Zaburi 26 - Bibiliya Ijambo ry'imana D

Umuntu w'umwere atabaza Imana

¹ Zaburi ya Dawidi. Uhoraho, ndenganura kuko ndi umwere, Uhoraho, nkwiringira ntajijinganya.

² Uhoraho, ngenzura ungerageze rwose, usuzume ibyo nifuza n'ibyo nibwira.

³ Nzi ko uhora ungirira imbabazi, mu mibereho yanjye nkurikiza ukuri kwawe.

⁴ Singendana n'abantu b'imburamumaro, singirana ubucuti n'indyarya.

⁵ Agatsiko k'abagizi ba nabi nkagendera kure, abagome singendana na bo.

⁶ Uhoraho, nzakaraba intoki ngaragaza ko ndi umwere, mbone kuzenguruka urutambiro rwawe.

⁷ Erega nkugaragariza ishimwe ryawe, ngatangariza abantu ibitangaza wakoze!

⁸ Uhoraho, nkunda Ingoro yawe ubamo, ni yo nzu ikuzo ryawe rigaragariramo.

⁹ Ntumpanane n'abanyabyaha, ntunantsembane n'abicanyi.

¹⁰ Abo ni abantu bahora bacura inama mbi, bakereye kwakira ruswa.

¹¹ Jyeweho nzakomeza kuba umwere, ungirire impuhwe uncungure.

¹² Nzahora ndi intungane, sinzahwema gusingiza Uhoraho mu makoraniro y'abe.