Dyitórónómyi 15 - Bokyi Bible

Dyije ńdyí Aje Káchâtkányi

¹ Ké nkuli kyikû-dyije mú ké kángkáng aje káchâtkányi, ben ba-man ba-pwoo kángkáng afwá-akpuga nyí banet ba/ryí běn.

² Něen nké ben ba/chi ba-kûchi kánkyí. Nang onet-Ézerel orá mú o/mû o/pwoo orî-onet-Ézerel akpuga, o-man o-pwoo ǎ ké dyifwá ándyi. Oo*man o-kan o/fu, nyǐ o-koo ng akpuga ányi*. Óburúkpâbí oyén oo/sét o/fu, nyǐ oo/pwoo dyifwá ándyi.

³ Ba-man n ekoo akpuga nyí ocinónet o/ryí běn, nké baa*man ba-koo nyí orî-onet-Ézerel o/ryí běn*.

⁴ Óburúkpâbí mú mu Osówo enen o/chi o-jware běn ké esí nyí nyǐ mu o-kyâ běn. Onet o*fí ké burwám enen mú o/chi o-waa kyikpu*

⁵ â ben ba/chi ńkyí nyǐ mu o-sét ng běn* ba-tî kángkáng byije kanong kanong ḿbyí me mu n-kyâ běn kurún*.

⁶ Óburúkpâbí o/chi o-jware běn wǎ eringe nyí nyǐ o/ryí ocím. Ben ba/chi ba-pwoo eshê chwóó akpuga, nké oshê o*fí mú o/chi o-pwoo běn akpuga* ké nǎ, ben baa/róng kyikpu*. Eshê chwóó e/chi e-kyú ké abwô enen, nké oshê o*fí mú ben ba/chi ba-kyú ké bubwô ebe*.

⁷ Â ké oshê nang orá ké burwám-eshê nyí Óburúkpâbí mú mu Osówo enen mu o-kyâ běn, nké orî-onet-Ézerel mu kô mú chwǒm kyi/kaa ǎ, *da n̂g echi ba-nim ǎ kánkyí* ba-né ǎ echwáp*.

⁸ Nké cángê ê dyityém ne nyǐ, ba-pwoo ǎ nang ebóng chwǒm ńkyí mu o-ryuu ng.

⁹ *Da n̂g echi ba-né ǎ chwǒm epwoo* ké nǎ, dyije ńdyí afwá epwoo dii/fárâng*. *Da n̂g echi ba-bángê dyizong-kyibî-okabe ánkyi kyi-nung běn ké dyityém*. Â ba/né ǎ chwǒm ánkyi epwoo, nyǐ o/chi o-tii bukyû o-sét Óburúkpâbí, ne Óburúkpâbí o/chi o-bîn běn.

¹⁰ Kye n̂g ǎ chwǒm ánkyi ne bunyîn-dyityém, ne Óburúkpâbí o/chi o-jware běn ké kángkáng byěm ḿbyí bamu ba-chi i.

¹¹ Kángkáng nkéré, banet-Ézerel ba-man ba-kyú ne banet ḿbé mbe kyikpu, ḿbé badaryuu ochwâp. Ké bubwô ámbu, me mu n-sét ng běn n/fu, cángê ê dyityém ne mbé.

Eringe nyí badakûtî Básóng

¹² Â orî-onet-Ézerel, nang onyinchéng nang onyinyi, [o/kúng byiko emen o-shee] běn wǎ ósóng, zú n̂g ǎ abwô o-firi ké byiko emen ké nkéré oo/chi bǎmkpóngé o-kye ǒ ké aje nyâchât. Â dyije ńdyí aje káchâtkányi dyi/fyi, zú n̂g ǎ abwô o-firi ké byiko emen.

¹³ Ké nkéré mú baa/zú ǎ abwô, *da n̂g ǎ emîng o-dim dyijê abwô ábwo*.

¹⁴ Fîm m̂ byěm chwóó ḿbyí Óburúkpâbí oo/jware běn o-kye běn ba-kye ǎ, wǎ ebû ne esang-byichí ne bato.

¹⁵ Zîim m̂ ba/fu, ben ba/mû básóng ké Éjip, nké Óburúkpâbí mú mu Osówo enen o/nyii běn. Nkyí nké kyi/chi ne me mu n-kyâ běn kyije ńkyín.

¹⁶ Nké katô kii*nyîn ósóng eyên ámu o/fu, nyǐ o-dim m*. Kyi-man n ekyú kyi/fu, wo ne kyikû-banet eyên bamu ba-jê ng ǎ, o-ryuu o/fu, nyǐ o-kyú u ne ben.

¹⁷ Â nkyi éné, kúng ǎ a-ca ne nyǐ ké ocím-dyifyi eyên, a-rim ǎ butông. Nyǐ kâng o/chi o-waa ósóng eyên tete o-kpú. Tî n̂g to ósóng enen mú onyinyi ké bukwóp ámbu.

¹⁸ *Da n̂g ekûsa kafâ* â ba/zú ósóng enen abwô* ké nǎ, nyǐ oo/chi bǎmkpóngé o-kye ǒ ké aje nyâchât [o-koo kyicê-akpuga nyí badakye onet mú bada ǎ eyámê ké bǎmkpóngé.] Chi n̂g ńkyín ne Óburúkpâbí mú mu Osówo enen o/chi o-jware běn ké kángkáng byěm ḿbyí bamu ba-chi i.

Mbwôp Kashú-Wǎn-Mpong ne Etám-Ebû

¹⁹ Kúng n̂g kángkáng bambwôp kashú-bwǎn-mpong ne ḿbé etám-ebû ba-kye Óburúkpâbí mú mu Osówo enen. *Da n̂g ekúng mpong mún nang obónge* o-chi bǎmkpóngé*. Nang etám-ebû ńnyín to nang ebónge, *da n̂g epwát kányí eríp ké byiko*.

²⁰ Kángkáng dyije, ben ne byikû-banet enen, ryí n̂g kányí ké bushú ḿbú Óburúkpâbí ké kyikit kyibónge ánkyi, ńkyí badafé Óburúkpâbí.

²¹ Nké â chwǒm kyi/chi enyam ányi, nang e/waa nkwa nang e/sêe dyichi nang nyi ne kyibî-kyinêm kyikíri ké byiko, baa*man ba-kúng kányí ba-chi kyifen ba-kye Óburúkpâbí mú mu Osówo enen*.

²² Ba-man n eryí dyizong-kyitú ánkyi ké byise enen. Ben ashí kángkáng, nang onet mú bada ǎ eciring nang mú baa*ciring ǎ* ba-man n eryí enyam ányi wǎ eringe nyí badaryí enyam-dyikán.

²³ Nké *da n̂g eryí baróng emen*. Kúng n̂g kámbé ba-pwó kyísí wǎ omu.