Dyitórónómyi 14 - Bokyi Bible

Édúú-Dyikán eta nyí ee*nwa*

¹ Ben ba-chi i banet ḿbé Óburúkpâbí mú mu Osówo enen. Ké bubwô ámbu, â ba-kú ba-ta ng dyikán ńdyí onet o/kpú, *da n̂g eját byiko enen byibáp* ba-pwát nang eji nyí ké mbwô enen* wǎ eringe banet ḿbé áku mbe ba-chi i*.

² Ben ba/já Óburúkpâbí mú mu Osówo enen. Ké kángkáng burwám-banet ḿbé mbe ké ejíí, nyǐ o/cá běn ben o/fu, bakyú banet ḿbé emen nyǐ oyén.

Enyam nyí badaciring ne nyí baa*ciring*

³ *Da n̂g echi ba-ryí chwǒm nang kyibónge* ńkyí Óburúkpâbí oo/sét o/fu, baciring kánkyí*.

⁴ Ba-man n eryí enyam ńnyín, mpong ne etám-ebû ne ebúbǔu

⁵ ne ekún ne ebû-dyikán ne etong

⁶ ne nang enyam ekíri nyí nyi ne afîp-byiká ne e-sâm m ocím dyikáá.

⁷ Nké *da n̂g eryí enyam nang ebónge* nyí e*fí ne afîp-byiká* ne nyí ee*sâm ocím dyikáá*. *Da n̂g eryí boonyam-atû ḿbú mbu ne kyirún* nang hâa nang bája*. Ba-man ba-kúng kányí wǎ enyam nyí badaciring. Nyǐ e-sâm m ocím dyikáá, nké e*fí ne afîp-byiká*.

⁸ *Da n̂g echi ba-ryí ekorók*. Ba-man ba-kúng kányí wǎ enyam nyí badaciring. Nyǐ nyi ne afîp-byiká, nké nyǐ ee*sâm ocím dyikáá*. *Da n̂g echi ba-ryí enyam ńnyín nang ebónge* ba-ta nang kyikwóm emen*.

⁹ Ba-man n eryí kakworê nang kará ńké nke ne biipyipa ne biǐfágé ké byiko.

¹⁰ Nké chwǒm nang kyirá ńkyí nkyi kyi-kyú u ké kafâ-kace, ńkyí kyi*fí ne biipyipa ne biǐfágé ké byiko* *da n̂g eryí kánkyí*. Kúng n̂g kánkyí wǎ chwǒm ńkyí badaciring.

¹¹ Ba-man n eryí kanurung nang kará ńké baa*ciring*.

^12-18 Nké ńnyín něen azong-bunurung nyǐ adajwáp baróng, nyí baa*ryí* wǎ kiinkwa ne kiikong ne kakô ne kiinfuu akun ne otu-kanurung ne kaǎnúrúng-baya ne kaamba.

¹⁹ Ciring n̂g kángkáng boǒnyâa ḿbú mbu ne abyibabang. *Da n̂g eryí kámbú*.

²⁰ Ba-man n eryí kaǎnyâa ńké baa*ciring*.

²¹ *Da n̂g eryí enyam nang ebónge nyí e/kpú okpúng*. Ba-man n emîng bacinbánet ḿbé mbe ba-kyú u ne ben ba-ryí kányí, ne ba-man n ekúng to kányí ba-shee bacinbánet bakíri. Nké ben ba/já Óburúkpâbí mú mu Osówo enen. Ben ba-chi i banet emen. *Da n̂g erám wǎn-ebû ké abî nyí ba/nwárê boné emen*.

Byije ḿbyí Eyáré nyí badakyii Byikit Diǐkpú

²² Kyii n̂g kángkáng byěm ḿbyí badafuu ké byifát enen kángkáng dyije ké byikit diǐkpú, ba-kúng kyikit kyibónge ba-tî cát.

²³ Ca n̂g kâng ké kyikit ánkyi kyibónge, ńkyí Óburúkpâbí mú mu Osówo enen oo/cá o-tî o/fu, bakû ǎ ekye ofê. Ké kyikit ánkyi, ké bushú emen, kúng n̂g kyikit-eyáré enen ánkyi kyibónge ńkyí esang-byichí ne bato ne bakút-ólif ne mbwôp kashú-wǎn-mpong nang ebû ba-ryí. Chi n̂g ńkyín eringe nyí ben badakûnyît ba/fu, ben ba-kyâ Óburúkpâbí mú mu Osówo enen ofê kángkáng nkéré.

²⁴ Â onet mú kyikit-ofê ekye ánkyi kyi/jang etíbî ne byise emen, oo*man ekúng byěm-byikit-eyáré ámbyi* ḿbyí Óburúkpâbí oo/jware ǎ* o-kye ǎ kámbyí* ochi něen kâng.

²⁵ Oshee byěm emen ámbyi o-kúng akpuga ányi o-ca ne nyǐ ké kyikit-ofê ekye ánkyi kyibónge.

²⁶ Oyip akpuga ányi o-ré nang ebóng chwǒm ńkyí mu o-ryuu ng, nang enyam nang bato, o-kúng kámbyí o-kyú ányi ne kyikû-banet emen ké bushú ḿbú Óburúkpâbí ba-ryí kámbyí ké bunyîn-dyityém.

²⁷ *Da n̂g echi ba-né bǎmgbán-nchi kyifen-Osówo ḿbé mbe ba-kyú u ké eshê enen*. Mbé ba*fí ne esí nyí ebe*.

²⁸ Â aje a/shwôm achât, bâ n̂g ne eyáré ányi nyí kyikit kyibónge ké byikit diǐkpú, nyí kángkáng byíkwôn enen ba-tî kányí ké eshê enen.

²⁹ Byiryíng ḿbyín byi/já bǎmgbán-nchi kyifen-Osówo, ké nǎ, mbé ba*fí ne esí nyí ebe*. Byiryíng ámbyi byi/já to bacinbánet ne bwǎn-byibén ne banyǐnkú ḿbé mbe ba-kyú u ké eshê enen. Mbé babâ ba-ba-koo ocím mú mbe ba-ryuu ng. Chi n̂g ńkyín, ne Óburúkpâbí mú mu Osówo enen o/chi o-jware běn ké kángkáng byěm ḿbyí bamu ba-chi i.