kace ńké Zéret wǎ eringe nyí Óburúkpâbí o/sét bě o/fu, byinyáng.

¹⁴ Ńkyín kyi/mû ké aje bujam esim onyiryiká ne achât ké nkéré mú byi/dim byi-mîng Kádyishi-Bánya. Kángkáng bannwa byití ḿbé kyikim-banet ánkyi ba/mû baa/kpú, wǎ eringe nyí Óburúkpâbí o/mû o/sét o/fu, ba/chi ba-kpú.

¹⁵ Óburúkpâbí o/bwom bunwa ne mbé tete o-ju kámbé kángkáng.

¹⁶ Ké nkéré mú baa/kpú kángkáng,

¹⁷ Óburúkpâbí o/sét bě o/fu,

¹⁸ kurún, ben ba/chi ba-shwôm ké kyikim-esí ńkyí Mówep, ké kiǐfáng ńkyí Âa.

¹⁹ Â ba/shwôm ké nyǐ, ba/chi ba-fárâng esí nyí banet-Ámon ḿbé bwǎn-Lôt. *Da n̂g echi ba-kye kámbé afaníkong* ba-nwa nang byití ne mbé* ké nǎ, me mm*ba/chi n-kye běn esí ebe nang ebónge* nyí nn/kye kámbé*.

²⁰ Kyikim-esí ńkyín ba-kó ng to kánkyí esí nyí banet-Réfyam, dyizîn ńdyí banet ḿbé ba/mû ba-kyú u ányi. Banet ḿbé Ámon ba/mû ba-kó ng kámbé Zamazúmim.

²¹ Mbé ba/mû ba/kwóp butang wǎ banet ḿbé Ának. Mbé ba/mû ba/jê, ne ba/mû kiǐtí-kyikim-banet. Nké Óburúkpâbí o/ju kámbé, ne banet-Ámon ba-koo esí ebe ba-kyú.

²² Óburúkpâbí o/mû oo/chi dyizong-chwǒm ándyi dyibónge o-kye banet-Édom, ḿbé bwǎn-Éso, ḿbé mbe ba-kyú u ké esí-eku éku nyí Édom. O/ju banet-Hórit, ne banet-Édom ba-koo esí ebe ba-kyú ké nyǐ, ké kyikit ńkyí ba/tôong ba-kyú u kántîk.

²³ Banet ḿbé oshê-Kyirît, mú baya ḿbé Medeterényan ba/wáp kámú ba-fé ké kafâ nké ba/mû ba-kyú u ké esí nyí ké bukô-baya ámbe. Mbé ba/mû ba/ju banet ḿbé Ábim, ḿbé ba/mû ba-kyú u ányi kpákpá, ba-koo kámbé esí ányi kángkáng tete ba-ribi oshê-Gáza ké kyicê ńkyí busyísen.

²⁴ Ké nkéré mú bii/shwôm Mówep, Óburúkpâbí o/raa ne be o/fu, kántîk, dim m̂ ba-da-nyáng kace ńké Ánon. Me n/chi n-kúng Otu Síhon, otu mú Ámórit mú oshê mú Héshibon, cibicibi ne esí emen n-fé běn ké abwô. Kye n̂g ǎ bunwa, ba-kpet ekoo esí emen.

²⁵ Kyi-fím kántîk kyi-ca kashú, n/chi n-chi kángkáng banet ba-kpet běn eshî. Nang yeě nké o/jwo dyizîn enen o/chi o-tím banê ne bushî.

Banet-Ézerel ba/kpógê Otu Síhon

²⁶ Ne n-twóm kâng banet ké kyikim-dyikán ńkyí Kedémot n/fu, baca ba-kâm Otu Síhon mú Héshibon ba-da-sét ǎ kyikwáré ńkyí byi/chi byi-kyú ne nyǐ. N/fu,

²⁷ mîng bě byi-shwôm ké esí eyên. Be byi-shwôm m dángdáng, bii*ján ké kyikit*.

²⁸ Be byi-kyâ akpuga ké byiryíng ḿbyí byi/chi byi-ryí ne omu mú byi/chi byi-jwáp. Ńkyí byimu byi-ryuu ng kyi*da/shwôm byi-shwôm m ké esí eyên*

²⁹ tete byi-nyáng kace ńké Jódan byi-ribi ké esí nyí Óburúkpâbí mú mu Osówo eten mu o-kyâ bě*. Bwǎn-Éso ḿbé mbe ba-kyú u ké Édom ne banet ḿbé Mówep ḿbé mbe ba-kyú u ké Âa ba/mîng bě byi-shwôm ké esí ebe.

³⁰ Nké Otu Síhon o*da/bángê o/fu, be byishwôm ké esí emen*. Óburúkpâbí mú mu Osówo enen o/mû oo/fé ǎ dyishí eshwane o-bírî bunwa, eringe nyí be byida ǎ ekpógê byi-koo esí emen nyí byi/tôong byi-kyú u ké nyǐ.

³¹ Ne Óburúkpâbí o-sét mě kâng o/fu, kan achi a-ri, nn/chi Otu Síhon ne esí emen ee*sóng běn ekpógê*. Koo n̂g esí emen ba-kyú ké nyǐ.

³² Otu Síhon o/byí ne kángkáng banet emen o-bâ bunwa ne be fáráng ne oshê mú Jóhaz,

³³ nké Óburúkpâbí mú mu Osówo eten o/fé bě nyǐ ké abwô, ne byi-ju ǎ ne bwǎn emen ḿbé banyinchéng ne kángkáng banet emen.

³⁴ Ké nkéré ámu obónge, byi/kpógê byi-bên oshê nang orá, byi-ju kángkáng banet, banyinchéng ne banyinyi ne bwǎsíng. Byi*da/mîng onet nang obónge okpó*.

³⁵ Byi/kúng byitú ebe, byi-koo byěm-oshê ebe.

³⁶ Óburúkpâbí mú mu Osówo eten o/mîng bě byi-kpógê kángkáng eshê, fím ké Áro mú mu ké ocím-owo mú Ánon ne oshê mú mu ké otyém ne otyém-owo ámu tete byi-ribi Gyílet. Oshê o*fí mú o/mû ne ekpe nyí e/shwôm bě busa*.

³⁷ Nké byi*da/ce byi-fárâng esí nyí banet ḿbé Ámon* nang bakô-kace ńké Jábok* nang eshê nyí esí-eku éku* nang to ké kyikit kyikíri ńkyí Óburúkpâbí mú mu Osówo eten o/mû o/sét bě o/fu, byi*dace*.