Zaburi 23 - Bibiliya Ijambo ry'imana D

Uhoraho ni umushumba mwiza

¹ Zaburi ya Dawidi. Uhoraho ni umushumba wanjye, ntabwo nzagira icyo nkena.

² Ampa kuruhukira mu rwuri rutoshye, akanyuhira amazi y'urubogobogo.

³ Ni we ungaruramo intege, ni indahemuka anyuza mu nzira nziza.

⁴ Nubwo nanyura mu gikombe gicuze umwijima, nta kintu cyantera ubwoba. Kuko wowe Uhoraho, uba uri kumwe nanjye, uranyobora ukanandengera, ibyo ni byo bimpumuriza.

⁵ Untegurira ibyokurya byiza, abanzi banjye bakabura uko bangenza. Unyakira iwawe nk'umushyitsi w'imena, ukanzimanira ukandabagiza.

⁶ Koko ineza yawe n'imbabazi zawe bizambaho, bizambaho igihe cyose nkiriho, nanjye nzajya ngusengera mu Ngoro yawe, nzahagusengera igihe cyose nzaba nkiriho.