Zaburi 28 - Bibiliya Ijambo ry'imana D

Isengesho ryo gutabaza Uhoraho

¹ Zaburi ya Dawidi. Uhoraho Rutare runkingira, ni wowe ntakambira ntiwice amatwi, koko nutantabara ndamera nk'upfuye.

² Ujye unyumva igihe cyose ngutakambiye, igihe ngutegeye amaboko, nyerekeje Icyumba cyawe kizira inenge cyane.

³ Ntumpanane n'abagome n'inkozi z'ibibi, babwiza bagenzi babo akarimi keza, nyamara ubugome bubashengura umutima.

⁴ Ubahembe ibikwiye ibyo bakoze, ubahembe ibikwiranye n'ibibi byabo. Ubiture inabi bagize, ibyo bakoze bibagaruke.

⁵ Ntibita ku bikorwa by'Uhoraho, nta n'ubwo bita ku byo yaremye, ni cyo gituma azabarimbura akabatsemba.

⁶ Uhoraho nasingizwe, koko yumvise ugutakamba kwanjye.

⁷ Uhoraho ni umunyambaraga nisunze, ambera ingabo inkingira, mwiringira mbikuye ku mutima, arantabara nkabyishimira cyane, nanjye muririmbira musingiza.

⁸ Uhoraho ni umunyambaraga abantu be bisunga, ni we buhungiro akirizamo umwami yimikishije amavuta.

⁹ Uhoraho, kiza ubwoko bwawe, ubwo wagize umwihariko wawe ubuhe umugisha, ububere umushumba ujye ubukenura iteka ryose.