ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 1 - Bokyi Bible

Busun-Osówo ḿbú Osówo o/ryí Ocím o/fu, bu/chi bu-bâ

¹ Tyiyófólos mú onet-kyijé ejí. Ké mbwôp kashú-nwet ejí, me n/sáng kyi-kim ne kángkáng byěm ḿbyí Jisos o/chi ne ḿbyí o/tángê to, kyi-fím ké nkéré mú o/kpet bǎmkpóngé emen echi

² tete kyi-ribi ké dyicí ńdyí Osówo o/yip ǎ o-jâ ne nyǐ kyíbóng. Ne Osówo o-kû ǎ eyip o-jâ ne nyǐ kyíbóng, nyǐ o/raa byiraa-bacê ḿbyí bánbán ne banet ḿbé nyǐ o/mû oo/cá kámbé wǎ banet-kyitwóm emen ké busa ḿbú Busun-Osówo.

³ Ké bajam-ací bafee, ké nkéré mú oo/ri afaníkong emen o-kpú, ne Osówo o-jwóbê ǎ, nyǐ o/tông banet-kyitwóm emen ámbe byiko kampén chwóó ké akwóp nyí kyi/tông banet wááng kyi/fu, Osówo oo/jwóbê ǎ ké bukyû, o/firi okpó. Mbé ba/ri ǎ, ne o/pem kámbé kyi-kim ne Butu ḿbú Osówo.

⁴ Ké nkéré mú nyǐ o/mû o/tôong ne mbé, nyǐ o/raa, o-kye kámbé bacê ḿbé bánbán ḿbén o/fu, *da n̂g echi ba-dim nyín ké Jerúsélem* nké kyú n̂g ba-bám eyáré nyí Bonchí ejí o/ryí ocím, nyí me m/mû nn/sét běn kyi-kim ne nyǐ.

⁵ Jǒn o/yip omu o-kye banet osoo mú Osówo, nké ké boǒnyín-ací ḿbú mbu bu-bâ ké kashú, Osówo o/chi o-yip Busun-Osówo o-kye běn osoo mú Osówo.

Osówo o/yip Jisos o-jâ ne Nyǐ Kyíbóng

⁶ Ké nkéré Jisos ne banet-kyitwóm emen ba/cibi kyikit kyibónge, mbé ba/bí ǎ ba/fu, Otu Kyítá, kántîk, wo a/chi a-chi eshê nyí áku e-firi ké bubwô ḿbú banet-Ézerel? wǎ eringe nyí ba/mû kpákpá?

⁷ Jisos o-faa kámbé o/fu, Bonchí ejí kǎnchí ké busa ḿbú emen nké odatî nkéré mú byěm ḿbyín byidachi, nké ben ba*fí ne busa ḿbú badanyît nkéré mú byi/chi byi-chi*.

⁸ Nké Osówo o/chi o-kye běn busa ké nkéré mú Busun-Osówo boo/bê bu-kâm běn, ne ben ba/chi ba-sét banet ńkyí bamu ba-nyît ng kyi-kim ne me, ké Jerúsélem ne ké kángkáng esí nyí Judyâ ne Samérya ne ké kángkáng ejíí emúmú.

⁹ Ké nkéré oo/raa kpók, Osówo o-yip ǎ o-jâ ne nyǐ kyíbóng. Mbé ba/bwom ányi mbe ba-tún n ǎ tete ófíbí o-cít ǎ, ba*da ǎ echîri*.

¹⁰ Mbé ba/waa ne achi nyí mbe ba-tún n kyíbóng ké nkéré Jisos mu o-yú u o-câ kyíbóng, banyinchéng ashí afee ne biǐkpárádádát-byídí ké byiko ba-byí ké abe ányi, ba-bwom ányi fáráng ne mbé.

¹¹ Banyinchéng ámbe ba-raa ne mbé ba/fu, banet-Gályílyi, ebóng ben ba/bwom ányi bamu ba-tún n achi kyíbóng. Jisos mún mú Osówo oo/kúng ǎ ké burwám enen o-jâ ne nyǐ kyíbóng o/chi o-chîbwa esim eringe ebónge, wǎ eringe nyí ben ba/ri ǎ o/yú o-jâ kyíbóng.

Onet mú o/kúng Kyikit-Bǎmkpóngé ńkyí Júdas

¹² Ne banet-kyitwóm-Jisos ba-dim kâng ké kaku ńké badakó Ólif ba-bwa esim Jerúsélem. Fím ké kaku ánke a-ribi ké Jerúsélem kyi-byí i chwǒm wǎ kyilómyíta obónge.

¹³ Ba-ba-ribi Jerúsélem, ba-shwôm ba-da-nung ké nfût-kyise mú ba/mû ba-kyú u. Ké burwám ebe ámbu, ba/mû Pyíta ne Jǒn ne Jêmsyi ne Ánduru ne Fyílip ne Tómos ne Batólómyi ne Mátyuu ne Jêmsyi mú wǎn-Áfus ne Sámon mú o/mû ne kiǐtí-kyijé ne oshê, ne Júdas mú wǎn-Jêmsyi.

¹⁴ Mbé ba/mû mbe ba-cibi ng kyikit kyibónge ba-fâ nshwam ké burwám, cibicibi ne ḿbé banyinyi ne Méryi mú boné-Jisos ne bwǎn-bané-Jisos.

¹⁵ Ké nkéré boǒnyín-ací boo/shwôm, banet ḿbé ba/bángê ké Jisos ne atyém ebe ba-byí i nang bajam nyâchât ba/kyú ké ncibi. Ne Pyíta o-bûu nensang o-raa o/fu,

¹⁶ bwǎn-bané ejí, kyi-man kyi-chi wǎ eringe ejá-Osówo nyí ba/sáng kyísí, nyí Busun-Osówo bu/chi Otu Dívit o-raa kyikû ké esim kyi-kim ne ńkyí kyi/chi kyi-chi ne Júdas mú o/tông banet ḿbé ba/kám Jisos bukwóp.

¹⁷ Júdas o/mû ké burwám eten, ké ebóng, Jisos o/mû o/fîm ǎ to o/fu, ochi bǎmkpóngé eten.

¹⁸ Júdas o/yip akpuga emen nyí o/koo ké kyibî emen ńkyí o/chi, o-ré esí nyí o/róng ké nyǐ o-kpú. Dyifít emen dyi-píp, efong emen e-byí kyíjí.

¹⁹ Kángkáng banet ḿbé mbe ba-kyú u ké Jerúsélem ba/jwo kyi-kim ne nkyí, ne ba-kó kâng ké ejá-oshê ebe ba/fu, esí ányi e-bángê e Akedáma, ányi kyi/byí, esí-baróng.

²⁰ Ké ebóng, ba/sáng kyísí ké Nwet-Ekwan-Osówo mú badakó Sâm ba/fu, kyise emen kyi-man kyi-waa kafâ dyikáá. Onet o*dachi o-kyú ké nkyí*. Ba/sáng to ba/fu, onet okíri o-man o-kúng kyikit-bǎmkpóngé emen.

^21-22 Kántîk kâng, onet obónge o-man o-nung ké burwám eten, mú o/chi o-bwom o-sét banet o/fu, Osówo o/jwóbê Jisos, Otu Kyítá ké bukyû. Onet ámu o-man o-kyú onet mú o/mû ké burwám eten, ké kángkáng kyikim-nkéré ńkyí Jisos, Otu Kyítá o/kúng bě byi-cen byikit, kyi-fím ké nkéré mú Jǒn o/sét banet kyi-kim ne osoo mú Osówo tete kyi-ribi ké dyicí ńdyí Osówo o/kúng Jisos ké burwám eten o-jâ ne nyǐ kyíbóng.

²³ Ne mbé ba-bún kâng banyinchéng ashí afee. Josêf mú ba/mû ba-kó ng ǎ Basábas, mú o/mû o-bángê e to Júsútus, ne Matáyas.

²⁴ Ne ba-fé kâng nshwam ba-kye Osówo ba/fu, Otu Kyítá, wo amu a-nyît ng atyém nyí kángkáng banet. Tông bě kâng, ǎ Otu Kyítá, onet mú wo aa/fîm ké burwám ḿbún ashí afee,

²⁵ mú o/chi o-kúng kyikit-bǎmkpóngé wǎ onet-kyitwóm-Jisos, ńkyí Júdas o/dim o-mîng, o-wâa ké kyikit ńkyí kyi/kwárê ne nyǐ.

²⁶ Ne ba-twóp dyímám kâng, eringe nyí dyidafîm onet mú dyi/chi dyi-cá ǎ. Dyímám dyi-nwa Matáyas, ne ba-yip ǎ kâng ba-fé ké burwám-banet-kyitwóm-Jisos ḿbé áku ashí diǐkpú ne din.